Kus življenja by Zoran Hercigonja

Nakladnik: Vlastita naklada autorice

Autor: Denis Kožljan

Naslovnica: Denis Kožljan

Copyright © 2019. Sva autorska prava pridržana. Nijedan dio ove knjige ne smije se reproducirati, prenositi ni u kakvom obliku niti ikakvim sredstvima elektroničkim ili mehaničkim, fotokopiranjem, snimanjem ili umnažanjem u bilo kojem informatičkom sustavu za pohranjivanje i korištenje bez prethodne suglasnosti vlasnika prava.

Elektroničko izdanje 2019.

KUS ŽIVLJENJA - Dijalektalna poezija-

Denis Kožljan

Uvodna riječ autorice

Evo nakon dvije zbirke pjesama naslova Kolajna od verši i Spod mojih prsti, odlučih splesti još jednu koljevku stihova na mom čakavskom dijalektu: „Kus življenja”. I sve su to verši ke san pisala tih pasanih lit, ma steši ne tako zdavna. San propensala kako je riva i ti hip da ti moji pisani kolačići vide svitlo dana i dojdu do unih ki ljube poežiju, ki kape i razume ča se to prehičiva u glavi jenega poete, i uz to običnega malega čovika. Sebe smatram upravo jednu od takvih duša koja zapravo živi život pišući i bilježeći trenutke iz djetinjstva ili možda iz čiste svakodnevice, zgode i razmišljanja u mom susjedstvu ili općenito na društvenoj sceni. I to su sve one moje impresije koje ponekad bilježim na materinjem, tj, standardnom štokavskom narječju ali i masu puta na rodnoj mi čakavici, na mojoj domačoj , teploj besidi z kon san resla, delala prve korke, ljubovala pak san rivala do nikih zlatnih lit. Mislim i još uvijek vjerujem i držati ću se moje ČA riči domače jer ona me jednako tako dotiče kao i hrvatska riječ, ona me usrećuje i liječi, kroz nju dišem, promatram svijet, radujem se životu i zato sam ovoj zbirci i dala upravo naslov koji ide tome u prilog „Kus (komad) življenja”, a koji će ostati dio mene i mog postojanja do onog trenutka kad Svevišnji odluči drugačije.

Denis Kožljan

PUT PUTUJE put putuje aj put putuje, nidan maj za nju ne čuje, ža mi te je, mila moja, dite moje, jubav moja, hrvacka... put putuje, niš ne more, teške su njoj nove zore, čepaj se za me , buki me za vrat, ninemu te nikad neču dat, mislin nate moja dika hrvackega roda.... putuje, putuje, vitar je zvragon nosi, stila bin je za kotulu čepat, ma vuki su lačni, mogli bi od gladi na mistu krepat.... ča da delan, niš ne moren, mala san za preko plota pojti, ni koristi, čovik moj , čekan te, na mojih vrati, dati ču ti postelju za prispati, samo budi jaka, soli u glavi drži, kad te svrbi , tote se postrži, nikad ne molaj, nikad ne krepaj, nenemu se z tobon igrati ne daj....

PREKRIŽENIH RUK stojin, sidin, u mojoj kantridi, ruke prekrižene, čekan bolje vrime, a ono ne gre, nima volje za doj hmeni, dižen glavu, pensan, ma niš ne gre naprid, za nazad se prontiva, slabo se muli trukinja, fažo osušija, grota pocrlenila, ma ja bin plesala, bin živila, se igrala, u vrtlu kopala, rože zalivala, ma samo kad kus zdravlja bih imala....

SI POŠLA ŠTRAMBO Lipoto moja, lipotice, znaš Ti mene kolikoTe volin i štiman, koliko san korki po Tvojoj zemlji puštila, koliko lasi zgubila..... Ma, čekaj, samo da Ti rečen, aš para mi se kako Ti me samo kapiš, da samo me Ti, moja Istro razumiš i moje dihe čuješ... svi ploti ča u tvojih njidrah restu, zgubili su nikako ono za ča su se rodili, smokve se same beru, ma ljudi plaču da su lačni.... vitri pušu, zemlju sušu pak daž kada dojde, kraja mu ni, štrige su strunile krila, vitica ud brajad ni uno ča nikad je bila.... grdi su puti, teški su hipi, črni su dani, pak me jeno malo strah aš da i Ti si moja Istro mila, draga...pošla jeno malo štrambo....

SAN STILA san jušto stila ma nikakor nis umila kanbijati sunce za daž, posaditi rože za trnje, skopati škulju za deblo, umotati sriču u lancun... san napro stila, vreda pojti h materi ka me ni volila, ocu ča me ni učinija, stila san spraviti zvizde u krilo spod moje kotule pak pofarmati se u hladu spod stare čerišnje.... joh je meni, neka mi nidan ovega puta ne zamiri, stila san kondužiti suseda do po korta, pobeliti zide u svitle beside, inkolati koltrine tega Vazma , ma vrime me kako za urtu ni poštilo, pofalilo mi je force, pozabila san regulati blago u tezi, kokošan dati zobati , dite vrči spati, sve san na biljet šenjala, proštila pak steši najzad traveršu molala, svitlo upuhla i na kantridi napro trdo zaškrežnjala....

NE ŽALI SE SUTRA čovik moj lipi, dušica moja draga, učini ča moreš, napiši kako moreš, ma levaj se, vrime je zlatnih bob, i vina če u bačvah biti, ma hoj, tamo, uzmi lapež, nemoj kukati i grdo sutra... govoriti, sad je hip, sad je ura... ko ne moreš sam , slabo če te drugi... vrimena su šašinska rivala, trava se u hladu zalelala, slabo je krstijani zašlo na ariju, ki če znati , forši teplina je još na grani, ma steši, prebuči čiste brageše, prehiti košulju ud fešte i hoj, učini, za sebe, svoju dicu, za bolje sutra, aš nidan neče umisto tebe, svaki svoju hižu gleda, pak jutro pokle moga biš zaplakat, moga biš se žaliti, ma neš imati kemu, aš biti če kasno, uvenuti če cviče, upuhnuti luče, zato stisni zube, samo dopri oči i učini to.....

ČA JE ZA RUČENJE ni se pitalo ča je za ručenje, siromaština je malo tega znala, letrika u frižideru ni rabila, kunpir se rano vadija i jopet pod zemlju spravlja, za sutra, prikosutra, fažo je baba mulila, da je lito napro rodilo, srična je bila, babo rešte ča je za ručenje, zajno san pitala, ma je baba brižna mučala, jopet palenta prez mlika, malo i kafela ud žita, zelja ud učera, grop u gutu stiska, sunce peklo, blago se ritko za isti ubijalo, delati je tribalo, več puti se ručenje i priskočilo, ko je kruha bilo, samo se u vodu umočilo, kakov frut u traveršu skrilo.....

NIKAD ne stajen, ne prekidan, gren u lakih panki naprid priko krovi i largo, tuckan na vrata, svakemu dan tantinić vrimena, vreda pišen da ne pozabin beside skupljan u libar, panki biže, a ja jopet pitan, skušan, kodičkan budiš, ne puštin da mi torna, znan se prihititi i priko Učke, sviti mi napro nebeska lanpadina, lišče grabljan, kostanje beren, nikad se ne ferman i kad lito pasa, drva slažen, na hartu slova mečen, lapiž brusin pak sve u škatulu modernega ču hitit, i dalje u mojoj glavi brbočkaju pensiri, ples dura, ružmarin zadaje....

ČA JOŠ ča još znan, a rekla nisan ča san se Bogu zavečala, ma je li san to učinila, nebo je gori još vajka teplo, doli meni ledi, užinu prontati moran, kako ču kad mi se grdo spi, ruke su mi napro teške kako grota istarskega voza, užljepana od vitri, daždi sprali me cilu, ča još zakrpati triban, vočali mi niš ne govore klicu života zalivan ma niš se ne refiva, pusta je prez radosti moja draga kunpanija.....

