Mangingisda sa Kalupaan

Pumalaot sa konkretong daan, sa hangin ay sumuong. Bawat sigaw, bawat lingon, Katumbas pantawid-gutom.

Sa gabi, sombrero’y sereno. Lamig na nanunuot ang kinukumot. Pasma ang kalaban sa kakarampot na baryang pinaghirapan.

Sambit niya’y “Sampuan!” Ngunit labindalawa’y ‘pinagsiksikan. Para ba sa dagdag-kita? O sa pasahero’y dagdag-pahirap?

Sigaw ng pasahero’y “Para!” Hinabol pa ng sitsit at sipol. Si manong drayber na bingi, sa hihintuan sana’y nakalampas na!

Pagdating ng kwentahan, s’ya ay dehado. Naubos sa gasolinang ginto at tong sa mga manggagantso.

ni EFREN S. ALMOZARA JR.