L-iScout Xaghri (It-3 Edizzjoni)

Mill-Group Scout Leader...

GSL Vincent Vella

Għat-tielet sena konsekuttiva qegħdin nerġgħu nippreżentaw ir-Rapport Annwali u it-tielet ħarġa tal-Iscout Xagħri. Nispera li issa qegħdin nidraw lil xulxin. Iż-żmien jgħaddi mingħajr ma jistenna lil ħadd. Sena oħra tgerbet u magħha ġabet ħidma sħiħa minn dawk kollha involuti b’xi mod jew ieħor fl-istorja tal-Grupp tagħna. Għandna inħossuna ferm kburin illi l-Grupp tagħna huwa attiv kontinwament is-sena kollha.

Sar il-kamp tas-sajf u l-barbeque annwali fir-Ramla li kienu suċċess. Dan sar bejn l-1 ta’ Lulju sas 7 ta’ Lulju. Rajna l-investiment li għamilna fil-marquee - dan ġie utilizzat fil-kamp u konna iktar komdi mis-snin ta’ qabel. Wara l-kamp sar il-Jamboree fi Sweden mill-25 ta Lulju sat-8 t’Awissu. Hawn inkitbet it-tieni storja għall-Grupp tagħna. L-ewwel wieħed li kien attenda kien Joseph Sultana (ta’ Lejlina) li mar jirrappreżenta lix-Xagħra Scout Group fl-Ungerija fis-sena 1933. Din id-darba attendew Sitt Scouters – Josmar Azzopardi, Daniela Sultana, Sabrina Portelli, Deborah Sultana, Steven Sultana u Julie Sultana.

Nixtieq niġbed l-attenzjoni tal-ġenituri tal-membri tal-grupp biex jattendu bi ħġarhom għallattivitajiet li nagħmlu. Dan huwa dover tagħhom li jattendu. Il-fondi li jibqa’ minn dawn l-attivitajiet imorru kollha għall-użu tal-grupp u nisperaw li ma ndumux ma nużaw dawn il-fondi.

Bħal ma tafu din is-sena hija ddedikata lil volontarjat. Il-grupp tagħna ta sehmu billi organizza car wash b’riżq l-Arka Foundation, ġbarna affarijiet għall-vittmi tal-Gwerra tal-Libja u bi ħsiebna nkomplu b’dawn l-għajnuniet.

Fl-aħħar nixtieq nirringrazzja lil AGSL Daniela Sultana li fil-futur qarib trid timla il-post tiegħi għax wasal iż-żmien li jien nirtira minħabba l-eta’, lill-Iscouters kollha u lil Kunsill, lid-Direttur tax-Xagħra Youth Centre, lil Mons Arċipriet Mons Carmelo Refalo li huwa ċ-Chaplain tal-Grupp, lid-District Commissioner Lorry Saliba, u lil Dun Jesmond Gauci għaxxogħol siewi li qiegħed jagħmel. Nirringrazzja wkoll lis-Sur u Sinjura Joseph Attard, lis-Sur u Sinjura Joseph Gatt, lis-Sinjura Maria Cassar, lis-Sur u Sinjura Julian Sultana u lil Michael Cini li offrewlna il-postijiet tagħhom biex inpoġġu l-affarijiet li għandna. Grazzi wkoll tmur għal Michael Refalo, Mario Grech, Debono Printing Press u lil Kunsill Lokali tax-Xagħra talgħajnuna li jagħtuna matul is-sena.

www.xaghrascouts.com

Xagħra Scout Group

Siġra mħawwla fil-playingfield b’tifkira ta’ għeluq it-tlett snin minn meta reġa fetaħ ix-XSG

Membru ta’ l-iScout Association ta’ Malta

Paġna 1 minn 16

L-iScout Xagħri - It-3 Edizzjoni - Jannar 2012

Mill-Editur...

Kontenut tal-Magazin Pg 1 - Mill-Group Scout Leader

a/ AGSL Carmel Attard

Pg 2 - Mill-Editur

Waslet ħarġa oħra tal-iScout Xagħri u bħal ta’ qabilha żżomna aġġornati mal-attivitajiet li saru mixXSG tul dawn l-aħħar sitt xhur. Kienu xhur inpenjattivi ħafna kemm mill-Amministrazzjoni, kif ukoll milliscouters u scouts kollha. Qed tkun ippubblikata fil-bidu tas-sena 2012, sena ġdida li ġġib magħha dak li hu sabiħ u anke dak li hu inqas sabiħ.

Pg 3 - Mic-’Chaplain’ Pg 4 - Attivitajiet 2012 Pg 5 - Il-Beaver Scout Colony Pg 6 - Il-Cub Scout Pack Pg 7 - It-Truppa Pg 8 - Achievements Pg 9 & 10 - L-iStorja tax-XSG Pg 11-15 - Rokna Internazzjonali

JAMBOREE SPECIAL

Pg 16 - Sponsors

____________________________ Maħruġ f’isem ix-Xagħra Scout Group, Distrett t’ Għawdex, Scout Association ta’ Malta, bl-għajnuna ta’ ħafna membri speċjalment l-Editur Carmel Attard, l-Assistenta Editriċi Daniela Sultana u ilGraphical Designer Josmar Azzopardi.

Xagħra Scout Group c/o ‘Vinvick’ Triq Guiseppe Diacono Xagħra, Gozo

F’din il-ħarġa ta’ nteress partikulari hu l-artiklu li jitratta dwar l-esperjenzi ta’ sitt leaders tagħna li attendew għal Jamboree ġewwa l-iSvezja. Żgur li kienet esperjenza kbira għalihom, għax-Xagħra Scout Group u anke ta’ unur għar-raħal tax-Xagħra inġenerali.

Infakkar li kien fl-1936 li l-ewwel GSL tax- Xagħra Scouts , is-Sur Joseph Sultana, ta’ Lejlina, li attenda l-Jamboree tal-Ungerija. Probabbli hu kien l-ewwel scout leader Għawdxi li ħa sehem fl-laqgħa mondjali tal-iscouts, bħalma hi l-Jamboree.

Il-ħidma bla ma taqta’ tal-Leaders tagħna , msaħħin mit-taħriġ kontinwu li qed jieħdu mill-IHQ ta’ Malta, żgur li tawgura tajjeb. Flimkien mal-ġenituri tat-tfal, huma qed jagħmlu ħilithom biex lit-tfal fdati f’idejhom jagħtuhom il-ħiliet kollha possibli biex għada pitgħada jsiru ċittadini sani f’kull aspett.

J’Alla l-bidu ta’ din is-sena jkun ta’ awgurju ta’ ħeġġa u mpenn favur ix-XSG , ħalli jkollna sena oħra ta’ ħidma kbira bħalma kienet l-2011. Nixtieq nawgura sena ġdida mimlija saħħa u barka tal-Mulej lil kull min jaħdem għall-ġid tax-XSG.

info@xaghrascouts.com www.xaghrascouts.com

www.xaghrascouts.com

Xagħra Scout Group

Membru ta’ l-iScout Association ta’ Malta

Paġna 2 minn 16

L-iScout Xagħri - It-3 Edizzjoni - Jannar 2012

Mic-’Chaplain’...

Mons. Arċipriet Carmelo Refalo

Ħajja li tirnexxi!