POČINI! Vrime je, ura kaže da je dosta, sidi i počini, zapri oći, prekriži ruke, samo usnice neka delaju svoj đir, natoči mižo, dopri brkun neka dojde friške arije, neka pensiri pasaju sito, aš sutra doj če vred, sutra zove za naprid, obrni se i propensaj !

GOBA zvali su je Goba, aš po nosu je hodila, krunicu molila, faco črni na glavi vajk imala, mljohava u štatu, dugih ruk, prez palice do brajdah se došuljala, gobasta, malih besid, stotu je doživila, nikad se ni ženila, ljudi u selu nisu je štimali pak su samo oko nje na drugi kraj pasali, o štrigah i štriguni štorije je znala, u žepu bili fačolić imala, po noči trdo spala a kroz dan z kanpanjon se igrala, dica su je strah imala, samo črnu robu vajk je sušila i prala....

KORA OD KRUHA niste stili, ma ste morali, pojti z dvi borše, prez suze u oku priko Velike bare, niste imali lazno pensati ča je bilo, kako vrime je tuklo, vi ste našli svoj put, stili ste živiti, dicu roditi, a tote na gnjištu, na banku čeka vas zavajk bocun bevande, kora od teplega kruha, voščenica sviti za dopriti van more, dojdite, tornajte se, ko niš drugo samo na kratko, da ubajdete žito zlatno, njivu na koj pase blago, dojdite provati kruh ki nikad ne zastara.....

SVITE MOJ iman ti čuda tega za povidati, vero san grdo inkacana, a more biti i rabijana, ne moren u koži staj, svite lipi, vrimena mi daj, da uzmen sobun kantu i mih, zletin priko mora, ispovidan grih, grde beside po glavi rondulaju, koliko san bisna, samo one znaju, zapiren vokno, dopiren vrata, kapi me samo suseda Kata, smihlja se kako đogatula ud drva, bit če forši bolje kad u nebo dojden prva...

NISAN ŽENA štufa san vajka govoriti, z postelje u kužinu hoditi, ča prokleto vrime triba umisto mene znati da ja san samo jena roža ka se pomalo refifa pokle suše i vitra, jena priženca ku je lipo viditi slušati ,š njon se z jutra buditi, kafe pomalo piti, ja san ti lipi moj pretelja ko si još kadi živ samo kamičić na kozjen putu, škatula movimenti vežena z crlenin fijokon, usnice mi treplju kad ki umre ili kad nevista pojde za mladića, ne umin gledati z visoka, samo uganan svaku besidu ku treiba u svit poslati kad je grdo, kad steže mirakul, znan obuti pastole, zakučati brageše, takati šunpreš ma gledaj svite dragi, tič mi se na glavu najvoli posrati a to je senja da san prez sriče se rodila,

pofuzla se svako toliko aš zemlja je učinila kanambolo, i tako para mi se več puti da harta je pogrišila kad me ženon zaštrikala, nosin se kako svaki muški, forši još i bolje, ne jočen kako oni za svaku malu, ja san ja, ni mi čuda lipo, nisan zlatna koka, ma čelo mi nikako svitli, ričipet se na suncu još zaspravlje bili....

NA TOUCH san se valje zasramila aš drugo ni ščer kapiti nis umila, da mi je samo znati kamo su finili uni albumi za slike ki su po regalu plesali, ni hi, ljudi dragi, nisu više potribni, ni hi za kupiti, aš je sada sve na TOUCH, sve se samo vrti, svitli, samo ud sebe naprid gre, za nazad steši mrvu teže, na touch gledamo i kravu kada leže, i dite kad se rodi, i grojze bere se na prst, na prst i samo lako, umiljato, pritisneš, senja pravi, u jenen hipu zlete mali mravi, vjeverica nan se u brk smihlja, jorgovan u korti diši, to ti je na tač, viče otac, mati ga ne more kapiti, stila bi i ona ča novega na brkunu viti ma je vištu zgubila, a dica, sve s prston tapkaju i stišću,

ni škola njin neče rabiti, nova je to ljudi moda, na tač se namurala lipa Roda, mlade znesla na dimljaku kako nika dama, za ležati i igrati ni tribala ni slama, aj ti svite munjeni i slipi, ča si ud sebe učinija, pukla je na nebu strila, na tač, samo na tač, je barba Tone zasvirija....

REKLA MI JE MATI rekla mi je, prez besid, govorila samo smihon i besidon ka liči, rekla mi je sve na svitu, puštila hartu na koj je senjana ura od sriče, provivan je naj, forši i tornan se, u dane ljubavi, na kavadanje kadi su resle šparužine, pensan kako dani gredu nazad, ma mati se javlja, kaživa mi put samo za naprid, čestu ka drito pasiva mrež libron teplih verši, zvoni na kraj sela , niki je dušu puštija, pak ča, ni se pomolija, ja mu ne zamirin, čovik je po svoju živija, sluša srce, tica dušu ka ne finjiva goriti, ja slušan materine beside, tako smo blizu, a jopet daleko, ne smin je viti kako pati, 22

vako mi je laglje, peren si obraz katrkad, znan Oni sve prati, ča zgor nas sidi, ni me strah, ni me rigvardo aš ja san anke materino dite, drugašlje, trdo, žilavo ma ljudi to znaju, pak i ko ne, ne rabi delati smutnju, aš i ja san kako bi rekla moja draga mati samo žena od mesa i krvi....

CRLENI I PLAVI pijen kafe, ništo me srce zebe, i daž se stresa, pensan zašto, poradi česa odvajk se karaju, kukaju, biže pak jopet molivaju, crleni i plavi, ne kape, niš oni ne kape, da život triba znati, da je samo đogo za igrati, da se samo dica u hladu vole kolembati... ma ne, triba grotu uzejti pak hiti priko plota, lipše je mesti šporkicu z tujega korta, brižna je naša mati, gran njoj je teško, aš svi su njena dica, ležali u njenoj trobi i plavi i crleni, a sad se karaju, urtaju, jeni po drugih peštaju, mirakul delaju, na une male, krstijane njanke malo ne pensaju, kako da je puška u nje hitla, kako da hi je strila u glavu pogodila, roge si kažu, škulju jeni drugin delaju,zabili su forši da grdu kvadru naše lipe zemlje delaju.... 24

VRGANJ uvega hipa, slušajuči štupidece od politike kurbe, domislih se na vrganj ki sad nidi spi, ki drugo nima svoje brazde ni postelje, kega je gospodar zdavna ukopuna, a krave na lišo pasale prez jarma i kambi, vrganj se posramija aš čuda je parti učinija, crlenicu zemlju plodnu zrahlja, i dušu od straha zličija... ma ni mu spomena ni u libri, ni u kvadri, kako da živ je propa u onu pravu brazdu, čovik, blago, korist, partenca, svit koloran, zbaštardan, munjen, šenica se na zrna broji, niki hlib z kafelon prontiva i šempijiva.....

ZA STO LIT ni mesa, ni kosti, ni besid, lipih , ni jutra ni dana, ni paše za blago.... za sto lit pasati če smih, ni spomena od krstijana neče bit... zatrti če se grote, njive i kunfini, samo če oblak bili ustati na stini..... ni mene biti neče, forši najden zase kantunič lipšega postojanja, jušto za sto lit umriti če svaka moja sanja.....

NIŠ od hipi, života i vrimena, od puti, štrik i zdravega, niš drugo čovik dobrega ne more naj, viti, provati pak samo zase na uru imati... niš ni za pod kušinon zibati, ni u komodi skrivati, niš na ten porken svitu drugo ni za zakantati, za intrati u krilu cuncati, kemu se spovidati, u ku hartu senje pisati, kad ingorde beštije sve su zatrle, pojile, kad sunce je osušilo spod škurih daždenih kotul, ma niš nedan drugo nima za počakulati, pod tratoju spraviti, zaherili su kantuni junačkega vrimena, umisto armonike i svati, nidan ninemu ni kapac za regalo dati.....

