Pamahbah

galang bulan

Sangkaning tulus - dulur kaduluran déning kalédangan dangan makardi ngardi ajuning galang pada

pada aju mulaning sarat sarat kajun sarat bakti

bakti siniwi apan punika.....

i sasih mangawé girang girang ipun i sekar gadung gadang daun njané mangrawé

ngawé sukaning ati ati sutji pinda widi kawidén-ning sinar bulan

sangkaning punika raris..... suara rebab gambuh mangalup ngalap kasor kéngin mapitorang

miterangin antuk galang bulan bulan purnamaning kapat?

gaguritan pianak bendéga

jéning wengi sampun medal rainané mangkin sang bendéga raris ngrauhin peraun ipun marérod mapinunas swétjan widhi njeladjah segara biru ngereh tatedan anggén somah pianak ipun

inggih punika karjan ipun sawai-wai saantukan ipun sajuakti lédang saantukan ipun sajuakti nresnin djagat druwéné

sang bendésa medal mairingan pudja rahaju somah pianak ipun ipianak njagdjag raris matakén -bapa, bapan titiang bapa lunga kidja?

i mémé raris engsek, ngajat batara sagara -ratu, ratu déwan sagara makudang taun papa puniki ngrauhin pandjak druwéné?

asapunika karjan ipun sawai-wai asapunika karjan ipun sawai-wai

sang bendéga sané marérod ring sagarané biru kapantigang antuk ombaké sané magulung-gulung

tur panes surja sané tan sida-sida nanging ipun tetep pageh saantukan ipun sajuakti lédang saantukan ipun sajuakti nresnin djagat druwéné raris, jéning surja sampun medal ring sisi kangin sang bendéga budal makta suétjan widhi somah ipun matakén ring manah ipun tur pianak ipun njagdjagin liang matakén -bapa, wénten redjeki rainané mangkin?

sanggar olég tambulilingan

bali

Tabuh, solah lan wirama driki masikian idup kaidupang antuk dasar manah suci suara bajra ida pedanda malarapang wéda-wéda juru kidung matimpuh ngidungang wargasari sekadi mayunan ring muncuk-muncuk penjoré magejeran ring oncér canang sari lebur masikian tur dahating ngulangunin sajroning manah (buin pidan tiang ilang apang ilang dini di tengah-tengah oleg tamulilingan) ngiring mangkin sikiang ragané nyegjegang warisan leluhur sami mabalik sumpah ring manah soang-soang anggén senjata dahating sakti pacang warisin oka-putuné ungkuran seni budaya kasucian leluhur wantah katuju (buin pidan tiang sebet apang sebet dini katembangin pupuh semarandana)

Wéntenké, bacikan ring hidup pasuka-dukan selunglung sabayantaka ngulangunin suaran suling pangangon bajang-bajang nembang ngalih saang semar pegulingan di jaba pura wéntenké?

(buin pidan tiang mati apang mati dini kaanterang kakawin prihantemen).