ROKMÃDKÃ WASKUZE

Aimõ nõkwa kmã mrmẽ wa tâkãnnĩ aimõ kbure dasipkẽ nã danĩmr rommãdâ dat krsakra mnõ nã, tô kbure zatô aimõ kmã tasimãzusn aimõ dakahâ snã wamsi aimõ rommãdâ dat kmã prê mnõ nã, aimõ tanẽ snã dakahâ tê nĩmr rommãdâ dat kdur mnõ pibumã. Are tanẽ aimõ dasimãzusi dat krsakra mnõ wa, za aimõ rommãdâ kãhã daprãirê têhã dat krsakre.

Twa rommãdâ aimõ dakahâ tê krsi prê mnõ tô aimõ sawredi. Are tanẽ nmẽ tâkãnẽhã rommãdkâ dat prê mnõ aimõ dakahâ snã dat sakra mnõ tô aimõ kbure krda sikmãdkâ psê mnõ snã, twa rommãdâ dat kprê mnõ tô aimõ krure pibumã. Tanẽ nmẽ za aimõ dat kprê aimõ dakahâ snã romkmãdkâ tkrê sakra mnõ aimõ dakmãdkâkwa dat ksõre mnõ wa, are tô aimõ tkrê kmã dkâ psê mnõ snã kãtô dure dat ksakre mnõ kõ snã aimõ kãhã ĩprãĩrê nõrĩ.

Tanẽ mnẽ mãtô aimõ tâkãhã hêsuka Justiça Eleitoral di kmãnã, tô aimõ tâkãnẽhã rom krãĩkrda krda siwawi mnõ pibumã krsi krãĩptẽ mnõ wa krsi mẽkra mnõ prabâ nẽ, aimõ tô tâkãhã tkai tdêkwa kbure aimõ waihku snã tkrê krmãdkâ mnõ pibumã kãtô dure aimõ damẽ krzas mnõ pibumã.

Tâkãhã hêsuka, tô sikwãĩpsê damrmẽzem nã mãtô aimõ tsi kmãnãr (Iny, Akwẽ, Apinayé kãtô Mehin) mrmẽzem nã, are tanẽ snã mãtô aimõ ĩsanãmr kwa Akwẽ nõrĩ kãtô

aisikapko kwai nõrĩ zatô samãr waihku pês rommãdâ dasiwawi mnõ zemr kwãiba, kãtô dure aimõ waihku psê snã damẽ krzas mnõ pibumã.

Tâkãhã hêsuka kũĩkre hawi, wazatô aimõ tokto krwa nmĩpar aimõ Akwẽ krĩ siwawi mnõ tâkãhã Tocantins wamhã tokto aimowi snã sĩmr rommãdâ tkrê sakra mnõ snã, aimõ tô sĩmr dakmãdkâkwa tê tmã ropibui psê snã simã tê sõre mnõ pibumã.

Sanãmr psê kwaba!

Desembargador EURÍPEDES LAMOUNIER Presidente