SIPIZE

SISIZE TÊ SAKRA MNÕ DAT TMÃ WAWI MNÕ PIBUMÃ SIPIZE

Nãkwa sisize tê sasõmr nehã dat tmã wawi mnõ pibumã tâkãhã tkai tdêkwa tô ktâwankõ mrmẽzem nã za aimõ krsi wasku are dure krsi war, sim rommãdâ sissumã kmã si dur mnõ tê wasku snã. Twa dat tmã we kõdi aimõ kuitabr kõ snã aimõ tê kmãkwamãr pibumã, aimõ danĩm rommãdâ, dasimãzus zem kunẽ tê prê mnõ pibumã (Código Eleitoral, art. 242, caput e Lei nº 10.436/2002, art. 1º kãtô 2º);

Rom krãikrda wasku rommãdkâ kwãiba: Tô rom kmãkwamãrĩ aimõ dasimãzus ze kãtô danĩm romkmãdkâ, aimõ tê dakmã kawakõi pibumã, si tmẽ tê dakanmẽ pibumã. Twa aimõ dat wẽ kõdi aimõ sĩm rommãdâ tê wasku pibumã târa mrmẽ kãtô târa hêmba mrmẽ tê wakrbâ snã (Lei nº 9.504/1997, art. 36, § 2°).

Rom krãikrda wasku ro sikrãiptẽ wa dasiwawi mnõ

pibumã: Tô kãhã sisize tê sakra mnõ kãtô rommãdkâ nã sidur mnõ aimõ siwasku mnõ tê dakakburõi pibumã dat tmã wawi mnõ pibumã aimõ danõwa krsi mẽkra mnõ pibumã. Twa kãnẽ hã tô bdâ 16 nã agosto nãhã wa nwa waptkã wamsi nmãhã wahum nã ro sikrãiptẽ wa, za aimõ tmã sisdâhu (Lei nº 9.504/1997, art. 36).

Rom krãikrda wasku târa hêmba mba ro sikrãiptẽ wa

dasiwawi mnõ pibumã: sisize tê sakra mnõ dat tmã wawi mnõ pibumã zatô aimõ tmã wẽn krsi wasku mnõ pibumã Facebook mba kãtô dure rom sãmr zem mba Google wa, zatô dure târa hêmba sittê rom zakra zem wa tsi wasku, are dawadi tê hã rom waskuze mba dat tmã wẽ kõdi, kãhã rom wasku kuitabr kwai tê wa.

Zatô wẽn

• Târa hêmba wa sisize tê sasõmr wa, rommãdkâ nã krsidur mnõ nĩmr târa hêmba wa kãtô dure sissu aimõ tâkã nẽhã rom krãiptẽ wa sitomr mnõ nẽhã nĩm târa hêmba wa rom zakra pibuma, are tanẽ pibumã za aimõ Justiça Eleitoral mã tsi wasku kãtô dure hêsuka tsi sakra aimõ tãkãhã tkai wamhã târa hêmba kmãdkâkwai mã. • Za dure tsi wasku aimõ târa mrmẽze mba aimõ sisize sipkẽ nã tê nwa hri nẽhã wa sittê wa, rommãdkâ nã krsidur mnõ nĩmr târa hêmba wa kãtô dure sissu aimõ tâkã nẽhã rom krãiptẽ wa sitomr mnõ nẽhã nĩm târa hêmba rom zakra pibuma wa, are tanẽ pibumã nõkwa tê kâr nẽhã aimõ sipkẽ nã sisize tê wazrê pibumã dat tmã hri snã. • Târa hêmba mba aimõ rom zakra zem wa aimõ sisize tê sasõmr nẽhã tô siwaprosi siwasku re hã tê sakra mnõ wa zatô tmã wẽn, aimõ tê wakrbâ kõsnã dawadi mã tê tmã kmãkwamãr pibumã ĩsisizem nã. • Tô sipkẽ nã za nõkwa sĩmr romkmãdkâ nã kmã tsi wasku, danĩsize tê wasku snã tâkã nẽhã rom krãiptẽ wa, twa tô kbure mã sdâhuit aimõ tê dakmã zdawakrãm pibumã.

Mãrĩ dat stomr psê mnõ dat wẽ kõpra

• Siwakru rom mnõ kãtô danĩpi ze târa hêmba mba hã aimõ dat sakra kõ nẽhã internet mba, tô ĩwakrbâ kõ nẽhã ze mã. (Lei nº 9.504/1997, art. 57-B, § 3°); • Rom krãikrda wasku ro sikrãiptẽ wa dasiwawi mnõ

pibumã kwãiba, tô wakrbâ snã wamnẽ, kãhã dahêmba jurídicas nã ĩwamtrẽ mba, aimõ ktâprezum kburõikwai nẽhã kãtô tare sipi tkrê kmãkwamãr mnõ nẽhã, kãtô rom hêmba wa romwasku ze aimõ rom kmãdkâkwa kbure tê hã, prare nã kãtô dure prare kõnã dat krwamtrẽ mnõ. • Siwakru rom krãikrda wasku aimõ tâkãnẽ rom krãiptẽ dasiwawi mnõ zem kwãiba wakrbâ snã târa mrmẽ hêmba mba. • Aimõ danĩsizem zakra ze somrĩ wakrbâ snã târa hêmba mrmẽzem mba. • Rom krãikrda wasku târa mrmẽze mba, romãkrãre, rowahâ kãtô dure mãra nã. • Rom krãikrda wasku dawadi nõrĩ sisize tê sakra mnõ kwãiba, sim rommãdkâ nã sidur mnõ, kãtô sissu mhã tâkãnẽ hã rom krãipte wa mã, aimõ rom kare snã dawasku.