SE DOŠULJALA pomalo, na šegavo, kako samo ona to zna i umi, z prvin danin smokvenjaka, miseca kad zahladi more, arija po koži prosme zdrhe, daž lomi nebo i oblaki črni hitaju šajete, jesen, je pokucala, pozdravila sela i grade, pokle suše grde, tepline i pota, forši se ča, refa, gremo dalje, reče krstijan....

REŠO još dan danas iman srid oči, njega, rešola na struju kega je baba takivala samo za vrlu silu, kuhala na njemu kafe i kamamilu, u zimi kad svraka je na smokvi navištala snig, rešo je doperan bija, čistili smo ga i kako regalo čuvali, š njin smo samo za fešte kuhali, ritko ki u selu je za takovo čudo zna, rešo samo je jenu ploču ima, ka unešto se teplila prije nego je čaj na njoj zakuha.....

POSTELJA tepla i meka je moja postelja u njoj ne spin samo sanjan prez težine škribuljan, lancunon bilin se pokrivan, z rameni svit nad sobon držin, iman je, nju, moju postelju, z paljaricon umisto štramca, začavlanu z verši mojega jezika, njušin je i prepoznan na daleko, uganan jušto kada rabi, kušin se fuze, stija bi h meni u krilo, š njin se tako lipo igran, moja, samo moja postelja, zbandenicon od bosilja i smilja, friška kada lito kaplje teplinu nebeskega roda, postelja, vajka regulana, kalvarturon narakamana, u kamari mojega života zakručana....

SVAKO JUTRO budin se friška z tobun pensiri mi blište, govorin potiho, pensan nate, iman te sobun, svako jutro umočin biškot u kafe, jedan kuščić šaljen daleko, domišljan se te večeri prve, dana kad letila san u nebo, tica si me cilu, ustala san jaka, ni dren mi ravan ni, sad je sve na meni, lako dižen se snami si u svaken korku, pišen letere z usnicami ke šapču mi ništo teplo, gorin od vognja tvoga tila, hladi me vitar šalješ mi 31

oÄ?i valje tamo z dalekih puti, jutro biĹži u dan, sriÄ?na san....

MOJE SVE gledan te Istro moja, kako budiš se pri krajau lita, slušan čovika zdaleka kako zate pita.... para mi se da zavajk čemo držati se skupa, gladiti si tilo, ja i Ti, moja draga stara..... kamo da se ubrnen, vajk na pameti Te iman, tvoje baladure i kažune, hiže stare i najčistije ud platna lancune.....

..........

ŽMARENI ŠTAJUN sve ja kapin, razumin, ubahivan kraj i jopet vreda čepan se na prvu, žmareni lancun zablidija od nikih ur ča kanbijale su štajun, rivala nisan noge umočiti, lase utočati, zobljen bobice ča restu u Božiču, švičen, čuju me samo oni priko vrati, lastavice biže aš da njin je napro zima, meni teplo, poli čela grda je sparina, koltrine potežen, neka škuro bude, svit u kolu naprid po, nazad ne zna se broja, mriže ne lovidu kaj nikad, ribe ubrnule glave, uvenule na suncu misečnice plave, trabakul zglumičan, od jada i muke, timun se drugo ne luštri, sprstičan je od jauka, more krvavi se, a ni mu ime Crveno, jopet, ma jopet dragi ljudi, mladosti moja, jopet se torniva žica ka boli, prozebene hiže prez kruha i vode, Učka žmiri,čakulati po starinski ki zna ko li smi, 34

z palicami tiraju regulu u selo, blago, milo gleda, šterna zgubila pokrovac, u šiču ni vode, dažd zakračuna se u kantun, Bog se napro inkanta, i Njemu je pukla kadina, podmazati je nima ki....

PREKRGANO sve se jopet inkacalo, ništo zgorun, drugo zdolun, prekrgan je svit, škovace na svaken kantunu, breki i mački drugo nisu na prven mistu, para mi se da ni čovik ne pensa čuda nase, prez volje, kosti bole, štajun teplega se nikako hladi, biži, jopet tornati če se pensiri ki kodičkaju suze, tako je to u životu, niš namiščeno, ma jopet ni kako bimo stili.....

NIŠ MI NE RABI ma je došlo niko vrime prokljeto sime, kad niš mi ne rabi , u butigu pojti, šolde špendivati aš hi za pravo reči niman i neču ni nikad drugo imati.... pak jušto zato ne gren vanka zhiže, ne razbijan si drugo glavu ča iman, ča mi fali, pastoli su vajka uni stari ustali, mudante, po hiži moren i prez njih, nidan me u četiri zida više ne gleda, za zdravlje ne pita,pasala su moja mlada lita... sada moren i prez prefuma i za usta rožete, ne triban više svaki dan kanbijivati ričipete, došlo je za me niko črno vrime kad šoldi me ne štimaju ter samo za blago imaju....

NIŽU SE kao biserje, kupine još nedozrele i oblaci što kišom govore, nižu se u tragovima ljeta što odlazi, misli jednog ljeta ranjivog, kad njihala sam bokovima, usrećena tvojim pogledima... kao talasi egzotične rijeke što nižu se prostirući postelju prašume, nižu se svjetovi moga zbiljskog JA, tražeći sebi utočište i bijeg od svakog neozbiljnog susreta, lažnog pogleda.... i nastaje tako usred istinite poljane, ogrlica stihova posvećenih tebi, blagoslovljene od Svevišnjega, isprane mojim slanim suzama, odjednom ...u hipu raspao se niz...nestalo je svakog našeg osmjeha......

CVIT gledan ga zmilega moj cvit ki reste tamo daleko ma jopet blizu, cvit finega kolora, ki cvita samo zame, u hipe kad na srcu mi težina leži, u oku suza stoji.... cvit, mali, ma zadaje, ma se zdalekega vidi, diže svoju finu glavicu, pak me škaklje, po obrazu tiče, bili cvit crlenih kolori, u vrtlu tamo zad zida, reste prez vode i sunca, on je senja samo mojega življenja.....

DA MOREN BIT svako toliko, se skrijen u moju postelju od sanji i perja načinjenu, meku, teplu, kad rabi da me malo rasfriška, pensan gledan, kako bin volila biti ništo malo i još manje, drugašlje, lako kako zrno zlata žvelto kako muha, da biti moren riga na kraju svita, farfalla z žutima krili, da moren biti trumbeta, zatišvana bin bila i kako organić na fešti mladega vina. kap dobrega ulja na pijatu sriče... aj moj dragi Bože, da znaš samo, koliko pensiri po glavi se vrti, želju iman ma ne more mi bit, ne smin pod zemlju poj, triban za dicu živit, ču provati, uplesti još samo jenu kosu od bilih lasi, ka če dati mi volje i kuraja, ka če držati me za ruku, da dočkan ni malo ni čud da tečen spod neba i unega hipa, se kanbijan. da lipota moja u njigoven oku zaigra...zaiskra..... 40

DIŠI grojze zove, čujen srce kako tuče, dan se budi, diše kaplje rose na kavadanji mojega ditinjstva, lovnice su pronte, valje če vrime stirati nas u hiže, pozabiti ču škatule plišnjivih botuni, glava ni da boli, slušati ču zdisaj jutra i kreket žabljega plesa, sidin, zbudila se rano, kanbijiva se štajun od fešte i kanti, u điru su nike drugašlje rubine, nuka mi je sve na svitu, ona me liči, slušan je kako z rukami čakula, vreda reste, škalete prazne se, mladost partila je đardin mojega sanja požutija od suna i sparine, ma ja stešo njušin ono lipo ča vajk ustane samo za moj žep, 41

trudno je i to moje delo, forši san žbaljala, se škuživan bože, na spovid mi ne rabi, sve če pojti u prah mojega postojanja....