It- tmien tarġiet li jwasslu għas-suċċess!

X’inhu s-sigriet biex tirnexxi fil-ħajja? X’inhi s-soluzzjoni għal-ferħ tal-qalb? Ser nissuġġerilek tmien toroq li jwasslu għas-suċċess veru tal-ħajja.

1. Kun ferħan b’dak li tassew int! Qatt tirrifjuta u qatt titlob xejn. Fuq kollox ibni l-fiduċja fik innifsek u fl-oħrajn. Ħa jkollok fiduċja f’Alla li dejjem jipprovdilek u li dejjem jieħu ħsiebek.

Tassew ‘ħenjin il-fqar fl-ispirtu għax tagħhom hija s-saltna tas-smewwiet’.

2. Kun lest għal-prova. Ngħaddi mit-tbatija, imma quddiem l-iebes tal-ħajja naf nirreaġixxi. Bħal Ġob kapaċi ngħid ‘Alla tani Alla ħadli’. Ilfaraġ t’Alla fil-qalb tal-bniedem jeħilsu mit-tifrik u mid-disperazzjoni. ‘Ħenjin l-imnikkta għax huma jkunu mfarrġa’.

3. Żomm il-kelma. Ma jitelgħulix meta jien nisber malajr! Naf inħobb,inħoss, edukat u naf inkun twajjeb ma’ kulħadd.’ Ħenjin ta’ qalbhom tajba għax huma jirtu l-art’.

4. Fil-ħajja agħmel ħiltek! Alla tak aktar milli taħseb li għandek bżonn. Hawn nies bil-ġuħ u bil-għatx għall-ġustizzja li minkejja tant inġustizzji li hawn ma’ saqajna, xorta jibqgħu sodi fil-VERITA’. Dawk li huma bil-għatx għall-ġustizzja huma mberkin għax għad ikunu mxebba.

5. Agħmel lil ħaddiehor dak li tixtieq li ħaddiehor jagħmel lilek! Dan il-prinċipju hu miftuħ għall-ferħ. Kemm niltaqa’ ma’ żgħażagħ u nies ġenerużi li jgħinu lil oħrajn.’ Ħenjin dawk li jħennu għax għad isibu l-ħniena’.

6. Inħossni maħbub. Int li kapaċi tħobb għandek il-bżonn li tħossok maħbub, Jekk niltaqgħu ma’ persuni li jafu jħobbu b’imħabba sinċiera u mhux b’intenzjoni oħra, dak il-ħin ħajjitna tinbidel għall-aħjar.’ Ħenjin dawk li huma safja f’qalbhom għax jaraw lil Alla’.

7. Ħobb dejjem u ma jiddispjacik qatt. Jien nista’ ngib il-paċi kull fejn inkun anke quddiem dawk li jħottu minflok jibnu. Ma naċċetta qatt il-firda u ma nċedix quddiem l-għira.’ Ħenjin dawk li jġibu l-paċi għax huma jissejħu ulied Alla’.

8. Għix ħajtek! Li tagħżel li tgħix ferħan billi ma tħalli lil ħadd u xejn itellfek milli tkun ferħan.

Dan ma jfissirx li fil-ħajja mhux se ssib min ifixklek jew isallbek. Jekk tgħix sewwa, issib ruħek imġarrab. Dawk in-nies li ma jċedux quddiem l-injoranza huma tassew ħielsa għaliex ma’ ppermettewx li jinħakmu mill-‘inġusti’ u mill-‘prepotenti’, dawk li jidhrilhom li huma xi ħaġa.’ Ħenjin dawk li huma ppersegwitati minħabba s-sewwa. Għax tagħhom hija s-saltna tassema’.

Jirnexxilek tirnexxi fil-ħajja bil-garanzija ta’ suċċess li ma jistax jitteħidlek jekk timxi fuq dawn it-tmien toroq tal-verita’. Tirnexxi zgur għax ta’ kelmtu min tahomlna. Ġesu’ la jqarraq u lanqas jitqarraq, Ipprovahom u tirnexxi żgur.

www.xaghrascouts.com

Xagħra Scout Group

Membru ta’ l-iScout Association ta’ Malta

Paġna 3 minn 16

L-iScout Xagħri - It-3 Edizzjoni - Jannar 2012

Attivitajiet 2011 Matul is-sena 2012 il-Grupp ħadem biex organizza bosta attivitajiet fuq livell ta’ Grupp.

8 ta’ Jannar - Laqgħa Generali Annwali 20 ta’ Frar - District Founder’s Day Parade ġewwa ir-Rabat 5 ta’ Marzu – Party tal-Karnival 30 t’April – Car Wash ġewwa r-Rabat għall-Fondazzjoni Arka 10 t’April – Parata Annwali ġewwa il-Belt Valletta 23 t’April – 27 t’April – Kamp tal-Għid il-Pergola 15 ta’ Mejju – Quddiesa għat-Tielet Anniversarju tal-Grupp 30 ta’ Ġunju – Trasport għall-Isle of MTV 1 ta’ Lulju – 7 ta’ Lulju – Kamp tas-Sajf 5 ta’ Lulju – BBQ Annwali ġewwa r-Ramla 27 t’ Awissu – Kollezjoni ta’ ikel għal Libya.

23 ta’ Settembru – BBQ tal-aħħar tas-Sajf ġewwa Ta’ Mena Estates 5 ta’ Novembru – Costume Party 17 ta’ Diċembru - Cookie Sale bil-ġbir ta’ fondi jmur għal-proġett tal-ilma fil-Hounduras.

www.xaghrascouts.com

Xagħra Scout Group

Membru ta’ l-iScout Association ta’ Malta

Paġna 4 minn 16

L-iScout Xagħri - It-3 Edizzjoni - Jannar 2012

Il-Beaver Scout Colony a/ BSL Deborah Sultana

F’dawn l-aħħar sitt xhur l-attivitajiet tal-Beavers ma naqsux. Għalkemm waqafna ftit fis-sajf, f’Settembru il-Beavers reġgħu lura ħerqana għal sena ġdida. Telgħu xi Beavers malCub Scouts, u minflokhom daħlu tfal ġodda.

It-tfal il-kbar ħadu ilFriendship Challenge Badge li ħadmu għaliha fix-xhur tarrebbiegħa u tas-sajf li għadda.

F’Ottubru bdejna naħdmu fuq l-Outdoor Challenge. Għal dan għamilna laqgħa ħdejn il-baħar, mixja u picnic. Tgħallimna kif nagħmlu sandwich, ħawwilna l-ġulbiena bi preparazzjoni għal Milied, u ħafna attivitajiet oħra.

Wasal il-ħin tal-ikel! - Picnic f’Santa Verna

Bħalissa qed nippreparaw għall-investitura talBeavers il-ġodda, fejn se jilbsu l-uniformi għall-ewwel darba u jidħlu uffiċjalment fil-moviment tal-iScouts.

Permezz ta’ dawn, il-grupp tagħna se jikber u jissaħħah.

Il-Beavers ta’ kull ġimgħa jiġu daħkana u entużjasti, u s-sodisfazzjon li nieħdu minn għandhom aħna l-leaders ma’ nibdluh ma xejn. Ninsabu kburin li nagħmlu parti mix-Xaghra Scout Group għax b’hekk qegħdin nagħtu sehmna fit-trobbija ta’ ċittadini futuri.

