10 Los relativos

A. Formes de los relativos.

Los relativos son pallabres átones, n'oposición a los interrogativos y esclamativos, que coinciden na forma, pero son tónicos, fechu que nel so casu refléxase na escritura per aciu d'un acentu gráficu.

Los relativos son: que, quien, onde, u/au, como, cuando y cuantu -a -o. ex. quien nun paez asturiana ye Milina, a quien vimos picando na rampla ye a esos mineros, a quien nun convién dicir nada ye a Pelayo, de quien faló ye del cuñáu, quien son del país sábenlo bien. ex. cuanto mercó comiólo too, cuanto más tienen más quieren, regalaron llibros a cuantos-yos los pidieron, rióse de cuantes foron vela, nun tien cuanto fai falta.

“Que”, na llingua falada, pue sustituyir davezu a otros relativos, como ye'l casu de “cuando” ex. l'añu que nos conocimos morrió mio güelu.

“Quien”, morfolóxicamente, nun almite variación de númberu, anque sí ye posible la so combinación con verbu en singular o plural, y anque tamién concuerda con masculín y femenín, nun amuesa marques carauterístiques de xéneru.

Úsase namái ensin antecedente, anque pue tar precedíu de preposición.

“Onde” y “u” (tamién “au”), como relativos, presenten una equivalencia total en funciones y emplegos.

Ensin preposición equivalen en toles ocasiones a la secuencia “en” + artículu + “que”. ex. el pueblu onde vivo ye perguapu = el pueblu nel que vivo ye perguapu; los pueblos u hai trabayu tienen vida = los pueblos nos qu'hai trabayu tienen vida; l'agua onde metí les manes taba ferviendo = l'agua no que metí les manes taba ferviendo.

“Cuantu” presenta marques de xéneru (masculín, femenín y neutru) y númberu (singular y plural): cuantu/cuanta/cuanto, cuantos/cuantes. Úsase siempre ensin antecedente. Pue funcionar como axetivu o como sustantivu.

Cuando ye axetivu, precede siempre a sustantivos, nun pudiendo concordar en neutru. ex. cuantu pan mercó comiólo too, cuanta más allegría tienen más canten, regalaron llibros a cuantos escolinos-yos los pidieron, rióse de cuantes persones foron vela.

Cuando ye sustantivu sí pue referise en neutru a non cuntables.