ZAPRTA vrata od teze, od hiže, prtun pojilo je vrime, korta zareštena, užina pojidena, mačak samo lino ziše, ni ga volja uloviti miša, brek je partija na niko drugo misto aš ode više ni življenja, kruha ni kante, grdo za vidit, teško propensati, ma je tako, zaresla je i boška, ne moren korka učiniti, kako dalje, plače nebo, zdrhi se naziru, pitan se ma je li to ono moje selo, ono misto od nikad ko podojilo me lipin hipi, ko češljalo mi kose i kolembalo u krilu... zgubljeno tilo...patin.....

KA URA ka je ura, ki još ima volje i poštenja, ki se drži beside, ma ki spi na postelji od perja, kaliva glavu na kušin narakamani.... kadi su ure, one štabele, ča jušto kaživaju, ča ne lažu, ča ne šempijivaju, ča zvone kad podne je, ča dižu čovika zlakin tiron....kadi...kadi su te ure...moren hi iskati, moren li hi najti zase samo imati, moren u hipu ljubiti, boga šnjima moliti, u crikvu hoditi kako šinjorina kako dite diteta moren li, ču li jopet poli date leči, i povidati da nikad san bila srična i puna nike drugašlje lipote ka je ličila , ka je snami po putu hodila, pak jopet zapiren se 44

u hižu, ne želin ninega čuti ni viti...pitan se samu "Ma ka je ta prokleta teška, lažljiva ura".....

SVE KAPIN ne rabi čuda, sve kapin, u svitu prižentan je največi kažin, zgorun i zdolun fuzu se škarpine, vonja arija, ne veruj drugo ninemu, kako da rečen lipo mi gre, kako da pozdravin za laku noč, cipan se znutra, ne štiman regule ke to nisu, pokrijen oči, ma to drugo neka se na vitru vijola, ni više Boga, vrag nas je rovina, sve, kapin i niš drugo ne trpin, joče mi se, plače još i više, strah me štiplje, u gutu suša, joh, i jopet joh, sused me je na česti puštija, utac uslipija, mater gobasta od hipa do hipa, zlila se z korita rika, mačke su prez glasa ustale, breki sve kape, špuntivaju nas grdo, odzgor i zdol, prah samo ustaje, i vijolica u šušnju grdo zadaje.... 46

ZVIRI I BEŠTIJE (za sve one umrle i ranjene u ŠpanjI) jopet, umisto fala, spensivaju se učiniti zlo, njin je to kako reči dobro jutro, ma kadi su rojeni, kadi zgojeni, ne moren promisliti da još je takovih beštij u svitu, bombe, mitralje, krv, sve je to niš zanje aš oni nisu zaslužili zajti z materine posteljice, nisu smili pogledati u nebo, čuti kantu tiči, oni su ništo prez imena, oni su glog u intradi, oni valjaju ruke ne znajuč za ča, za kega, zviri imberlane, balave i štorte, ubijati znaju, a reči fala hi je sran....

J JENA SMOKVA ki če znati koliko ima lit, to je smokva moje matere, baba je zapretala u trdu zemlju, a smokva furba, šerija, ni se puštila kapiti da je žedna, trpila je zimu, u liti si je hlad učinila, kad plod je hitila, svi su samo nanju hlapili aš drugašljih je bila kolori, gušte je kanbijivala, poli zida se stiskala, sama sobun kušeljala i resla kako pricipeša, grane stezala u susedovu kortu, nidan je ni zna fermati, a ona je vikala "krepati, ma ne molati"...

GRIŽAV VITAR težina, stišnjena koža, riga na hrbatu razlivena napro , zdrobljene grote, ne znan njušiti drugo vijolicu u graži, raštele na brkunu, ne moren ne rivan sunce u zoru gledati kako se rađa i porađa, dojde tako, nika škurina, prez meke kore naranče, guši niki grižav vitar, usnice stišnjene, blago gleda u tezi na milo, aš nima ga ki, zub zgorenega vrha čeka daž, gren jopet u moj i samo moj kus dana, tamo kadi sve je rajskon vodon poškropljeno, prst kaže put ki je samo zame Bog uzdavno načinija....

PITAJ ME ma pitaj me, samo pitaj, jutrom osvjetlilo me nebo, sunce saveznik u nutrini, pitaj me čovječe i ti dijete još nedozrelo, što te gazi u godinama djetinjastih strasti, gdje zapinju putevi, o svemu obrati se meni, danas ne napušta me snaga, vijuge rade sto na sat, čujem, slušam, pišem, ruka giba se, prsti crtaju, sva su pitanja ovog trena u opciji, a odgovore naći ćeš u smiraju, u uvali zelenog mora, na dnu kovčega zvanog SPOMENAR, otvorenog sam srca, podignutog jedra...zna se ponoviti, i uvijek ću odgovoriti, samo traži, potraži me u odajama mojih tajni....

ŠUMPREŠANI šumprešani pensiri, napro dalekih vrimeni, stegnjeni i prefumani, mojima prsti milovani, tendeni kako malo dite, nikad pozabljeni, svako toliko na zrak zvađeni da domisle me na slatke čerišnje, stari voz pun sena na ken san se peljala, od dragosti smijala, sve ono lipo piturano, upatinano,zahičeno i zabljeno, u jenen danu spod šumpreša, pasano, stegnjeno, pak spod teplega kušina očuvano.....

DIJETE U MENI drži se čvrsto za moje krilo, traži ruku i zagrljaj mek, ne znam mu ime, prezime zagubljeno u godinama odrastanja, dječarac mlječnih zubića, nepokvaren, iskren, voli me poput najboljeg komadića čokoladne torte, čini me drugačijom, umiruje u meni duh nemira, usnama ljubim čelo tog mog junaka, razumijemo se kao da vršnjački smo duo, a nismo, nismo, ni blizu, godine idu u dva pravca, to maleno nevino čeljade, svakog puta namami me da zapjevam s njime, pušem svjećice na torti, reći će zlonamjernici da razmažena sam možda, ne nisam, moja jedina šansa da povratim izgubljeni ponos, rodila se u djetešcu plave kose i očiju boje neba......

PAR DAN samo još kakov dan i noč kad umisto sna gledala san u zvizde, u glavi pensiri trepali, kako da su se đogali, oči teške, tilo zmučeno, teplina pasala je normalu, ne rabi lancun, i kušin rove aš glava ga inkaciva, ne moren, ne znan drugo kako, stila bin jopet peteha zjutra čepati dokle zove, susedova mačka ziše rastegnuta poli zida u korti, brojin ure do po angušta, napro znan da zapuhati če friška arija i raščarati sparinu, nasmijati se jutru i popeljati nas na njivu zlatnega kolvartura....

LIPOTA hodila san pomalo, korki fermivali se u švaltu, teplina ne laškiva, na glavi šiljar, na usti smih, pensan na niko vrime ud nikad, na srcu kanta u duši pina mora, a česte po kih se peljen domišljaju na ontar, na moju mladost, ljudi su vajk u hodu, jutro s kafelon, rožice na suncu restu, ne porta njin šufigaco, vitura migolji, poteže, u tih misti nisan nikad još bila, ma znan hi, ćutin kako zdišu, laku noč do sutra...

MOLITVA ča reči da ne ufendin Boga, samo zmoliti Očenaš na uvi Dan, za krv prolivenu, živote zgubljene, dicu ka ustala su prez oci i matere, a čuda je takovih, pensiri se mišaju kako glog u travi, sunce peče, ne rabi drugo soli na rane, vijola se bandira naše lipe danas tamo na visokoj stini, oči se stišču pak suza se skala, trjen je z rukon ka boli, boli aprsti teški, lita svoje delaju, nideri krščenega duha, ma kako je samo tiho, a znan, virujen trdo da zbuditi če se mlado i staro u hipu kad teplina zamre i sunce se skala, zagrmiti če kanta i kaluni, preletiti če galeb zgor hiž ke nikle su na paležini aš čovik je kapac, čovik sve potrpi, z krunicon u žepu, oko guta, molitva more jopet uzdraviti, refati, uživiti......