Nilgħabu waqt picnic f’Santa Verna

Inħawwlu l-ġulbiena għal żmien il-Milied!

www.xaghrascouts.com

Xagħra Scout Group

Membru ta’ l-iScout Association ta’ Malta

Paġna 5 minn 16

L-iScout Xagħri - It-3 Edizzjoni - Jannar 2012

Il-Cub Scout Pack a/ ACSL Steven Sultana

L-iScouting ma jorqod qatt, u għalhekk lanqas ix-Xagħra Scout Group ma waqaf fix-xhur tas-Sajf. Barra l-kamp li għamilna f’Lulju, il-Pack kellu bosta attivitajiet oħra ippjanati għal matul is-Sajf. Fost l-oħrajn, saret attivita’ għall-qraba rġiel tat-tfal, fejn morna night hike. Barra minn hekk, tgħallimna wkoll xi ħaġa fuq l-istillel u lagħbna xi logħob favoriti tat-tfal. Kien ċans biex min ġie jistrieħ ftit u jidħak daħka, attivita’ li kemm il-kbar kif ukoll iż-żgħar għoġbithom ħafna.

Barra minn hekk, kellna bosta beach activities, fejn il-Pack niżel sar-Ramla fejn lagħbna, bnejna mhux kastelli imma rħula sħaħ bir-ramel u kilna xi ħaġa ukoll.

Il-Cubs il-kbar kellhom ukoll mawra għal-Belt Valletta, bħala parti mil-Arrow Work tagħhom. L-ewwel preparaw sew billi fittxew x’hemm interessanti, u pjanaw iż-żjara tagħhom, u l-ġimgħa ta’ wara żaru l-bosta mużewijiet u attrazzjonijiet imxerrda mal-Belt. Bħas-snin ta’ qabel, din is-sena ħadna sehem fl-attivita’ tat-tifkira taż-żewġ Assedji li saret fis-7 ta’ Settembru.

Differenti mis-snin ta qabel, din id-darba, it-tfal setgħu jaraw u jisemgħu dak li kien qed jiġri.

Din dejjem tkun attivita’ interessanti u ħadu gost li setgħu jaraw kull ma ġara.

Bħal kull sezzjoni oħra, il-Pack huwa grupp dinamiku, u f’dan il-perjodu rajna lil xi Cubs jitelgħu fit-truppa, f’ċerimonja kemmxejn emozzjonali, għax dawn kienu ilhom fil-Pack mill-bidu.

Dawn kienu Jake Borg, Paul Simon Cardona, Andre’ Cassar, Theodore Cutajar, Nathan Formosa, Liam Gatt, Stephan Muscat, Joseph Rapa u Daniel Refalo. Barra minn hekk introduċejna xi tfal ġodda fil-Pack li huma Malcolm Borg, Malcolm Caruana, George Debono, Kieran Gatt, Richard Grech, Francanne Mercieca, Christian Scerri u Etienne Xiberras fil-waqt li Claire Refalo, Noella Sultana, Kirsten Gauci u Matthew Xuereb telgħu mil-Colony. Ilkoll kemm huma, ma’ dawk li kienu diġa’ parti mil-Pack, qed jistinkaw ħafna biex jimxu mal-programm li xtaqu jagħmlu.

Kellna bosta attivitajiet oħra. Xi uħud mil-Cubs kellhom iċ-ċans jieħdu sehem fil-World Environment Program Day, fejn telgħu nofs ta’ nhar Malta, u kellhom xi attivitajiet mal-Cubs l-oħra ta’ Malta fejn tgħallmu xi affarijiet ġodda fuq l-ambjent ta’ madwarna u kif għandna nieħdu ħsiebu. Attivita’ oħra li ħa sehem fiha l-Pack kollu kienet il-picnic fejn stedinna lill-familja kollha tal-Pack u qattajna xi ftit ħin ma’ xulxin, lagħbna xi logħob, kif ukoll żbagħna lil xulxin! Kienu mumenti ħelwin, u kulħadd telaq lura d-dar bi tbissima fuq fommu. Issa qed nippreparaw għal attivita’ karitattiva, fejn il-Cubs se isajru xi cookies u jbegħhom biex jiġi żviluppat proġett għallaċċess ta’ l-ilma fil-Honduras.

Dan kollu waqt li jsiru l-meetings regolari fejn it-tfal jiltaqgħu u jitgħallmu xi ħaġa flimkien.

Minn Ottubru, aħna l-Leaders iddeċidejna li nagħtu iktar responsabiltajiet lil Cubs. Issa kull xahar għandu żewġ Sixes li jieħdu ħsieb li l-post ikun ippreparat u nadif tajjeb għal meeting, kif ukoll li jippreparaw u jispjegaw il-logħob lil sħabhom. Barra minn hekk, tajna iktar responsabiltajiet lil individwi fis-Sixes, biex hekk kullħadd jaħdem ma’ xulxin biex ntellgħu l-kwalita’ talmeetings.

Il-familja kollha involuta fil-Pack!

www.xaghrascouts.com

Xagħra Scout Group

Membru ta’ l-iScout Association ta’ Malta

Paġna Paġna66minn minn16 16

It-Truppa

L-iScout Xagħri - It-3 Edizzjoni - Jannar 2012

a/ ASL Josmar Azzopardi

It-tieni nofs tas-sena 2011 kien żmien fejn it-Truppa tax-Xagħra Scout Group kompliet taffronta sfidi u avventuri ġodda.

Wara is-Summer Camp, it-Truppa rat li tkompli bi programm interessanti biex b’hekk kulħadd jkollu sajf talNsajru bir-razzjon fuq Kemmuna! ġenn. L-iScouts kollha bdew jaħdmu fuq il-Pathfinder fejn saru bosta sezzjonijiet mill-programm bħal Basic Mapping, Knotting u First Aid. Dan kollu sar biex it-Troop kollu jkun preparat għall-attivitajiet speċjali li kellna pjanati għal matul is-sena. L-ewwel waħda saret fit-13 ta’ Awwissu, fejn it-Truppa morna ġurnata Splash and Fun. Kienet esperjenza sabiħa ħafna fejn tgħallimna niddevertu ftit iżda norganizzaw u nipjanaw bil-quddiem. Fis-27 ta’ Awwissu kien jmiss ‘Operation Hook’. F’din il-ġurnata kull Patrol kellu set ta’ attivitajiet li ried jlesti qabel biex jieħu sehem f’din l-attivita’. Fost dawn l-attivitajiet kien hemm li kull Patrol ried jibni qasba minn materjali li jsib fid-dar u jiprepara għalf biex jistad għall-ħut. Dakinhar ltqajna wara nofsinhar fejn kull patrol beda jistad għall-ħut! Iżda l-unika żewġ qabdiet kienu minn Nathan Formosa! Peress li ma kellniex biżejjed ħut biex nsajru u nieklu, it-Troop qabeż jgħum għuma fil-baħar u lagħbna xi logħob ukoll. L-aħħar sfida tas-Sajf kien l-‘Operation Kemmuna’!

