KOMUNIKADO 28 febrüari 2012
Kampaña informativo di gobièrnu riba energia duradero
Willemstad – Ku un demonstrashon en bibu di funshonamentu di energia di solo, Promé Minister Gerrit Schotte komo e mandatario responsabel pa henter e sektor energétiko, a lansa e kampaña di informashon tokante di energia duradero. Entrante promé di yanüari 2012 kada kas i empresa na Kòrsou por produsí su propio koriente i asta por suministrá esaki bèk na ret di Aqualectra. Produkshon di koriente for di energia duradero por sosodé entre otro usando pènel di solo riba dak òf instalando un mulina di bientu. E dos aparatonan aki por hasi uso efisiente di respektivamente e solo i bientu ku nos ta haña grátis riba nos isla. E kuadro pa esaki ta e “Nota di Maneho Suministro di Koriente Duradero riba Eskala Chikí Kòrsou”, kual a keda stipulá pa gobièrnu di Kòrsou dia 16 di novèmber 2011. Den e Nota di Maneho tin pará e kondishonnan i preskripshonnan pa produkshon di koriente riba eskala chikí dor di kasnan di famia i usuarionan komersial. E Nota di Maneho aki ta un elaborashon mas aleu di e “Nota di Maneho Regulashon di Suministro di Koriente Kòrsou 2011-‐2015” den kua a deskribí e vishon i intenshonnan di maneho di gobièrnu riba tereno di suministro di koriente. Kampaña di informashon Den kuadro di e desaroyo nobo aki riba tereno di maneho di koriente riba nos isla, gobièrnu di Kòrsou a lansa un kampaña di informashon pa informá pueblo tokante energia duradero en general i pa stimulá produkshon i uso di energia duradero a base di fuentenan limpi ku Kòrsou mes ta disponé di dje, esta solo i bientu. Tambe e kampaña aki ta enfoká riba proveé tur detaye en konekshon ku regulashonnan i kriterionan pa por kuminsá ku produkshon di energia duradero riba eskala chikí i e suministro bèk di koriente. E kampaña di publisidat aki ta konsistí di entre otro ‘billboard’, avisonan den korant i spòtnan na radio i televishon. Ademas pa informashon mas detayá tokante kondishonnan i preskripshonnan di seguridat i kalidat, pasonan prosedural i otro puntonan di atenshon a publiká tambe un foyeto ku informashon konsiso i un buki ku informashon amplio. Ademas por haña informashon riba e wèpsait www.energiakonsiente.com of riba e página di Facebook Iya Energia.
Pagina 1 van 3
Suministro bèk For di momentu ku a anunsiá e posibilidat pa produsí koriente for di fuentenan duradero riba eskala chikí, tabatin vários reakshon for di komunidat, tantu di kasnan di famia i empresanan. Tin hopi interes pa e forma nobo aki di generá energia na Kòrsou. En partikular e parti di suministro bèk ta bastante atraktivo. E tarifa pa suministro bèk ta 40 sèn pa kada kWh pa e usuario ku ta produsí koriente pa kas di famia i pa empresa chikí òf 42 sèn pa empresa grandi. Es ku a hasi produkshon duradero riba eskala chikí i ku ta suministrá bèk na Aqualectra, ta keda kompensá a base di deskontá (verreken) entre e suministro bèk i e kompra for di e nèt públiko. Esaki ta e loke yama “netmetering” òf “traha a base di saldo”. ‘Keuring’ Naturalmente promé ku un kas òf empresa kuminsá produsí e koriente for di fuente duradero, mester enkaminá un proseso strukturá. Den e proseso aki kana bon tin ku kumpli ku tur regulashon i kriterio relevante. Den kurso di e luna di febrüari ya instansianan konserní manera DOW, Aqualectra, ekspertonan riba tereno di produkshon di energia duradero i e instaladó di e aparatonan pa generá koriente a hasi en total sinku ‘keuring’. A hasi esakinan tantu na kasnan di famia komo na empresanan. Di e ‘keuring’nan aki, tres ainda no a pasa e prueba, debí ku no tabata kumpli sufisientemente ku tur e rekerimentunan nesesario. Sigur e seguridat pa e kas òf negoshi mes i e seguridat di e konekshon riba e ret, ta mashá importante. Ademas e kalidat di e aparatonan i e instalashon den su totalidat mester ta riba un nivel haltu. Despues ku e kasnan di famia i negoshinan en kuestion hasi e adaptashonnan nesesario, tin e posibilidat pa nan pasa e keuring den forma positivo. Kurso pa instaladónan Naturalmente pa un instaladó sòru pa tur kos ta na òrdu ora di instalashon di sea un pènel di solo òf un mulina di bientu, e mester ta na altura di kua ta e regulashon i kriterionan ku e mester tene kuenta kuné. Pa e motibu aki, e reguladó di asuntunan di energia Bureau Telecommunicatie Post & Utiliteiten ta bai organisá den luna di mart un kurso pa instaladónan. Den kurso di dianan lo bini mas informashon tokante e kurso aki. Konferensha Pa finalisá e kampaña di energia duradero, riba dianan 29, 30 i 31 gobièrnu di Kòrsou lo organisá e konferensha: ‘The 2012 Curaçao conference/expo on the future of durable energy’. Durante di e konferensha aki lo elaborá riba importansha di energia duradero pa Kòrsou. Lo tin vários oradó internashonal ku lo profundisá riba e tema i ku lo hasi referensha na ‘best practices’ na nan pais den nan área di ekspertisio. Tambe lo tin oradornan lokal, manera entre otro Promé Minister señor Gerrit Schotte. Señor Schotte lo elaborá mas riba e maneho energétiko, ku ta distinguí nos di otro paisnan ku no semper ta formulá maneho promé ku introdusí kambionan òf inovashon riba tereno di energia. Banda di e konferensha tambe lo tin un eksposishon riba produktonan i servisionan ku tin di haber ku energia
Pagina 2 van 3
duradero. Esaki lo ta habrí pa públiko. Den luna di mart lo bini mas informashon tokante e konferensha aki. [FIN DI KOMUNIKADO] -‐-‐-‐-‐-‐-‐-‐-‐-‐-‐-‐-‐-‐-‐-‐-‐-‐-‐-‐-‐-‐-‐-‐-‐-‐-‐-‐-‐-‐-‐-‐-‐-‐-‐-‐-‐-‐-‐-‐-‐-‐-‐-‐-‐-‐-‐-‐-‐-‐-‐-‐-‐-‐-‐-‐-‐-‐-‐-‐-‐-‐-‐-‐-‐-‐-‐-‐-‐-‐-‐-‐-‐-‐-‐-‐-‐-‐-‐-‐-‐-‐-‐-‐-‐-‐-‐-‐-‐-‐-‐-‐-‐-‐-‐-‐-‐-‐-‐-‐-‐-‐-‐-‐-‐-‐-‐-‐-‐-‐-‐-‐-‐-‐-‐-‐-‐-‐-‐-‐-‐-‐-‐-‐-‐ Nota pa redakshon– no pa publikashon
Pa mas informashon: Jacques Heide Bosero kampaña publisitario di Maneho Nobo di Koriente Tel. 563-‐3717
Pagina 3 van 3