VOLILA BIN da si živa, da te gledan, da te iman kad zatriba, da na smih hitiš moje tuge, volila bin te gledati kako po hiži se vrtiš, i ljubav mi svoju diliš..... ma kako da te zbudin kad za svin si oči uzdavna zaprla, da ja san vajka tvoja lipo si mi rekla, sad su samo niki hipi kad u anguštu skupa smo se štimale i rođendane imale, bonboniće u butigi na deke kupovale, za čuda bolje nismo znale, ne brojin lita, pozabila san nike šetimente ma tebe tvoj kuraj, tvoje duge sure lase, i kotulu črnu na botune spravila san u jedan kantun... tamo kadi si ti...vajka živa, mlada, žvelta, srčana i najdražega imena....

ZLAMENJE ma je zlamenje na ten našen svitu, svaki po svoju tira, zatrla se u plotu vira, veliki prez pameti pametuju, mali i slabi vajk po isten peštaju, precije u nebo lete, vitar niki tepli čestu mete, u mižolu jena muha reži, dani u litu sve su teži, Boga ča pitati, lačnen kruh u ruke dati, nikad prije tako ni bilo, forši nan se tako sad i stilo, zlamenje na kantunu se skrilo...

SUŠA na jeziku, u zemlji, na čoviku i blagu, prah u oči, tilo pati, suša grabi, nosi sve pred sobon, nideri nenega, šterne zišu, uzdiše mi duša, zjutra budin se kako kalotina lanjske zime, suša grize, trava polegla u niš se stegla, baladuri muče, grota na suncu peče, bosa iščen kaplju njigove kože, liči me, kaliva febru, ne rabi mi šiljar, prez niš po hiži tičen kus hlada, grad trpi, selo škuca, mora se zdurati....

SPIN žega vani, suhi ploti, polegla trava, tiho je samo čvrčki ne daju mira, kantaju prez da molaju, a ja, bi reči kako da spin z doprtima oči, pot se cidi, slabinja, čekan sutra, oblačina ud zdol, pensan da prontiva se pljuhada, neka rasfriška, neka digne moje pensire da verši moru teči.....

NIMAN SRIČE niman, forši je nikad nis ni imala, sriča ud mene biži, hipi smiha i zvizd skrivaju se zad miseca i zvizd, pensan da srce je na štorten kraju, pogledivan u nebo, Bog spi, po njigovu sve je jušto, para mi se ni, grusti mi se rano ustati, kosti line, hrbat boli, glava štorniva, kemu da tugu povin, boli...boli...rožičin cvit samo za me njuši, vrime za vraton, u škudeli mliko skiseljeno, bižin, smrdi, volja mi gre da tornan se samo na uru, dvi, u bošku, da hitin se u hlad spod liske, munjeni diškorši, a ja šerija kako Marija svetica, sriča...ča je to?

DEKLA rodila se je kako dekla, na paljarici spala, z traveršon se budila, svoju pamet imala, prez oca i matere rano ustala, sriču življenja po selu iskala, malega tila, a srca velikega, zlamenja na ten grden svitu, usnice zaprte ma su stešo govorile, za deklu se susede u crikvi molile, ona je čurila samo u svoj korak, pasti ni smila, vajk je delati umila, tu i tamo se suncu potužila da laglje znoči glavu na kušinu more imati, pak jopet sutra robu na ruke uprati, prdljašče pomesti, krave pomusti, kokošan dati zobati....takova je dekla bila, križ na sebi peljala i najzad svoje ime u zemlju zapretala...

ZLIVENO JUTRO lipo mi stoji kako zliveno, pokle čuda vrimena, sanji su mi bili bili, puni force, pensan da se torniva zgubljeno, dopiren pomalo oči i gledan na zidu kvadre, u glavi se motaju beside, to je več svitli senja, tučan moj biškot u kafe, na vrhu figura ud pine, sigura san ki je, šperanca se torniva, niki zvoni, eko me, zajno, pronta san....

ČA JE TO brojin vrlih put sama sobun, zazebe me kad srce hiti se u dane mladosti moje, lipe i drage, sad su lita naprtila se na hrbat, i ništo slabije vidin, ma i kad vidin se štupin aš drugo niš ne kapin: ča je twit, influencer i bit, ča je bon i megabon, ma je li živ u džungli slon, ča je fejs, gre li pokle pet forši šest, munjena san više, nisan bona, a samo mi se kiše, dica ne badaju školu, još kako mali slušaju Jolu partijati navrh mora, to je došla neka nova fora, forši ja ne kapin, forši niš ne razumin, svit gre naprid kako strila, srična san kako minja bila...

BAŠ ME BRIGA ča je lito i gori, ča sviti sunce i piri, boli me briga za sve poraze i loše igre, u hiži san zaprta van mi se ne gre, briga me za Bebića i Šeksa, fućka mi se za lajkove i malo seksa, vrgla san si priko lica očale črne za užinu vero mi je dosta MINI PIZZA....

PITALA SAN pitala san sriču kadi si rojena, pred koliko lit, ko su ti mater i utac, imaš li forši brata, sestru, dica su naresla, si hi otpravila u svit, gori poli tebe još vajk ona vošćenica ka tepli, ka čovika razumi, pitala san, skušala, čuda tega stila znat, mrvu lipljega hipa zase sad imat....

FORCA iščen je, svakega dana i kus noči, pitan zanju čuka na deblu, zvizde na žetvenjačken nebu, šečen sama sobun, vajk po jenih korki, štupin se, ni to svit kega želin, nisu to vali od lita, ne zadaje ona lipa arija, zvrnen se u postelju, teško mi se oči zapru, pensan, force nikako ni kaj nikad, tilo se zbaštardalo, trava reste kako zvode, ni kega za je pokositi, krstijan ne zna drugo grablje držati, umisto njih se navadija zmižolon bire nazdravljati, njemu ne portaju zaresle korune, bili, prašnjavi puti, on ne vidi, on ne gleda kune sebe, z guzicon vrti i ko čepa kakov šoldin, vred po španjulete i bičerin.....

PRSTI oni su vajka prvi, govore, slušaju, se i karaju kad zagusti, svaki zase Boga moli ma kad su svi na broju ni he strah od ničesa, jaki su, force puni, delaju sve na svitu i ča valja i ča se nebi smilo, njin je jušto svejeno, gredu po svoju naprid, kad njin je teplo, se lipo obuču, a sunce kad užgije, hite sebe bičve i pituraju se u kolore drugašlje, moderne, ne samo crlene...črna njin je napro hit, Oooo, lipi moji, črlinkuši, prstići, prsti, forši i prstini, samo se vi hladite, igrajte, pišite i plešite aš život je samo jedan, a vas je dvajset po rojenju u libar zapišeno....

VIŠE HI JE čuda, jako čuda po mojoj glavi se roje, pak na ariju biže, pensiri od nikad, pensiri lipote na murvi počinjeni, pak jopet u nebo kako z fjonde hičeni, ne gren za njima, niman više force, steši se nanje domislin kad slušan za podne čvrčka, kad vidin galeba na večeri od mora, napro dopren oči, ujde mi smih, se počešen po lasi, a oni, kako bisni jopet naprid lete, spod ladonje najdu hlada, fermivaju mlade divojke, pitaju zvonara ki je poša z tega svita, meni se pod kotulu skriju kad zapuše južinasti vitar, kuco stoje ontar, kako inkolani čentrin na brkunu hiže ka još ima kus življenja samo u škatuli na vrh starega armarona....

BIGULA štufa i preštufa aš po njoj peštaju, od svih pašti, samo zanju znaju, mišaju je i prekidaju, a ona brižna trpi, muči, stišče zube i kad se molivaju, prez zdiha, z malo šoldi u žepu, gola, prez piture, a da najbolja od svih je, zajno njoj govore....

