Hitaveitur

Tryggvi Þór Haraldsson forstjóri RARIK og Matthildur Ásmundardóttir bæjarstjóri hleypa heita vatninu frá Hoffelli inn á hitaveitukerfið á Höfn.

RARIK á og rekur fjórar jarðhitaveitur og eina fjarvarmaveitu. Hitaveita Dalabyggðar var tekin í notkun árið 2000, en RARIK keypti veituna árið 2003. Að jafnaði er orka frá virkjunarsvæði hitaveitunnar 12 l/s af 84°C af heitu vatni sem samsvarar um 4,2 MW afli miðað við nýtingu til húshitunar. Rekstur veitunnar gekk vel á árinu.

RARIK keypti hitaveitu Blönduóss árið 2005 og jók umsvif hennar töluvert þegar Skagaströnd var bætt við veituna 2013. Veturinn 2019–2020 boraði Ræktunarsamband Flóa og Skeiða nýja 1202 m djúpa holu sem var klædd með gataðri fóðringu niður á rúmlega 700 m dýpi sökum hruns í holunni. Borunin gekk á köflum erfiðlega vegna veðurs og hruns úr holuveggjum. Mælingar sýna að helsta æð holunnar er á um 969 m dýpi. Fljótlega eftir borlok var holan virkjuð og virðist hún nú gefa um 10–12 l/s. Til að auka vatnsöflun á svæðinu var borhola RR-21 frá árinu 2006 endurfóðruð svo að hægt væri að staðsetja nýja borholudælu á 300 m dýpi í stað 190 m áður. Hefðbundnar öxuldælur geta ekki annað slíkum afköstum á svo miklu dýpi og því var sett háspennt sambyggð djúpdæla í stað þeirrar sem áður var. Stækka þurfti borholuhús til að koma fyrir jaðarbúnaði dælunnar. Í ljósi lækkandi vatnsstöðu þarf að fara í aðgerðir til að auka vatnsöflun og til að lágmarka sóun á vatni.

RARIK keypti hitaveitu Siglufjarðar árið 1991 og réðst í verulegar endurbætur á kerfinu. Árið 2011 var m.a. virkjað nýtt svæði í Skarðsdal og lögð aðveitulögn þaðan. Siglufjörður hefur nú tvö aðskilin virkjanasvæði og tvær aðveituæðar. Rekstur veitunnar gekk ágætlega á árinu.

Fjarvarmaveitan á Seyðisfirði er 40 ára. Veitan er kynt með háspenntum rafskautskatli og olíukatli til vara. Við stofnun veitunnar átti RARIK kyndistöðina og sveitarfélagið dreifikerfið, en árið 1992 keypti RARIK dreifikerfið og hefur rekið það síðan. Með hækkandi verði á ótryggðri raforku umfram aðra raforku og óvissu um framboð á næstu árum er upprunalegur rekstrargrundvöllur fjarvarmaveitna af þessu

tagi brostinn. Eins og gerð var grein fyrir í ársskýrslu RARIK 2017 hefur verið ákveðið að hætta rekstri veitunnar. Þessi niðurstaða var kynnt á íbúafundi, en framhaldið er enn í skoðun hjá sveitarfélaginu sem fer með einkaleyfi til rekstrar hitaveitu á Seyðisfirði eftir að einkaleyfi RARIK rann út í lok janúar 2017. Mikið álag var á fjarvarmaveitunni á Seyðisfirði í kjölfar aurskriðna sem féllu á bæinn í desember, en tekist hefur að koma kerfinu að mestu í eðlilegan rekstur aftur.

RARIK keypti fjarvarmaveituna á Höfn árið 1991, en hún var tekin í notkun 1980 og er því 41 árs. Veitan hefur verið kynt með rafskautskatli og olíukatli. Sá búnaður heyrir nú sögunni til því að heitt vatn fannst við Hoffell sem getur séð Höfn og nágrenni fyrir heitu vatni og var ný jarðvarmaveita gangsett þar í desember 2020. Hitaveitan samanstendur af 20 km hitaveituæð frá Hoffelli til Hafnar auk þess sem byggðar voru tvær dælustöðvar, jöfnunartankur og þrjú borholuhús. Þá hefur kyndistöð RARIK sem áður hýsti rafskautsketil fjarvarmaveitunnar verið breytt til að þjóna sínu nýja hlutverki sem lokahús hitaveitunnar og upphafspunktur dreifikerfis Hafnar. Lokið var lagningu stofnæðar hitaveitunnar í desember 2020 og tók hitaveitan við af fjarvarmaveitunni þann 18. desember. Nú eru um það bil tvö af hverjum þremur húsum á Höfn, sem áður tengdust fjarvarmaveitu, tengd hitaveitunni. Ætla má að tenging nýrra notenda geti lokið á árinu 2021.

ORKUVINNSLA OG MEÐALTALSAFL Í JARÐHITAVEITUM

Heiti veitu Hitaveita Blönduóss og Skagastrandar Hitaveita Dalabyggðar Hitaveita Siglufjarðar Samtals vinnsla úr holum m3 Meðaltalsflæði l/s Meðaltalsafl (kW)

1.201.094 389.963 718.953 38 11.622 12 4.342 23 6.957

Jöfnunartankur RARIK í Hoffelli.