16L’apostrofación

A. Apostrofación.

N’asturianu apostrófense namái estes pallabres: los artículos “el”, “la”; los pronomes “me”, “te”, “se”; les preposiciones “de”, “en”, “pa”; la conxunción o relativu “que”.

B. Apostrofación del artículu el

Apostrófase “el” nos siguientes casos: a) Cuando va siguíu de pallabra qu’entama per vocal o “h” muda. ex. l’amu, l’exe, l’imán, l’horru, l’orbayu, l’untu. b) Cuando va precedíu de pallabra qu’acaba en vocal, y siguíu por pallabra qu’entama per consonante. ex. rompió’l xarru, lleva’l xatu, fiende’l tochu, ye’l cura. c) Cuando va precedíu de pallabra qu’acaba per vocal, y al mesmu tiempu siguíu de pallabra qu’entama tamién per vocal, tien preferencia l’apostrófación p’alantre. ex. rompió l’exe, lleva l’armariu, tumbóse l’home. d) Si va precedíu de la conxunción “y” o del pronome “-y”, nun s’apostrofa, a nun ser que siga vocal o h muda. ex. ésti y el so hermanu, díxolo y l’amu nun entendió.

B. Apostrofación del artículu la.

Apostrófase “la” namái si-y sigue pallabra qu’entame per “a” o “ha”. ex. l’asturiana, l’hacha, I’amestadura.

C. Apostrofación de los pronomes me, te y se

Apostrófense “me”, “te” y “se”, respeutivamente, cuando-yos sigue pallabra qu’entama per vocal o “h” muda.

ex. hai que s’afitar, nun se m’escaez, nun t’enfotes.

D. Apostrofación de la preposición de.

Apostrófase “de” cuando-y sigue pallabra que comience per vocal o “h” muda.

ex. d’aquél, d’ésti, d’iviernu, d’home, d’Uviéu.

Nota. Nun se fai apostrofación en pallabres como éstes: dellos, delles (indefiníos), daqué, daquién, dafechu, darréu, dayuri, dacuando, dalguién... ex. dame delles uves, pero: dame les uves d’elles toma dellos (figos), pero: toma los d’ellos (de Xuan y Pedru).

E. Apostrofación de la preposición en.

Apostrófase “en” si-y sigue pallabra qu’entame per vocal o per “h” muda. ex. ta n’Uviéu, n’Avilés, n’abril, n’agostu.

F. Apostrofación de la preposición pa.

Apostrófase “pa” cuando-y sigue pallabra qu’entame per “a” o “ha”. ex. empobina p’Asturies, ye p’aguapecer el pueblu, son bien ruinos p’haber tantos.

G. Apostrofación de la conxunción y relativu que.

Apostrófase “que” cuando-y sigue pallabra qu’entame per vocal o “h” muda. ex. tien qu’entamar, ye más baxu qu’ésti, val más tener casa qu’horru, eso ye lo qu’hai.

Nota1. Enxamás s’apostrofa l’interrogativu y esclamativu “qué” ex. dime qué entamo, ¿qué home fai eso?

Nota2. Apostrofación de “que” + “el”: a) Cuando “que” va siguíu del artículu “el” y tres d’ésti apaez una pallabra qu’entama per consonante, faise l’apostrofación “que’l”. ex. quier que’l neñu fale. b) Cuando “que” va siguíu del artículu “el” y tres d’ésti apaez una pallabra qu’entama per vocal o “h” muda, faise l’apostrofación “que l’” ex. quier que l’amu cuerra, díxete que l’hermanu de ella yá lu tenía. c) Cuando “que” va siguíu del pronome “él” fai l’apostrofación “qu’él’”. ex. sabe enforma más qu’él.