PEČE jako, priko cilega, kako stara kopriva peče, strže znutra, boli zvanka, ne jočen, neka zna, jaka san kako stina, vrime zame dela, galebi mi plešu, vali vrišču, kamičići kanbijivaju obraz, gren sve tanja ma na šekreto se molin, ne ujde mi z oka, finili smo, stešo bilo nan je kako upletena kosa, sad drugašlji su skosi, ma umiti ču poj jopet zgorun, iskati sriču i mig oka ki me voli, šlape hitla san u voganj, veživale su me za njigove korke, nihi više, ustala je samo jena riga na kuščiću blide harte..... 70

KAD ČU JA delati kad mi dojde, pisati kad sunce zapade a teplina pojde spati, u špaš pomalo, na glavu šiljar, očale črne da me glava manje boli, smih na usta, korak po korak kako zvidašeni teran, slušati kantu istrijanskega tiča... kad ču ja ontar kad svi ti drugi zamuče.....

SLANO slano i preslano, sve bili se ud soli, svakin danom sve slanije, ljudi, zviri i beštije, navada je pasala sve regule, spensivamo se čudesa, delamo štupidece, arija puna kako čep, česte samo naškuljane, smokva osušila, nima je ki imati, samo je za brati, prepuštena vrimenu i daždu, čovik zgubija pacijencu, jezik razvežen u hiži Boga, grihi sve više, peče jezik pravica če rivati kad ne budemo pensali, je li mene strah, nisan se još prontala, samo san svitu najbolje ud sebe dala, a slano jopet hita na videlo, ni fari čud se pojidati

DANAS CRLENO sve mi je danas u crlenen koloru, i srce i sve u njemu, i tilo i svaki na njen kantun, crleni oblaki i more, grana na kunfinu, perje u kušinu, crleni su moji pastoli, beside, verši i kante, tepli me crleno sunce, čovik priko puta, crlene korale oko guta mečen i garoful u važiću crleni zadaje, stila bin da tako mi se crleno sprid oči dela svaki mili dan, kako da san, vela gospa ontar pensan.....

UMIDNA sunce gori, žetvenjak se javlja, umrižani pensiri, ma tebe ni, duša umidna, pensan daleko, blizu san uzdavna pasala, beren kupine.. nisu uzdrijale, ma moja usta niš ne kape, vitrić na žici se fermiva, stija bi me poškušati, ko zatriba, medežiju dati, kotulu popravljan, kantrida se fuze, biže beside, fali mi kanta armonika neče drugo, se ništo grdo zasramila, ne pitan, vraga ne iščen, spod vrata cidi se kaplja, ne znan njoj napro ime, umidno je danas umidno od tuginje moje rojeno ime....

A SELO SPI.... štajun kad miruje zemlja, zjutra samo tiči kantaju, noč je pozornica za čuka kemu se ne spi, teplina litnjega dana, uzima svaki pedalj kuraja, tila skršena, kinin ne pomore, škole zaprle vrata, ma dica u svoj niki drugi brlog biže, misečina srca za spravlje takiva, a sunce danu ne da mira, spi, selo, blago na milo gleda, oči se zapiru, korte usnažene, njive poberene, još klas šenice na šufit posložiti, i tu užancu triba učiniti....

LITNJI KAMPANEL ni zabija, jušto se domislija na vrime zazvonija, lito na našen meridijanu navistija... arija je živnula, voda u moru pomalo se tepli, pot po čelu težaka fermiva se u hladu stare murve, kantride pronte, još je samo šenica za požeti, zlati se i šuška, prepelice u njoj našle su tantinić za počinuti, cvrćki jopet kantaju po svojen, čuje se za večernju na vrhu kampanel

POJDI pojdi pojdi kamo te vitar pelja, uzmi sebe i još kega i hodi tamo kadi nebo crta oblake i jutro, ne gledaj na uru, ne slušaj svakega, pastole lakih poplati obuj i poteči, na oni kraj ki zeleni se u sliki Učke, rucak na hrbat, palicu u ruku i samo teči, smij se i kantaj, drži misec poli kraj, ma kad čuješ švik ne laškaj, samo korak kanbijaj i dojdi na misto kega zovu zemaljski raj.....

NA TAK pastole na tak, ne nosin, ne kupujen, za njih ne badan, aš ne znan hoditi na visoko, nabožena na tak, prez malo pameti, lelan se, u glavi se vrti, po noči slabo spi, nikad pastoli na tak, ni črni ni bili, ni oni piturani na lak nisu mi zdolun pasali, ne baciljan, ne znan, iman samo jene nove spod batića, u armaronu za belveder stoje, forši kega čekaju da i njih dotakne sriča....

NEMIR sve se u klupko strlo, zbudilo se spod zemlje, zgor šušnja, z visoka kantaju, na pinu čuče, zuje po danu, i po noči se he čuje, delaju faštidiju ma meni je šnjima, liplje na duši, lito je na vrati, kuka ko more naprid, trava zgojena kako u avrilu, ma je valje žetvenjak....

KADINA ŽIVOTA ni od zlata, ni od srebra ni, regalana mi je pred čuda lit, pak neka se šnjon snajden kako znan i umin, nosin je oko vrata, kad teško mi bude, prehitin priko hrbata, a najsričnija san kad za noči pospanjive šnjon počakulan, kadina je to upletena od grančic ružmarina, javora i pelina, poškropljena z odori tamjana i smilja, štupe njoj se kako je lipa, ma ne znaju koliko kušta, koliko vridi, to je kolana prez imena, a velikega znamenja, znala se je slomiti pod brimenom života i teških korki, čekala da je pokrpan i jopet nosin, da je bukivan i kokolivan, voli me ona, i ja nju, trpimo se kad cidi se zemlja od pota i šporkih besid i jopet restemo do mista s kega vidi se more, arija razmeče nabrkljane oblake, to je ona, kadina i bokun mojega života....

TEPLO tepla večer pokle dana, tepla grota, šterna i zid, i verši meki i tepli našli se na kupu i povidali niku štoriju, tepla je ruka jenega starega prijateljstva, srce zadaaje na ščapun, lastaviči zlegli se i škrče, štajun je za nike lipe stvari, kuntenti smo večeras ljudi, misec se puni, gleda nas i sluša z visokega, milina znutra, zdrhi zvanka, tako je to vajka kad dopre se libar istrijanskega jezika, a uzanj zasvire mih i roženica.... .........

SPODOBA grdo san ništo nočas sanjala, samo šnjin san čakulu imala, letili su pijati, beside gubile zdravi razum, spodoba je to ma san kasno kapila, najprije san se dobro po srcu udrila pak pokle mrvu sebe urazumila...

ČERA bilo je čera, danas ga više ni, gledan sutra, se šperan, uvega hipa, teplo mi je srce, lito je prid vratin, moren ga početi u šenj metati, sama kako čera, ma san sebi obečala, ču mučati, neka tiči me kudičkaju, i trava tiče za ubraz, siditi ču u hladu, Bog mi samo viru daje, usta pitaju žljuk vode, oči bude se i plešu...to je moj put, moja staza, moj križ, drugašlji od drugih, a tako lip, ne znan da mater me navadila mahnuti jutru, željna san noge uprati u pličini moga mora....

SLAK sad je njigovo vrime, kako mati kad na svit donese svoje dite, slak se ukaže kako Gospa na suncu, hiti cvit, zadaje, ma kako mi je jušto uvega hipa pa na pamet, a tako je lip, kad proklije, pak polja i njive prekrije i kako ljudi kaživaju je to trava, otrov, ili lipota na svitu, najbolje mliko za ozdraviti, meni lik za verše u libar i za dušu mir... ...........

ŠEGAVA ma ča govorin, ta je žena prepredena i još bolje šegava, bulpina ni njoj do kolina, sve ča ima u njidra skriva, muči i vajk ništo prontiva, mala ma velikih pastoli, na mučeć po selu hodi, bere sve ča najde, u zlatnu jesen pohodi brajde, na proliče u boški viče, študija delati sve ča rabi i ni po triba, šegava je ona i u hip spod vode ujde, mira nikad nima, preteljica njoj je u moru riba....