Din saret bejn l-21 sat-22 ta’ Settembru fejn għamilna jumejn nesploraw lil Kemmuna. Il-Kamp kien organizzat fuq it-tema li tlaqna minn Għawdex wara li gżiritna nħakmet mill-epidemija talkolera u għalhekk għamilna jumejn nitgħallmu nesploraw. Kull Patrol kellu razzjon li ried jgħix fuqu. Fost l-attivitajiet li għamilna kellna Treasure Hunt mal-gżira fejn kull Patrol dar checkpoints interessanti bħall-kappella, it-torri u l-isptar. Fl-aħħar ma kienx jonqos għuma il-Blue Lagoon!

Bdejna l-aħħar tlett xhur tas-sena b’ton tajjeb billi ngħaqdu mat-Truppa 9 Cub Scouts oħra. Din kienet esperjenza ġdida għax għal-ewwel darba konna Truppa ta 22 persuna u b’hekk stajna niffurmaw 3 patrols li bihom ċertu laqgħat setgħu jiġu pjanati aħjar. Fit-tielet weekend ta’ Ottubru, it-Truppa organizza sleepover biex jqatta’ lejl jipparteċipa fil-JOTI. Il-JOTI ġiet organizzata fuq it-tema ta’ ShelterBox fejn tallimna fuq din l-NGO li tgħin biex in-nies li jsoffru minn traġedji naturali jkollhom l-ewwel affarijiet biex jibnu u jgħixu f’shelter. Ta min jinnota li t-Truppa irnexxilha tagħmel 185 kuntant f’36 pajjiż madwar id-dinja. Bejn il-lejl ta’ 11 u 12 ta’ Novembru it-Truppa ħadet sehem f’’Operation Dusk Till Dawn’, fejn tlaqna mix-Xlendi f’inżul ix-xemx u mxejna sal-Qortin in-Nadur fejn qomna għat-tlugħ tax-xemx. Din kienet esperjenza memorabli speċjalment peress li kien l-ewwel overnight hike tal-iscouts il-ġodda tat-Truppa.

Fl-aħħar, mill-10 sat-12 ta’ Diċembru il-PLC organizza l-ewwel Kamp tax-Xitwa tat-Truppa! Kien kamp fejn kulħadd irrilassa ftit flimkien, filwaqt li prattikajna l-iskills tan-knots u pioneering.

Ta min jsemmi ukoll, li f’dawn l-aħħar xhur bdejna nħaddmu l-Patrol Leaders Council (PLC), fejn il-PLs u l-APLs jiddiskutu u jorganizzaw l-attivitajiet li jmiss. Għalhekk, nhar it-18 sa l-20 ta’ Novembru il-PLC attenda is-South District Patrol Leaders Camp ġewwa iż-Żurrieq fejn flimkien ma’ scouts oħra minn Malta, tgħallmu kif jmexxu l-Patrols u t-Troop aħjar.

Prosit lil kulħadd u nisperaw li s-sena 2012 tkun sena tal-ġenn oħra!

www.xaghrascouts.com

Xagħra Scout Group

Patrol Challenge waqt il-Kamp tax-Xitwa

Membru ta’ l-iScout Association ta’ Malta

Paġna 7 minn 16

L-iScout Xagħri - It-3 Edizzjoni - Jannar 2012

Achievements minn Lulju sa’ Diċembru 2011

Beaver Colony Attard Alison, Attard Maria, Attard Scott, Borg Hayley, Cini Louanne, Debono Craig Carl, Tabone Mariah, Teuma Hayden.

Friendship Challenge

Cub Scout Pack

Tender Paw Mowgli Bagheera Kaa Raksha Chil Silver Arrow Rama Shere Khan Pet Care Musician Book Reader Botanist Collector Local Historian Scientist Crafts Cook

Matthew Xuereb, Kirsten Gauci, Claire Refalo, Noella Sultana, Francanne Mercieca, George Debono, Etienne Xiberras Christiana Pisani, Justin Formosa, Jonathan Formosa, Maria farrugia, Andrei Saliba, Vanessa Attard, Daniel Attard, Lukas Portelli, David Cardona, Katriel Zammit Carlos Cutajar, Luca Galea, Jacob Kyle Farrugia, Rosie Attard Luca Galea, Michela Muscat, Rosie Attard, Antoine Attard, Neil Curmi, Matthias Borg Antoine Attard, Matthias Borg, Neil Curmi Antoine Attard, Matthias Borg, Neil Curmi Neil Curmi, Matthias Borg Matthias Borg, Antoine Attard Matthias Borg Luca Galea Michela Muscat Michela Muscat, Daniel Attard Michela Muscat, Daniel Attard Michela Muscat, Daniel Attard Daniel Attard Maria Farrugia, Michela Muscat, Daniel Attard Michela Muscat Christiana Pisani

Group Awards - 2011 Best Beaver Scout

Hayden Teuma

Best Cub Scout

Daniel Attard

Best Scout

Kurt Galea

www.xaghrascouts.com

Ġrazzi talli għintna nagħmlu waħda mill-ħolmiet tagħna issir realta’!

Tel: 2155 2219 Mob: 7955 2219

info@jdbprinting.com

Xagħra Scout Group

Membru ta’ l-iScout Association ta’ Malta

Paġna 8 minn 16

L-iScout Xagħri - It-3 Edizzjoni - Jannar 2012

L-iStorja tax-XSG... a/ AGSL Carmel Attard

Avvenimenti Importanti fin-1935

Sadattant nhar it-Tlieta, 22 ta’ Jannar 1935 inżammet laqgħa mportanti ġewwa d-Duke of Edinburgh Hotel fir-Rabat. Skont il-minuti ta’ din il-laqgħa, l-iskop ewlieni tagħha kien biex jinħolqu Boys Scout Groups oħra f’ Għawdex. Din ix-xewqa ġiet espressa mill-istess Gvernatur ta’ Malta, l-Eċċellenza Tiegħu, Sir David G. M. Campbell billi hu kien ukoll ic-Chief Scout ta’ Malta u Għawdex. Hu kellu għajnuna kbira mid-Direttur tal-Edukazzjoni, Dr. A. V. Laferla, u mis-sur Roger Farrugia li kien il-Kummissarju għal Għawdex. Mexxa din il-laqgħa l-Kurunell Percy R. Worrall, li barra li kien Kap Kmandant tal-’Kings Own Malta Regiment’ kien ukoll ‘Island Commissioner’ tal-lscouts. Matul il-laqgħa l-Kurunell Worrall spjega lil dawk preżenti f’hiex kien jikkonsisti dan il-moviment u kif seta’ jkun ta’ benefiċċju għaż-żgħażagħ Għawdxin. Hu saħaq li l-iscouts kienu jwegħdu fedelta’ lil Alla, lir-Re u lil pajjiżhom, u li bl-ebda mod ma kienu marbuta ma’ xi twemmin politiku. Fl-istess waqt, huma riedu jkunu ħbieb ta’ kulħadd. Skont hu, dan il-moviment, li dak inhar kellu żewg miljuni u nofs membri kien qed jagħmel minn kollox sabiex iġib ‘l quddiem issaħħa u il-kuntentizza tal-ġenerazzjoni li kienet tielgħa.

