XƏBƏR Azərbaycan Türkiyədən MEMATT mexaniki minatəmizləmə maşınları alıb

Azərbaycan Türkiyədən MEMATT mexaniki minatəmizləmə maşınları alıb

Azərbaycanın Prezidenti, Silahlı Qüvvələrin Ali Baş Komandanı İlham Əliyevin tapşırığına əsasən, Azərbaycan Ordusunun Mühəndis Qoşunlarının madditexniki təminatının yaxşılaşdırılması, azad edilmiş ərazilərdə aparılan minalardan təmizləmə işlərinin sürətləndirilməsi və təhlükəsizlik tədbirlərinin gücləndirilməsi istiqamətində fəaliyyətlər davam edir. Bu fəaliyyətlər çərçivəsində Türkiyənin Milli Müdafiə Nazirliyinə bağlı olan ASFAT şirkəti tərəfindən istehsal edilən müasir tələblərə cavab verən MEMATT mexaniki minatəmizləmə maşınlarının ilk partiyası fevral ayının 4-də Bakıya çatdırılıb. Azərbaycanın Müdafiə Nazirliyi ilə Türkiyənin ASFAT şirkəti arasında MEMATT mexaniki minatəmizləmə ma şınlarının tədarükünə dair imzalanmış müqavilə çərçivəsində Azərbaycana qısa müddətdə 20 ədəd MEMATT mexaniki minatəmizləmə maşınının ixracı plan laşdırılıb. Fevral ayının 10-da MEMATT mina təmizləmə maşınları Azərbaycanda test edilib. İlk ixracı Azərbaycana edilən MEMATT-ların sınaqlarını Azərbaycan Silahlı Qüvvələrinin Mühəndis-İstehkam Qoşunlarının rəisi general-mayor Anar Kərimov və ASFAT rəsmiləri izləyib. Bakı yaxınlığındakı poliqonda keçirlən sınaqlar zamanı MEMATT ərazidə döşənən bütün minaları məhv edib və sınaqları uğurla tamamlayıb. Testlərdən sonra mexaniki mina təmizləmə maşınlarını idarə etmək üçün beynəlxalq kursu müvəffəqiyyətlə bitirən hərbi qulluçlulara sertifikatlar təqdim edi lib. General-mayor Anar Kərimov MEMATTların tezliklə erməni işğalından azad edilmiş ərazilərdə minaların tə miz lən məsi işlərində istifadə ediləcəyini söyləyib. ASFAT şirkətinin mütəxəssislərinin sözlərinə görə, yaradılması 14 ay ərzində milli imkanlar hesabına həyata keçirilmiş MEMATT-ın bütün sınaq və sertifikasiya prosesləri tamamlanıb. Xarici analoqları ilə müqayisədə daha keyfiyyətli və maliyyəti uyğun olan MEMATT-ın Türkiyə Silahlı Qüvvələrindən sonra ilk istifadəçisi Azərbaycan Ordusudur. Müxtəlif tralların və mexanizmlərin inteqrasiya oluna bildiyi MEMATT modulyar dizayna sahibdir. Detalları rahat şəkildə, sahədəcə dəyişdirilə bilən maşın 500 metr məsafədən radioəlaqə vasitəsi ilə idarə olunur. 4 km/saat sürətlə hərəkət edə bilən maşın müxtəlif ərazi şərtlərində istifadə oluna, 60% maililiyə malik yüksəkliklərə qalxa, 40% yana maili hərəkət edə bilir. 1700 mm genişliyində, 250 mm dərinlikdə təmizləmə həyata keçirən MEMATT mexaniki minatəmizləmə maşını 8 kq TNT partlayışına dözümlüdür. Qeyd edək ki, Türkiyədən alınan müasir tələblərə cavab verən texnika və avadanlıqlar azad edilmiş ərazilərimizdə dislokasiya olunan Azərbaycan Ordusunun mühəndis-istehkam bölmələrinin sərən camına verilərək yaşayış məntəqələrimizin və əkin üçün yararlı olan ərazilərin minalardan və partlamamış döyüş sur satlarından təmizlənməsi işlərinə cəlb ediləcək.