mamilih (IDG Trinandita

Artikel

mamilih

IDG Trinandita

Yéning selehin becik-becik minab nénten iwang kanikayang ring kahuripan puniki jatmané satata mamilih. Mamilih ring kahuripan puniki wantah parikrama sané tan prasida lémpas riantuk patut kalaksanayang. Mamilih pastika sangkanin wénten sané patut pilihin. Taler sangkanin sampun panumaya mamilih.

Ring parikrama upacara yadnya pinaka conto. Krama Hindu patut mamilih pamargin yadnya nganutin tingkatan yadnya. Wénten tingkatan nista, madya lan utama. Niki mabuat kauratiang riantuk dasar utama yadnya wantah ketulusiklasan. Nénten dados kapaksayang. Tan becik kasengguh kadi angkaban barong somi. Pastika pamargin yadnya patut nginutin prabéa sané wénten utawi nginutin kasumanggupan sang aduwé karya utawi sané ngawéntenan yadnya inucap.

Kabaos sumangdané anut lan adung kémaon tan lémpas saking tata-titi ajah-ajah agama. Sujatiné yadnya sané utama wantah yadnya nekéng tuas lascarya lan doh saking pikayun nginggilang sikian. Mapangapti mamargi satwika yadnya. Boya tamasika yadnya. Pamargin yadnya agama taler mapaiketan ring pamargin budaya. Agama lan budaya memargi nginutin aab jagat. Kémawon kautaman dasar yadnya wantah patut tetep kaajegang kadi titah leluhur utawi dresta sané ketah mamargi. Patut katunasang ring Ratu Sulinggih utawi Nak Lingsir sané patut niwakang pamargi. Yéning sampun

kadi punika majanten pamargi yadnya nemu sané mawasta rahayu galang apadang sida sidaning don.

Ring parikrama wargi tiosan mamilih wantah kasujatian warginé sami. Ring aab jagaté sampun ngalimbak ring kemajuan téknologi lan informasi. Mamilih nyangsan abot. Warginé patut yatna ring angga nyantenang pilihan. Riantuk nyangsan akéh sané dados pilihan. Jaman sané maju akéh ngametuang pilihan. Sami pilihan punika becik kakantenang kémawon yéning iwang mamilih pastika nemu pakéweh utawi pikobet. Dadosné mamilih puniki patut kadabdabin utawi kaplajahin. Wénten nak maosang mangdané nénten ngantos salah pilih utawi mamilih sané tan patut.

Mamilih pakaryan nyansan akéh sané dados pilihin. Akéh panglimbak pakaryan sané kajantenang. Ring kawéntenan panglimbak média sosial pinaka conto. Irika jatmané pacang mamilih. Yéning ring média sosial iwang mamilih tur iwang midabdabin tan urungan jagi nemu pikobet. Minab sangkaning iwang mencét tombol raris maurusang sareng pihak keamanan utawi kepolisian. Minab sangkaning mamilih utawi nganggé média sosial punika tan nginutin aturan perundang-undangan sané kacumawis.

Ring pidabdab tiosan rikala jatmané pacang ngaruruh hiburan lan ajengajengan taler patut mamilih. Hiburan sané patut prasida ngawetuang rasa gargita kémawon hiburan sané tan anut pastika ngawinang rasa duhkita. Ring ajeng-ajengan minab sampun kawikaning panglimbak nyané. Ajengan lan inuman saking dura désa, dura pulau ngantos dura nagara sampun makéh katragiang. Patut yatna mamilih mangda nénten ngeraranin.

Ajengan inuman utawi kulinér sané ngalimbak patut kasuksemayang pinaka cihna kemajuan jaman mapaiketan ring globalisasi. Kémawon mamilih sané anut patut lan cocok sareng waduk lan rasa punika tetep patut kauratiang. Napi malih pulo Bali wantah pulo pariwisata pinaka genah mapupul nyané jatma saking sajebag jagat. Pastika ngalimbak pisan ring sajeroning parikrama

inucap. Unteng nyané napi sané katumbas punika mangda tan ngawinang pikobet ring kaséhatan.

Ring pikamkam warginé midabdabin kahuripan makéh taler pilihan. Conto rikala maratengan sampun wénten saang, kompor gas lan kompor listrik. Pilihan puniki taler patut kauratiang. Taler ring kawéntenan serana transportasi. Mangkin sampun wénten sepéda listrik, motor listrik lan mobil listrik. Sami pilihan ngelikubin jagaté. Warginé wantah mamilih kémanten. Tios ring punika pilihan taler kejantenang ring makudang kudang panganggo, sepatu, genah malilacita, warung, toko, pasar tradisional ngantos swalayan.

Ritepengan jagat kadi mangkin taler katragiang mablanja online. Nélpun utawi chating ring médsos napi sané katumbas sampun prasida rauh. Mikayunan makan minum, panganggo, alat rumah tangga lan sané tiosan sami prasoda katumbas online. Pilihan lan barang sané katragiang nyangsan akéh. Saluir kita prasida kadagingin. Saluir pangarsa sida kadabdabin. Sami kataur antuk jinah. Jinah kasengguh utama ring jagaté. Kémawon patut kauratiang wantah boya kadi puniia sujatiné. Sané utama wantah pangaweruh utawi pengetahuan. Yéning sampun maduwé kaweruhan sinah jinah dangan kapolihang. Raris risampuné wénten jinah madasar pengetahuan prasida pacang milah lan milih napi sané patut kapilih risajeroning nagingin kahuripan puniki. Dumogi tan ngantos iwang mamilih. Ngawinang iwang parilaksana. Sané pacang ngawinang metu rasa duhkita. Ngiring pelajahin mamilih mangda sida nemu rahayu ring jagat sekala niskala. Astungkara

5 Oktober 2022