Għal din il-laqgħa kienu attendew uħud mill-personaġġi l-aktar distinti tal-gżira Għawdxija. Fost dawn insibu lis-Sur J. Borg Cardona u s-Sur Erin Serracino Inglott mill-Uffiċċju talKummissarju ta’ Għawdex, I-Arċidjaknu Rev.Ġużeppi Pace, li wara sar l-lsqof ta’ Għawdex, it-tabib Tommaso Cauchi u Dr. Anton Tabone mill-lsptar t’Għawdex. Ma dawn kien hemm preżenti wkoll membri tal-Kleru, kapijiet ta’ skejjel u tobba taddistretti. L-lsqof t’Għawdex, li ma setax jattendi, wera li kien jaqbel ma’ din ilproposta u anke bagħat il-barka tiegħu.

ll-Grupp tal-iScouts tax-Xagħra kien ilu diġa jiffunzjona sentejn, u sal-1934 diġa kellu l-banda tiegħu. F’din il-laqgħa ta’ Jannar 1935, il-Kurunell Worrall kien faħħar ħafna l-ħidma tas-Sur Franġisk Camilleri u lil Dun Alwiġ Attard u lill-Kanonku Dun Vitor Attard għall-ħidma tagħhom mal-iScouts. Hu semma wkoll lis-sur Joseph Sultana li kien l-iScout Master tal-Grupp.

Fis-17 ta’ Ġunju 1935, il-Boys Scouts tax-Xagħra marru l-lmġarr biex jilqgħu lill-Eċċellenza Tiegħu l-Kardinal M. Enriku Lepicier, li kien ġie bħala Delegat tal-Papa Piju XI. Kien ġie Għawdex biex ipoġġi kuruna ta’ ħaġar prezzjuż fuq ras ix-xbiha tal-Madonna Ta’ Pinu. ll-Kav. Dun Julian Refalo Rapa igħidilna li erba’ membri tal-Boys Scouts: Roman Buttigieg, Luigi Formosa, Leli Attard u Govanni Borg akkumpanjaw lill-Kardinal billi qagħdu bil-wieqfa fuq l-istaffa tal-karozza ,tnejn quddiem u tnejn wara mit-telgħa tal-Qaċċa sal-Misraħ, waqt li oħrajn saqu quddiem rekbin fuq ir-roti. Meta l-Kardinal wasal fil-misrah tax-Xagħra, xi ħadd oġġezzjona għal dawk I-erba’ Scouts fuq l-istaffa tal-karozza u kellhom jinżlu. Iżda imbagħad ingħaqdu ma’ sħabhom fuq ir-roti u niżlu miegħu sa l-Għar ta’ Calypso. (Ara paġna 21 tal-ktieb ‘Iċ-Ċirklu u Ġrajjietu 1936-1986’).

L-istess awtur igħidilna li ta’ kull sena, fl-1 ta’ Jannar, il-Banda ta’ iScouts kienet toħrog iddoqq

www.xaghrascouts.com

Xagħra Scout Group

Membru ta’ l-iScout Association ta’ Malta

Paġna 9 minn 16

L-iScout Xagħri - It-3 Edizzjoni - Jannar 2012 marċi ferrieħa mat-toroq tax-Xagħra. Kienet issir ġabra ta’ flus ukoll. Billi n-nies kienet tinġabar għal din l-okkazzjoni kienet isservi biex it-tfal isibu ċ-ċans jitolbu l-istrina lill-kbar.

Ix-Xagħra Scouts Football Team

Ix-Xagħra Boys Scouts Group kellu wkoll it-team tiegħu tal-football. Fil-‘Berqa’ tal-31 ta’ Ottubru 1936 insibu li fost it-timijiet tal-football li rreġistraw mal-Gozo Football Association kien hemm ukoll it-team tax-Xaghra Scouts. Ta’ min ifakkar li fl-10 ta’ Mejju 1936, is-Silver Jubilee Ground (illum Gozo Stadium) kien ġie inawgurat mill-Gvernatur ta’ Malta, Sir Charles Bonham Carter u Lady Carter, waqt li kien imbierek mill-lsqof ta’ Għawdex, Mons. Mikiel Gonzi. Bir-raġun ngħidu li x-Xagħra Scouts F.C. kien minn tal-ewwel timijiet tal-football fix-xena lokali. Fl-ewwel logħba kompetittiva, rapportata fil-Berqa ta’ l-Erbgħa, 5.11.1936, insibu li x-Xagħra Scouts kienu megħluba mill-Victoria Stars bl-iskorta’ 1-0. Logħba oħra li kellha tintlagħab fit-22 ta’ Diċembru kontra Victoria United, ma ntlagħbitx minħabba nċidenti li nqalgħu, fejn 4 players ta’ Xaghra Scouts ġew sospizi. Sas-sena 1938 il-football fix-Xagħra kien attiv ħafna u fil-Berqa tal-Erbgħa 12 ta’ April 1939 insibu rapport sħiħ tal-logħba bejn Għ’sielem Rovers u Xagħra Scouts. Kien flistaġun 1939-1940 li t-team ta’ Xagħra Scouts bidel ismu għal Xagħra Blue Stars. Tul is-snin ta’ l-Ewwel Gwerra Dinjija, I- GFA ma organizzatx aktar kampjonati tal-football. Biss ir-Renton Cup (it-tazza tar-rebħ tal-kampjonat), inzammet għand l-lscout Group Leader, is-sur Joseph Sultana, billi x-Xagħra Blue Stars kienu ddikjarati “Champions” tal-football Għawdxi. Din it-tazza ingħatat lura lill-GFA wara li spiccat il-Gwerra fl-1945. Nistgħu għalhekk liberament ngħidu li l-logħob tal-football organizzat ġewwa x-Xagħra kellu il-bidu tiegħu mill-Għaqda tal-lscouts.

Għaqda tal-Boys Scouts fi ħdan iċ-Ċirklu: 1952

Din hi silta mill-ktieb ‘Iċ-Ċirklu u Ġrajjietu 1936-1986’ paġna 63. “Dun Fortunat kien jaf tajjeb bil-pika li eżiżtiet fir-raħal meta hu kien wieħed mill-ewwel membri taċ-Ċirklu, fis-snin tletin, u għalhekk meta ġie mitlub sabiex terġa’ titwaqqaf l-għaqda tal-Boys Scouts fix-Xagħra, ħataf l-okkazzjoni ħalli jwaqqafha hu fi ħdan ic-Ċirklu, u ma jħallix lil xi ħadd ieħor jifforma għaqda indipendenti. B’hekk it-tfal taċ-Ċirklu u I-Boys Scouts jibqgħu jirrispettaw lil xulxin, għax ikunu taħt treġija waħda. Fl-24 ta’ Lulju I952, ġiet inawgurata x-Xagħra Boys Scouts, bisSur Emanuel Attard, għalliem tal-iskola bħala l-iScout Master tagħha. L-attivitajiet tal-Boys Scouts ġibdu aktar tfal lejn iċ-Ċirklu, għax Dun Fortunat impenja ruħu bis-sħiħ sabiex kollox ikun organizzat sew. F’ħafna mill-attivitajiet li l-Boys Scouts kienu jwettqu, kienu jieħdu sehem ukoll fihom dawk it-tfal li għal xi raġuni ma setgħux jidħlu flgħaqda u b’hekk l-ispirtu ta’ pika jew għira ma kienx jezisti. Il-bitħa taċ-Ċirklu kienet taqdihom f’kollox, għax waslu li anke fiha għamlu jiem ta’ camping u logħob kompetittiv.”

