Stary Targ Insze wieca

„Gdo się za swój jynzyk wstydzi, takim niech się każdy brzidzi”

Fryderyk Jan Dral

Hań downi dycki grzebało sie w ziymi, coby w ni cosi posadzić

Insze wieca

SŁOWNICZEK

Cosi sie mi zdo, że to grzebani w cieszyńskich cestach i na inkszych placach uż wlazło w krew rotuzowym macheróm i ni ma na to widoków, coby zustało to zahaltowane. Wszyndzi słyszeć, że za chwilem bydóm sie brali za rynek i dzisio uż to grzebani trynujóm na starym bojisku, na kierym kiejsi grali fusbaliści downej “STALI”. Nie było słyszeć, czy rychlij tam jeździli po nim jacysi macherzi s georadarym, ale gdo wiy czy nie podarzi sie im tam wygrzebać ze ziymi jakichsi starych rozmajtych norychtów i inszych eszcze starszych wiecy. Chocioż możne, że nóndóm sie tam zagrzebane w ziymi jakisi stare tretery łod fusbalistów, a możne, że aji jakisi stary skórzany fusbal bez luftu. Bo przeca przez telkowne roki chłapcy po tym bojisku dziynnie gónili i na zicher dobrze go udeptali i skyrs tego ty rozmajte stare wieca kiere tam potracili, dobrze sie uległy. To naprowde bydzie wielko synzacyja, jak sie tam podarzi wygrzebać jakisi stare rosypoły, kiere obleczóne mioł na swojim zadku “Stalowiec” w kierych strzyloł “Piastowi “ bramy. Możne, że też podarzi sie tam nónś eszcze insze wieca, dejmy na to jakisi zar-zowiały gwizdek łod syndzigo, abo jakisi stare fanki, kiere dycki wbijane były do ziymi na biołej sztrajfce. Dobre by było, coby uż zawczasu nasze cieszyński muzeum rychtowało jakómsi izbe na ty znóndziónne wieca, bo możne bydzie ich tak moc, że chybi na nie placu. Dzisio mómy taki czasy a raczyj takóm modem, coby fórt łoglóndać sie do zadku i spóminać, jako to było kiejsi. Czy to je taki dobre, tego na nie wiym, ale myślym se, że lepszyj je sie dziwać dycki do przodku, bo to nic nie kosztuje. cesta - droga, wlazło - weszło, macher - specjalista, zahaltowane - zatrzymane, kiejsi - kiedyś, fusbaliści - piłkarze, rychlij - szybciej, nie podarzi sie - nie uda się, norychta - narzędzia, wieca -rzeczy, nóndóm - znajdą, tretery - buty piłkarskie, fusbal - piłka, luft - powietrze, na zicher - na pewno, skyrs - z powodu, sie podarzi - uda się, rosypoły - szerokie spodenki, obleczóne - ubrane, bramy - gole, nónś - znaleźć, fanki - chorągiewki, dycki - zawsze, sztrajfka - kreska, że chybi - że zabraknie, znondzióne - znalezione, fórt - ciągle, do zadku - do tyłu, dziwać sie - patrzeć się, dycki - zawsze.