AKWẼ KRSI WAWI MNÕ

Akwẽ krsi wawi mnõ siptê tkrê dam sõmr mnõ tô tâkãhã tkai tdêkwai krtabi, sisize aimõ psê snã krsaikwar mnõ, si wawi pibumã. Tôtahã sisize za nõkwa Cartório Eleitoral wa hi krmõr zem wa, smĩ hêsuka hêmba re hã tê wasku snã, tô 151 bdâ hêmba wi dasiwawi mnõ pibumã. Akwẽ krsi wawi mnõ prêd aimõ sĩm dakmãdkâkwa tkrê sõre mnõ pibumã, twa tô siwawi snã za nõkwa sasõ dakmadkâkwa. Za kuitabr snã tsi wawi nõkwa 18 nã are tô 70 ku wahu tê kâr nẽhã are 16 nã wahu kmã sikutõr nẽhã kãtô ĩptokrda 70 nã wahu tê spai nẽhã tô kmã sapkrka wamsi za tsi wawi siptê tê dam sõmr pibumã.

Nõkwa mõr kõwa dasiwawi pibumã bdâ si hri zem nã

Nõkwa aismĩ hêsuka nẽhã aisiwawi pibumã aimõr kõwi bdâ si hri zem nã aimõ dasiwawi mnõ pibumã aisiwawi zem wa, kãtô tem kawakõi kõwa aimõr pibumã, zatô nõkwa tsi wasku pês aimõ tô siwakru dasiwawi zem mba, are zatô dure aimõwi mã ptâ nã tsi wasku pês, are tanẽ pibumã za nõkwa bdâ ĩssõre si hri nã mõ Cartório Eleitoral ku, are tanẽ kõwa za tô adu dure nõkwa siwaskuze sõ internet mba. Twa nõkwa siwawi kõwa kãtô adu siwasku kõwa, za nõkwa

wakâ aimõ Justiça Eleitoral mã kãtô dure: - Smĩ hêsuka hêmba re hã tkai kamõi ku mõr pibumã kãtô smĩ hêsuka hêmba re hã tê wazrê kõdi; - ktâprezu dure wakmãdkâi hawi mã tê wazrê kõdi; - sisize sipi pibumã dure tê hri kõdi kãtô dure datmã wapros kõdi sipi pibumã; - Sisize dure tê hri kõdi aimõ hêsuka tê kazanãmr pibumã; - siwar wa hêsuka nã sisize tê hri psê pibumã damẽ krsi wawi mnõ pibumã dure datmã wẽ kõdi.

TMÃ ROPIBUI KWABA!

Nõkwa aisize nmrõ psê wa aisiwawi pibumã, are tanẽ kõwamnẽ aisiwawi kõwa kãtô aisi wasku psê kõwa mãr wa aimõ aisiwawi kõ, za aisim hêsuka aisiwawi ze aiwshârn tokto aisiwawi kõ pibumã. Twa kãnẽ rommãdâ am nmrõ wa witô aimõri Cartório Eleitoral ku aipâ kmã kwapsê pibumã.