Ta’ min isemmi li s-Sur Lawrence Camilleri, f’isem l-iscouts, kien attenda għaċċerimonja tal-’Coronation’ tarRegina Eliżabetta tal-lngilterra. l-istorja tkompli f’edizzjoni oħra...

www.xaghrascouts.com

Xagħra Scout Group

Membru ta’ l-iScout Association ta’ Malta

Paġna 10 minn 16

L-iScout Xagħri - It-3 Edizzjoni - Jannar 2012

Rokna Internazzjonali Il-World Scout Jamboree 2011 u l-impatt li ħalla fuq dawk preżenti!

Kif il-biċċa l-kbira tagħkom tafu, 6 leaders mix-Xagħra Scout Group is-sajf li għadda għamlu esperjenza stupenda ġewwa l-iSvezja flimkien ma’ 73 Malti ieħor u eluf ta’ scouts minn madwar id-dinja. F’dan l-artiklu sejrin insibu l-esperjenzi ta’ xi uħud min dawn iż-żgħażagħ.

Deborah Sultana:

“we’re part of something so special, we’re part of (30) million scouts around the world.

That is a worldwide force for good, encouraging people like you to make a difference.” Hekk qal Bear Grylls (Chief Scout tar-Renju Unit) f’waħda miċ-ċerimonji li kellna fil-Jamboree. Din l-esperjenza urietni kemm vera kellu raġun. Il-moviment tal-iScouts huwa tant kbir u mimli b’nies li jemmnu f’dinja aħjar, li flimkien kapaċi nagħmlu differenza. Fil-Jamboree biss biss iltqajna ma’ nies minn kull kantuniera tad-dinja - ta’ razez, reliġjonijiet u kulturi differenti. Minkejja dan, imkien ma kien hemm preġudizzji u razziżmu - kulħadd ħadem id f’id, tgħallimna mingħand xulxin u ħadna gost flimkien.

Bħala membru tal-International Service Team, jien kont nagħmel parti mit-tmexxija ta’ waħda mill-attivitajiet li kellhom jagħmlu l-parteċipanti. Din kien jisimha ‘Dream’ u kienet issir bil-lejl ġol-foresta li kien hemm ġol-campsite stess. Kienet tikkonsisti f’passaġġ fis-siġar li jagħti illużjoni ta’ ħolma fejn il-parteċipanti jirriflettu fuq ħajjithom waqt li jilagħbu xi logħob mat-triq.

Dan ix-xogħol kien esperjenza fih innifsu għax ħdimt ma’ nies daqsi minn pajjiżi differenti u għadni f’kuntatt maghħom sal-lum. Kelli ċ-ċans ukoll nitkellem ma’ parteċipanti minn madwar id-dinja.

Meta ma kontx inkun ‘xogħol’, dejjem kien ikun hemm x’tagħmel fil-Jamboree. Kull pajjiż kellu t-tinda tiegħu fejn seta jmur kulħadd jitgħallem xi ħaġa dwar dak il-pajjiż. Kull fejn tmur tiltaqa’ ma’ xi ħadd differenti, kulħadd lest li jkellmek bi tbissima. Fil-għaxija min idoqq u jkanta, min ipartat il-badges, u min jilgħab xi logħba tal-iscouts. Kienu ħmistax inkredibbli, kulħadd daħkan u mimli entużżjażmu, kulħadd kien hemm għal għan wieħed, biex jibni dinja aħjar.

L-esperjenza ta’ Jamboree Dinji hija waħda li l-ebda Scout m’għandu jitlef jekk ikollu l-opportunita’.

Kienet esperjenza li se tibqa’ f’qalbi għal dejjem.

Steven Sultana: Id-dinja kollha rapreżentata f’għalqa b’labirint ta’ tined mimli kant, żfin, daħk u ferħ f’moviment wieħed lejn dinja aħjar, dan hu Il-Kontinġent Għawdxi li attenda l-Jamboree

www.xaghrascouts.com

Xagħra Scout Group

Membru ta’ l-iScout Association ta’ Malta

Paġna 11 minn 16

L-iScout Xagħri - It-3 Edizzjoni - Jannar 2012 Jamboree Mondjali. Dan iċ-ċans li jiġi darba kull erbgħa snin joffri esperjenzi uniċi lil min jaħtfu, ħbiberiji ġodda, ideat differenti u memorji li ma jintesew qatt, u jien kelli sehem mil-aħħar Jamboree li seħħ bħala IST. Kull IST ingħata xogħol x’jagħmel.

Fil-każ tiegħi dan kien fid-dining hall u fl-iscullery, jiġifieri servejt l-ikel lillISTs l-oħra, kif ukoll kelli xi xogħol fil-ħasil tal-platti. Kif dejjem kienu ifakkruna ta’ fuqna, dan kien xogħol importanti ħafna, għax konna qed insostnu lill-bqija ta’ l-ISTs li kienu qed jaħdmu mal-parteċipanti. Kulħadd kien jagħmel dan ix-xogħol b’ċertu Steven Sultana jesperjenza l-’Water Zorbing’ għall-ewwel darba entużjażmu, u dejjem kien ikun hemm atmosfera ferriħija u amikevoli. Pero’ dik kienet biċċa żgħira mill-esperjenza ta’ IST. Kien hemm ħafna attivitajiet li wieħed seta’ jagħmel. Dawn kienu jvarjaw minn ċans titħallat ma’ kulturi differenti sa ċerimonji ikkuluriti, minn attivitajiet enerġetiċi sa mumenti ta’ rilassament.

Kull kontinġent kellu tinda fejn seta’ jesebixxi l-pajjiż u l-kultura tiegħu. Dan kien wieħed mill-aħjar modi kif stajna nidduskutu d-differenzi ta’bejnietna, u konna nitgħallmu ħafna affarijiet ġodda fuq pajjiżi li forsi nisemgħu ftit fuqhom. Barra minn dan, konna niltaqgħu ma’ ħafna nies aħna u mexjin (u konna nimxu ħafna). Mhux l-ewwel darba li kien jiġi jkellimna xi ħadd għax kien jagħrafna li aħna minn Malta, minħabba l-iscarf. Ħafna drabi, dawn ikunu kollezzjonisti li jfittxu pajjiżi żgħar biex ipartu għal badges, scarves jew flokkijiet tal-kontinġent. Kien hemm ukoll parti fejn ħafna reliġjonijiet iltaqgħu u waqqfu l-post sagru tagħhom, minn sinagoga sa tempju Buddist...dejjem bit-tined. Din kienet żona sabiħa, interessanti u trankwilla ħafna, fejn wieħed seta’ jitlob kif ukoll isir jaf fuq reliġjonijiet oħra. Postijiet oħra kellhom diversi attivitajiet.

L-aktar waħda li niftakar hi Simply Rolling, fejn kont tidħol ġo ballun tal-plastik u tidħol b’kollox ġo swimming pool żgħira, sitwazzjoni diffiċli ħafna, għax ma tkunx tista’ tibbilanċja, u mhux darba jew tnejn taqa’ u ma tkunx tista’ tqum!