PAK ČA..... iman novo auto i modri šiljar, kupila san si šandale i maju za dvajset kun, i da ne zabin nov mi je i takujin prez šoldi, brkuni moderni vred če biti gori, pometena je korta, pokošena u vrtlu trava, sve je valje novo, samo san ja stara, meni za sve to jušto je ravno, ustala san mala kako i prije, bukiti ču pretelja zdaleka, pensati ča je svitu grdo PAK ČA....

PARAT ležin, ovega jutra daždenega i škifega, lina za se dignuti pak čuda mi se tega po glavi zamrižalo, domišljan se na lita ka nikad se drugo neče tornati, kad i za me vajk je nidi usta parat sriče, skriven u bigi kruha spod čeripnje, na gumnu kadi se je seno sušilo, čekale su me krvave jagodice u boški aš su znale koliko bin šoldi zanje dala, ni me bilo strah da če me u škuro kakova živina, inšoma di god san glavu ubrnula mogla san uzej kus lipote dana, večeri i jutra, parat neba i zemlje znami je komedija pak i srce je moje napro reslo, njidra nadimala, kuntenta san hojevala kamo san stila i umila... ma to prokljeto danas...zija u prazno

LITRAT na zidu, požutija, litrat ga nagrizla, i mufa se po njemu fuze, gledan ga na milo, domišljan svake kaplje pota, truda, ma i onih lipljih hipi, pensan ča mi je učiniti, je li mi dosta jena valiđa, da u nju vržen samo par kapljic mlade rose, panke za laglje hoditi, želin biti sama, nenega ne čuti kune tiće na grani murve, gren zdolun, po štriki, ni me strah aš makina fermana je na štacijonu, noć mladega miseca, forcu daje mi seno pokošeno, brnistra ča žuti se i smilje u polju, litratana sam, cila, srce tuče, adio krstijani, ja san sad nika druga miljenica Boga...

KUNFIN kadi je, kamo se skrija, je li živ, kunfin ki je od vajk drža trdo, ki je uzidan od sure stine i špinane žice, priko njega nikad nidan ni uša, blago lačno ubračalo je glavu, a porkačon grdi sve je zase uzeja, intrada u njen resla kako munjena, šenica zlatna zrna davala, trukinja po zrlin klasi zadavala, čerišnja na krasi zavajk je puna bob bila, a dica su prez bob ustala i se rabijala, jušto sve je priko kunfina hitalo, reslo, njušilo na divlje jagodice i seno, a gospodar nikad glavu pokaza, selo se je štupilo i niš drugo ni znalo samo je u žmanji rišpet za zabotunani kunfin imalo...

KUŠELJAJ kanta tiči hitla me z postelje, usnice trepe, vreda pensan, verši gredu, škoda hi zgubiti... ča je to sagutra da ljako mi gre, sve ud ruke, molivaju se gropi, svaku malu ka zvanka se more čuti, takne mi uši, prsti sami šeču, pasa je i daž, maj zbrišiva ča bi reči da teplina čuči poli vrati, pina kafelu dela drugašlji odor, nisan se tako vred nadjala kanbijati liveja, ma neka, neka se smihlja ti štajun ščepuni, kali i bilega cvoča, vijolaju se na meni zvizde preteljice, smihon dižen napro glavu, dobro jutro dobri ljudi ko vas još kadi je....

ŠPERANCA velika je bila šperanca kad san u pastoliči od kurama po babinoj korti skakljala, na orihu se kolembala, murve ila za največe slatko imala, ontar je to tako bilo, jako sunce zgor nas svitlilo, mih i sopela na feštah svirili, balun se na baladuru plesa, čuda siromaščine, a malo mesa, pak potle toliko vrimena sve se na fuje zvrnulo, ni poznati ki je kriv za grda čudesa, krstijan z glavon u pastole žmiri, žmarena šperanca, dice sve manje samo jena boljihava muha po kužini se vrti...

ZDERENA kartulina, zderenih kantuni, prekinjenih pensiri, na njoj žena nagrišpanega ubraza, kolori zbliđeni, lita su svoje učinila, ni čuti ni joka, ni tiča da kanta, skonšumana je pađina po koj su nikad mladiči iskali divojku za uženiti, vrime garbo, nebo prez arije, na žici golub dršče, nima ga ki tepliti, zdereno ognjišće, škanjet i kantride,,, pusta moja mladost... nikad te ne moren zabiti... ubišena je borša fadig i šporkice...luna se još ni ubrnula...

BIŠKOT sladak od cukra, umišen od srca pomišan z ljubavljon babe ka počiva, biškot od muke trukinjeve, a u usti se topi, kafelu moči, žuti se od jaji domačih, dura od Vazma do Božiča, pokriven blagoslovon, u formi kolutiča, biškot poškropljen z kapljon misnega vina, mami kako najliplja rožica, tepa i mek, čuvan ga u šetimenti, utaži mi glad, sve mi je na svitu, kad oči zasuze, i usta zadršču..

KUS ŽIVLJENJA samo, kus ne cilega prije čuda lit vrga mi je Bog u moju malu ručicu, pogleda me u oči i nasmiha se, pensa je da rivati ču ga nositi prez suz, prez težine, računa je da san kapaca, štima se je aš san ti kuščič stiskala z prstići, mečala ga pod kušin da ne bi uša, ma vrime ni pitalo za brime, hrbat je popušta, zliza se, sutra je zgubilo se u prahu, noge teške hodile, ti drugi samo su me zvali i pitali, vajk njin ništo rabi, lazno san iskala z vošćenicon, prtun zaresa u baredi, življenje je ustalo nikako zahireno, para mi se da drugo je kasno za kanbijati, busola je drugašlja, ne trpi, kus moga života kako da samo u črno čuri.....

TEPLI VITAR puhlja, škaklja, lase vijola, faštidiju dela, vitar tepa, u ariji žutega cvita, lipa zadaje, duša reste, verši prontivaju veštit za špaš, sunce se u hipu kambijiva, čerišnje počele crleniti, kosci u veliken delu, brečić se od gušta igra, lipota u kantunu, vali se kolembaju, pina plete rakamani lancun.....

DOJDU HIPI znan, ne more vajk svitliti sunce, ni more hiti u bonacu, čuda san provala da te manore ne bih na pameti imala, pak u jenen hipu zapuše škura bura, digne prah na putu lipote, spoti mi se čelo, moran sisti, mižo force popiti, sama si kuraja dati, svit je debul i previše tanak, ča se more, ki zna, ki se fida koraknuti priko velike grote, pošli su tamo u drugi svit, svi ča su mi kantali i na uho šaputali, Bog hi je stija, mene na ledini puštija... ni krivu ni dužnu, snajti se maran, na dicu si propensan a ti drugi neka se snajdu ko ume...

BABINA SINGERICA nikad mi ni rekla kad je kupila singericu samo su njoj oči zasvitlile kad je sila poli danju, vrgla je u mot i ušila sebi traveršu, meni pupu ud starih krp, oni put je makina za šiti zahukala, zarompala pak je baba podmazala i jopet zavogala, sve dok šiti ni finila, svoju je singericu gladila i kad je mirovala, pokrivala da je prah ne takne, da igla ne ufalo zbode moj mali prst.. i tako lit i lit, čuvala je, šnjon se činila, svakemu u selu ništo lipo ušila i niš za plaču iskala, samo je svaki mili put, svu sebe u svoju singericu darovala....

SLUŽIN služin ti lipa moja zemljo, tiran ud Tebe beštije i smrad, ne rabi mi traverša, dosta mi je pamet, pogrbin se ko rabi, njušin svaku tvoju vlas, služin kako na oltaru plovan, meten z oči i z glavon, napro čuda štufa me u ariji škovacon, pak mira niman, iščen vodu blagoslovnega senjala, dopiren libar debelih koric, ni mi dosta, stila bin još, uluštrati glas, da jutri pojden po trukinje klas, služin, nikad se ne dan, služin vajk i ku ne maran....