Mãrĩ dat wẽ rom krãikrda wasku, ro sikrãiptẽ wa dasiwawi mnõ pibumã:

• Dasikrãitõ târa mrmẽ zawre wa damrmẽzus snã zatô aimõ romakrãre 8 horas hawi tô 24 horas ku snã wẽn, are ĩstõ mhã dasikrãiktõ tô 2 (ponkwanẽ) horas za ĩsu tsi sẽr.

• Hêsuka dat krtom mnõ târa wra mba kãtô krizdawa mba, aimõ ĩhêmba 0,5 m2 tê spai kõsnã, kãtô dure sipkẽ nã kãtô wakrbâ kõ snã nõkwa tê sakra mnõ wa; • Sikuza ware dure nõkwa tê sakra mnõ wa bdâdi kbure dawarbeze mba, are nẽsi dat sãmr simtã mnõ kõ pibumã, twa tô 6 kãtô 22 horas nã si simtã mnõ pibumã, aimõ dawarbeze kãtô târa wra warbeze tê kwakru kõ snã; • Za dure nõkwa hêsukarê, hêsuka tom nẽhã kãtô aimõwi mã hêsuka mnõ tê sõmr pibumã tmã wẽnĩ, (twa tôtahã hêsuka hêmba tê spai kõ snã 50cm x 50cm), aimõ tô rommãdkâ nã ksi tom nõrĩ, sissu mhã kãtô aimõ sisize tê sakra mnõ tê kmãkwamãr wa;

• Târa wra, târa mrmẽ zawre re sissumr snã ssakrêm mnõ snã, dasissum snã dawahtu, dasikrãĩtõ kãtô dure rom krãiptẽ rom krãikrda dat wasku pibumã za tô dure tê kmã nãr pibumã tmã waprosn; • Wdêzakrda dat sõre mnõ pibumã, rom mnõ nwa si ssakra pibumã zatô dure tsi wapros aimõ dawarbeze tê kwakru kõ snã;

Mãrĩ dat wẽkõ rom krãikrda wasku ro si krãiptẽ wa dasiwawi mnõ pibumã:

• Rom krãikrda wasku, ro sikrãiptẽ wa dasiwawi mnõ pibumã wa aimã tê wakrbâ snã tanẽ târa hêmba mrmẽ, târa mrmẽ kãtô târa mrmẽ rom zakraze aimõ dat wẽ kõdi (Lei nº 9.504/1997, art. 36 § 2°). • Rom krãikrta wasku re hã si sakra mnõ wa wdê mba, târa wra mã rommãdâ zakra ze mba, târa wra nmĩkraze mba, kuba mba, kri mba kãtô dure hêsuka ktâprezum zô nõmr ze mba dat tmã wapros kõdi (tô nõkwai tê si kõwa mnẽ);

• Danĩmr rom krãikrda wasku kãtô dure danĩwari târa mrmẽ mba nõkwai mã dasiwawi pibumã, tô ptâ bâ snã dure dat wẽ kõdi; • Târa wra zawre târa mrmẽzem zawre re hã tô aimõ dasikrãiktõ wamsi za tsi wapros; • Rom krãikrda wasku outdoors nã ĩwamtrẽ mba dure dat wẽ kõdi, kãtô dure tôta nẽhã târa hêmba mba; • Rom krãikrda wasku târa wra dakwapezemr mba dure dat wẽ kõdi; • Dure dat wapros kõdi dasikrãiktõ aimõ si kmẽ wakrbâ snã krĩ sõkkaka mnõ, twa wakrbâ snã kãtô dure wakrbâ kõ snã, aimõ ro tê damr sasõmr pibumã, aimõ sisize tê sakra mnõ nĩsize dat sasõmr pibumã; • Hêsuka rom krãikrta wasku re sõmri rowahtuze mba dure dat wẽ kõdi;

• Rom kmã kwamãrĩ, kãtô ĩsõmrĩ tare snã sikuza nẽhã, krizdawa zdâhuze zakraze, ĩkuĩkreze, dakrãi hâiwamtro, dasaze, kãtô dure rom wadi mnõ aimõ krĩ siwawi mnõ si waihkâ snã dure dat wẽ kõdi; • Aimõwi mã akwẽ wakrbâ aimõ sisize tê hri kwãiba, rommãdkâ nã ksi tom kwãiba kãtô dure sissu aimõ hêmba mnõ kwãiba mrmẽ kunẽ pibumã dure dat wẽ kõdi; • Sĩm rom krãikrda waskuzem wa rom hêmba, ĩkuĩkre kãtô dahêmba zakra aimõ siwam snã dakmãdkâkwai tê kbure mã krĩ sipi prabâ wa dure dat we kõdi.