Anke jekk għal IST tista’ tidher bħala esperjenza diffiċli, fil-verita’ hemm ħafna attivitajiet li jista’ jagħmel u ħafna affarijiet x’jitgħallem, jekk ifittex sew u jaħtaf kull opportunita’, għalhekk inħeġġeġ lil kullħadd jipprova isib ċans li jmur f’attivita’ kbira bħal ma hi Jamboree.

Sabrina Portelli:

Il-Jamboree toffri diversi esperjenzi u ħbiberiji ġodda għal dawk preżenti u nista’ ngħid li kull mument li għaddejt minnu waqt dawn il-ħmistax ser iħalli effett fuq il-kumplament ta’ ħajti. Kull fejn tħares kont tara scouts minn pajjiżi differenti jitkellmu bejniethom, jilagħbu, jiżfnu, jieħdu gost, ipartu l-badges, tshirts u scarves tal-pajjiżi tagħhom u jaqsmu l-esperjenzi tagħhom. Xħin kont tara l-food houses u xxomm ir-riħa tal-ikel kont tispiċċa tidħol tixtri xi ħaġa tradiżżjonali tal-pajjiż bla ma trid.

www.xaghrascouts.com

Xagħra Scout Group

Membru ta’ l-iScout Association ta’ Malta

Paġna 12 minn 16

L-iScout Xagħri - It-3 Edizzjoni - Jannar 2012 Xogħli waqt il-Jamboree kien bħala kaxxiera ġewwa wieħed mit-3 ħwienet tal-ikel tal-parteċipanti. Bla dubju ta’ xejn dan ix-xogħol laqqagħni ma’ diversi scouts oħra barranin fosthom ma’ 350 IST ieħor kif ukoll ma’ 10,000 scout li 3 darbiet kuljum kienu jiġu ħalli jixtru l-ikel għattruppa tagħhom. Konna naħdmu shifts ta’ 8 siegħat kważi kuljum u ġieli konna nibdew fis-6am pero’ ħadd ma kien igerger u kont tara lil ISTs kollha jaqdu lill-parteċipanti bi tbissima fuq xofftejhom u jiżfnu mad-diski li kienu jindaqqu fuq il-Jamboree Radio. Waħda mill-isbaħ mumenti ta’ dan ix-xogħol kien meta ġie iżuruna r-Re u r-Reġina ta’ l-Isveżja waqt il-ħidma tagħna kif ukoll meta bħala apprezzament tax-xogħol li konna qegħdin nagħmlu ħaduna ġo għalqa u urewna film 3D, li ovjament ħadd ma kien qed jistenna li ħa jiġru! Il-ħbiberija ma ntemmitx meta ntemm il-Jamboree u ta’ sikwit għadna nitkellmu permezz ta’ social media.

Fost l-aqwa mumenti tal-Jamboree wieħed ma jistax ma jsemmix ċ-ċerimonji tal-ftuħ u tal-għeluq u l-festival talkulturi. Waqt dawn iċ-ċerimonji kien ikun hemm miġburin madwar 40,000 scout kulħadd jgħajjat, ikanta u jaqbeż u aħna qatt ma żammejna lura milli nagħmlu l-istorbju. Waqt iċ-ċerimonja tal-għeluq infetħu bwieb is-sena imma dan ma waqqafnix milli nieħdu gost. Kull fejn tħares kont tara lil kulħadd imxarrab għasra imma xorta kulħadd ferħan. Mument ieħor li żgur mhux ser ninsa huwa meta erġajt iltqajt mal-iscouts li kont iltqajt magħhom waqt il-Euro-Mini-Jam li kien sar ġewwa l-Iżlanda fl-2010 u qattajna lejl sħiħ inġeddu l-memorji tas-sena ta’ qabel filwaqt li nkantaw xi diski madwar il-campfire. Dan juri biċ-ċar li l-ħbiberija li bnejna bejnietna għada soda.

Fl-opinjoni tiegħi min ikolli l-opportunita’ li imur xi Jamboree Mondjali m’għandux jitlifha għax hija esperjenza unika u li mhux ħa tiġik kull sena. Il-Jamboree hija esperjenza indimentikabbli u naf fiċ-ċert li din ser tkun waħda mill-isbaħ avvenimenti li qatt attendejt għalihom.

Josmar Azzopardi:

Kien sewwa sew fl-2007 meta smajt bil-kelma World Scout Jamboree! F’dak iż-żmien ixXSG kien għadu lanqas biss ġie riattivat u bilkemm kelli idea ta’ x’inhu Scout. Iżda xorta waħda niftakar li l-kumment prinċipali tiegħi kien: “dawn mġienen se jonfqu daqshekk flus għal safra ta’ ġimgħatejn taħt it-tined!”

Iżda sena wara, meta ġie riattivat ix-XSG, niftakar li l-viżjoni tiegħi kienet totalment differenti! Niftakarni niddiskuti kemm baqa’ għall-Jamboree li jmiss u li se jiddispjaċini li tlift iċ-ċans li nkun parteċipant! Iż-żmien ħarab, ix-Xagħra Scout Group kompla jikber u f’kemm ilni ngħidlek fis-Sajf ta’ l-2010 ħarġu l-applikazzjonijiet biex tifforma parti mil-kontiġent Malti.

B’entużjażmu applikajt biex nesperjenza l-ikbar ġabra ta’ Scouts fid-dinja f’post wieħed, u l-flus bdew ħerġin! Ta’ min jgħid li l-ispiża mhix biss it-titjira u il-fee tal-kamp, iżda wieħed irid jarma bl-equipment meħtieġ bħal tinda u ħwejjeġ appropjati għat-temp li konna sejrin fih.

www.xaghrascouts.com

Xagħra Scout Group

Membru ta’ l-iScout Association ta’ Malta

Paġna 13 minn 16

L-iScout Xagħri - It-3 Edizzjoni - Jannar 2012

Il-ġurnata ġiet u f’kemm ilni ngħidlek wasalna fil-campsite enormi ta’ Rinkaby fejn kienu qed jaslu eluf oħra ta’ ISTs. Għadni niftakar il-merħba li tawna, kulħadd jsellimlek, jidħaklek, jsaqsik kif int u għandekx bżonn xi ħaġa! Kemm kienet tkun isbaħ id-dinja kieku kulħadd jkollu dak l-ispirtu f’kull ġurnata ta’ ħajtu! L-ewwel sfida kienet li nsibu t-tined tagħna peress li kienu tpoġġew f’post b’ieħor! F’temp ta’ ġurnata dorna kważi il-campsite kollha, ħaġa li kella tkun ta’ għajnuna kbira għalija u għal sħabi għax b’hekk tgħallimna il-campsite bl-amment.