GRACIJA visoka, nabožena u takte lakiranih pastoli, lasi nabokulani, padali do života, usnice nacrtane u crleno piturane, ruke bile kako materino mliko, zvali su je Gracija, Gracija Bojža, ma crikvu nikad ni rivala viti, njoj je dan pasa kako makina u minut, lipo je zadavala kad po česti je hodila, nikad se ni ženila ni dice imala, ma je muške u dišperiju hitala, z nogami stupala, šerija, katrkad se i posmihnula, ona, jedina u kraju vridnih ljudi, ča če sama sobun ni jušto nikad znala...

Z JENON RUKON pišen prez tinte, pensan prez pensiri, jena ruka, pet prsti, glava puna diškorši, oči trudne od škurine, teško na hrbatu življenja, ne slušan ninega, ne kapin ča se prontiva, svit se pomalo odmoliva, plače mati, na šufitu pauki, vriče naškuljane, šterna presušila, iščen drugu ruku, druge beside ke liče i naprid tiraju, kamo su pošle, zatrle se, nidan ne bada, samo se ja po noći budin i šturman, oli san šljutava,,, gren pomalo, aš podne je zazvonilo ter ga nis rivala čuti,,,bog moji ljudi z viron imajte kuraja...

100

LJUČKO sve je ljučko u ten svitu današnjega dana, ne zna se ime gospodara, takujin ne broji šolde, harta prazna aš ni ča lipega, nidan ne umi niš pametno vrči u kraj, kontrada zapuštena, išče se čovik ki zna orati, brajde delati, volju za sve imati, ljučke su rože u đardini, barkice u marini, škole prez maeštri, butiga u koj precije lete u nebo, niš drugo niman kazat, forši i postelja u koj spin ni zame kupljena, a kvadra od Divice zgor mene zabljena....

101

ČA JE TO uvih par dan konfužicijon na suncu, strile padaju u hladu, blago na milo gleda, nideri pravice ni reda, beštije laze kadi njin misto ni, rože smrde, hiže zabrdunane, kako da nas je strah stisa... ma pitan ja vas lipi moji državnici ča več uzdavna to niste, a forši nikad ni bili, nimate forši srama u tin vaših šupljih glavami, pensati i na nas ili samo u guzice svoje rivati od trukinje klas, niman force drugo vikati, strisati ni pljukati, samo ču na miru i dalje spati i šperan se da sunce če prosvitliti vaše kolorane oči, ni sada ni misto ni vrime od kradeži i moči....

102

NIŠ SIGURO u toj zemlji, u ten gnjizdu niš ni drugo siguro ni jušto, ure su se pomutile i bisage zgubile, upuhla se sviča i zajokala miča, nidan ne čuje, samo mačak muči, njemu lipo je... provivan se domisliti lipših hipi, voriha u vrtlu, odora na lipi, pipan grudu, suha je, puna praha, tilo pati, duša posramljena, med i mliko, kanbijano sito, žuč zlivena, zvoni crikva, dušu je puštila na postelji još jena, nis ni ja sigura od kud gre vitar grdega vitra...blidi šperanca, pomori Bože, forši je još dobrega u Tvojih rukah...

103

BISAGE zgubile su i ono malo ča su nosile, u svojih žepi imale, na tovaru se peljale... vajk su čovika do hiže kunpanjale.... bisage ud vriče ušijene, ud starih štrac sklepljene, z vrimenon grdin se karale, ladre ud sebe tirale, gospodaru kus sriče nosile kad pune su pezu u liveja metale, borše modernega življenja, spod batića zašle, lipih kolori, velike precije, sinjale lušega življenja za lipotu davnih lit nikad pozabljene....

104

BONBONICE kako cuker slatke, u usti se topile,, sriču mi iz srca mamile ariju drugašljon učinile, zamotane u zlatnu hartu, imale veliku preciju, sebi me mamile, na Božič se na smrikvi vrtile, gledala san hi od gušta, šolde za njih ritko imala pak san želju zvizdi povidala, bonbonicu mi je drugi dan dala, vreda san doma potekla, babi se u hipu pofalila, pak san ud žalosti suzu spuštila aš bonbonica je samo moja pusta želja bila...

105

Denisini stihovi u kusu življenja - zapažanjeOčito je kako autorica ove knjižice nema namjere stati negdje na pola puta i predati se pod bremenom života kako to i kaže u svojoj naslovnoj pjesmi. Poznavajući njezine pjesničke uradke pisane i na književnom narječju ali još više na domaćoj čakavici, možemo primijetiti konstantu održavanja tempa tj. dinamike što ujedno opisuje i njezinu unutrašnju crtu, karakter. Ona jednostavno niže slike (možda će netko reći, ništa posebno, drugačije), no, Kožljan svaki svoj komentar na stanje u društvu ili možda refleksiju na prirodne pojave s lakoćom umreži u neki novi naslov: Biškot, Bonbonice, Ljučko, Ča je to, Bisage, želeći svom čitatelju prezentirati iznova nešto što je očarava, neku situaciju koja je podsjeća na mladost, neki dio folklorne baštine. I složimo se mi s filozofijom života ove istarske pjesnikinje ili ne, pročitajući svaku napisanu riječ, ostat ćemo, rekao bih , iznenađeni načinom ali i formom nizanja stiha. Ona ne preferira lektorstvo, ne traži bilo kakvo ukalupljivanje u neku posebnu formu što je veoma blisko njoj i kao osobi uopće. Vrlo tvrdoglavo radi i piše, čita, analizira i kroz takve postupke zapravo nastaju tekstovi u vidu poezije. Slobodna je čak i u samom dijalektu jer čakavica očito nemirno varira od one koja se piše i govori u Južnoj Istri, Zapadnoj Istri (odakle su joj i korjeni), ali ima i nekoliko primjera kada odskače i ubacuje narječje dalmatinske ili čakavice koja potiče sa kvarnerskog zaleđa. Sigurno je jedno, time svoj opus čini zanimljivijim, a istovremeno ne gubi se smisao onog što je autorica htjela reći. I tako Denis u ovih stotinjak pjesama koje je svela u svoju novu zbirku Kus življenja podsjeća na govor i baštinu koja se možda u ovo vrijeme globalizacije, pomalo i zanemaruje. No, važno je reći kako i sama potiče iz obitelji koja je držala do svoje tradicije, folklorne baštine, živi u sredini koja je u doticaju sa mnogim krajevima u kojima se njeguje kako istarski melos u glazbi, tako i čakavski dijalekt u pismu, poeziji ali i prozi. Eto, nakon zbirki na dijalektu naslova Kolajna od verši i Spod mojih prsti, možemo uživati čitajući najnovije djelo pod naslovom „Kus življenja”. Ivan Čikada

106

DENIS KOŽLJAN, rođena 1961. u Puli, gdje momentalno živi i stvara. U mirovini, odgajateljica predškolske djece, supruga i majka dvoje odrasle djece. Pisanjem se intenzivnije bavi od 2010., a osim standarda piše i na dijalektu U njenom opusu prevladava poezija, no, piše isto tako i prozu (crtice, kratke priče, drame, monodrame, kolumne, recenzije, eseje, intervjue i autobiografiju). Denis je izdala petnaestak samostalnih autorskih djela, a prisutna je u mnogim zajedničkim zbornicima i zbirkama poezije. Neka od značajnijih djela su i romani Iza osmjeha, Prokleto sama, te zbirka Nemirna. Autorica je i nagrađivana više puta, a najdraža joj je 2. nagrada za monodramu u Križevcima. Kožljan je prisustvovala na mnogim susretima pjesničke riječi, a i sama je režirala mnoge glazbeno poetske večeri i humanitarne koncerte. Denis nema poseban razlog zašto piše jer kako i sama kaže pisanje je ispunjava, pisanjem se izražava tamo i na način gdje inače ne bi možda mogla ili smjela. Od pisanja nema neka velika očekivanja ali sretna je kad se njezin rad nađe u žiži interesa kod čitalačke publike i to joj je najveća nagrada za trud. Osim pisanja, ona se bavi umjetničkom fotografijom i slika.

107