Il-ġimgħatejn tal-Jamboree għaddew f’kemm ilni ngħidlek iżda l-memorji, il-kitba tiegħi fuq logbook u r-ritratt ma jmorru qatt! Peress li kont IST matul il-Jamboree kont mogħti xogħol li nqatta’ numru ta’ siegħat kuljum fil-Dining Area tal-ISTs. Flimkien mal-IST Patrol tiegħi, li kien iffurmat minn tlett scouts oħra mil-USA, Denmark u Sweden, qattajna siegħat naqilbu l-ikel, innaddfu jew naħslu kif wkoll ġibna flimkien il-Gold IST Experience Badge li fiha ridna nieħdu sehem f’sessjonijiet bħal ‘cultural differences’. Matul il-Jamboree għaddejt minn diversi esperjenzi u li ma tantx hawn spazju biex nikteb fuqhom, iżda tlett memorji imprezzabli huma l-Opening, Cultural u Closing Ceremonies! L-esperjenza ta’ unjoni u familjarita’ hi indiskrebibbli meta tisma’ lil kulħadd ikanta u jaqbeż ma’ xulxin waqt li l-bandiera ta’ kull pajjiż telgħet fuq il-palk! Il-Cultural Festival fejn kull kontingent preżenta ikel minn pajjiżu biex kulħadd iduqu, kienet esperjenza gastronomika tal-ġenn! Il-Villaġġ tal-Fidi kien wkoll esperjenza interessanti ħafna fejn irnexxili nifhem u nħossni parti minn diversi reliġjonijiet madwar id-dinja! Fl-aħħar ma ninsewx id-diskussjonijiet twal ma’ nies minn madwar id-dinja fejn skoprejt kemm hawn nies jaraw il-ħajja minn lentijiet differenti!

Nista’ ngħid li l-Jamboree bidilni.... meta tara 40,000 persuna miġburin b’għan wieħed, ġegħlni nirrejalizza li jien parti minn forza ferm akbar li kapaċi ‘NIBNU DINJA AĦJAR’! Kull darba li niltaqa’ ma’ diffikulta’, niftakar fil-familja mondjali tal-iScouts u dejjem insib kuraġġ biex nirbaħ kull ostaklu!

Daniela Sultana:

L-ewwel ħaġa li tiġi f’moħħi meta niftakar dwar il-Jamboree hija kemm hu b’saħħtu u enerġetiku l-moviment dinji tal-iscouts; kemm huwa attiv madwar id-dinja u kemm jadatta għall-bżonnijiet ta’ kull pajjiż. Fuq kollox, il-Jamboree ġgħalitni nirrealizza kemm hawn nies li jħaddnu dawk l-istess valuri li aħna nippruvaw inrawwmu fil-membri ż-żgħar tagħna.

Waqt il-Jamboree erġajna ltqajna ma’ Marc Crehan, scout Irlandiż, li żar Għawdex meta ġiet organizzata l-E-S.C.OUT fis-sajf tal-2009

www.xaghrascouts.com

Xagħra Scout Group

Membru ta’ l-iScout Association ta’ Malta

Ir-rwol tiegħi kien dak ta ‘Media Contact’.

Kuljum kien ikollna laqgħat ta’ informazzjoni dwar kif nistgħu nwasslu l-messaġġ ta’ l-iscouting lil nies li forsi għandhom idea differenti ta’ eżatt x’inhu dan il-moviment.

Kont ukoll nattendi għal konferenzi tal-istampa fejn kelli l- opportunita’ li niltaqgħa mar-re u r-reġina ta’ l-Isvezja,

Paġna 14 minn 16

L-iScout Xagħri - It-3 Edizzjoni - Jannar 2012 prinċep mill-Arabja Sawdita kif ukoll ma’ uffiċjali għolja mill-UNICEF, l-ILO, u l-WOSM stess.

Esperjenza li ma ninsix hija dik ta reporter fejn flimkien ma’ cameraman għamilna jumejn induru il-campsite sabiex inkun nista’ nikteb artiklu għal fuq pubblikazzjoni ta’ tifkira li ser tinbiegħ madwar id-dinja.

Mhux l-ewwel darba li kont nispicca nieqaf u nħares madwari nara dawk in-nazzjonijiet kollha miġburin f’post wieħed. Id-differenzi kienu jidhru: grupp mill-Korea t’Isfel kienu qed jgħinu lil xulxin jaqtgħu l-frenża – malli titwal ftit arahom iqaċċtu fiha! Tas-Sri Lanka kellhom mod għalihom ta kif iqaxxru l-banana, l-Amerikani kienu joqgħodu bl-uniformi l-ħin kollu, il-Musulmani ċċelebraw il-bidu ta’ l-Eid, min ried seta jiekol il-laħam halal, dawk vegetarians kellhom menu għalihom, għall-Asjatiċi kien hemm ir-ross kuljum. Skawts miċ-ċentru ta’ Lvant Nofsani kienu jilbsu libsa bajda... xita u mhux dejjem kienu jkunu nodfa! Ta’ l-Uganda telgħu l-iSvezja bir-rota għax ma kellhomx flus biżżejjed, it-tined talĠermaniżi kollha suwed u l-Eġizzjani ħerqanin jirrakontaw dwar ir-rivoluzzjoni!

Madankollu kien hemm elementi qawwija ta’ familjarita’ u unita’. Id-diversita’ ġo dik l-belt tat-tined ma kienetx determinata mill-bandiera differenti tperper f’kull kantuniera. Dawk il- kanzunetti li aħna nkantaw waqt il-campfire jafuhom l-iskawts kollha; l-futbol hu passatemp ta’ ħafna u, ferm iktar importanti, kollha konna hemm biex naħdmu għal dinja aħjar. Dinja li tagħraf il-paċi, li tħares id-drittijiet umani, ġenerazzjoni li tibza’ għall-ambjent ta’ madwarha.

Kien b’dan il-ħsieb li ħafna minna f’din il-Jamboree saru Messaġġiera tal-Paċi. Flimkien wgħedna li niftħu għajnejna għall-problemi li hemm fil-komunitajiet tagħna stess u, filwaqt li nħaddnu dawk il-valuri li bihom ħoloq il-moviment Lord Baden Powell, naħdmu bis-sħiħ għal żvilupp posittiv fuq kull livell.

Konkluzzjoni:

Kif qegħdin taraw minn l-esperjenzi ta’ dawn iż-żgħażagħ, il-Jamboree ħalla effett pożittiv fuq dawk preżenti. Il-ħbiberiji ġodda li bdew minn dan il-Jamboree huma ħbiberiji li jibqgħu kif ukoll il-memorji ser jibqgħu stampati fl-imħuħ ta’ dawk kollha li attendew il-Jamboree. Ħadd minnhom mhu se jinsa dawk il-ħmistax li qattgħu jgħixu taħt it-tined ġewwa l-villaġġ ta’ Rinkaby fl-iSveżja, il-ferħ li esperjenżaw bħala familja waħda, il-kilometri ta’ mixi li kellhom jimxu kuljum u l-maltemp kbir li ħakem speċjalment fl-aħħar jumejn. Marru l-Jamboree bħala 6 żgħażagħ li lesti ħalli jaffaċjaw avventura u ġew lura b’ideat ġodda ta’ scouting u b’ħeġġa li jaħdmu għal dinja aħjar kif ukoll ħalli jkunu messaġġiera tal-paċi. Kif kantaw waqt id-diska uffiċjali tal-Jamboree “I’m Changing the World”, huma qegħdin iħallu l-impatt tagħhom fuq l-iżvilupp tas-soċjeta’ li qegħdin jgħixu fiha.

www.xaghrascouts.com

Xagħra Scout Group

Membru ta’ l-iScout Association ta’ Malta

Paġna 15 minn 16