SIDERHUSET OLA K

OPNINGSTIDER

Måndag – torsdag: 12.00 – 22.00

Fredag – laurdag: 12.00 – 24.00

Sundag: 12.00 – 20.00 (22.00)

Siderhuset stod tidlegare der den nye Spar-butikken står no, men då Knut bygde ny butikk i 1954 så vart den gamle flytta ned til sjøen. Så i dag driv Daniel restaurant heilt på fjordkanten.

Knut O. starta butikk og postaabneri på Naa i 1864. Sonen Ola K. Naa overtok butikken. Han bygde i 1912 huset som i dag er blitt restaurant. Etterpå kom det sjølvsagt ein ny Knut O. Naa. Så vart det sjølvsagt Ola K. Naa igjen.

Etterpå, då alle trudde at no kom det ein ny Knut O. så kom plutselig Daniel.

Men som Ola K. seier, han er oppkalla etter Knut.

-Vi hadde tenkt ei stund på kva vi skulle gjera med det gamle flotte huset, seier Daniel. Om vi skulle riva å byggja leilig- heter, eller kva? Så etter kvart som dette med sideren utvikla seg kom tanken om å laga ein restaurant der du i gode veners lag kunne få god mat og smaka på dei edle lokale dråpane.

Daniel som er eigar av huset, fekk med seg fagekspertise på restaurantdrift og såg på om det kunne vera håp for ein siderrestaurant på Naa? Bjørn Johanson opphavleg frå Skare, men med mange år på baken i bransjen i Bergen, der han no driv Pergola mat og vinbar. Bjørn tok turen til Naa, såg på tilhøva og høyrde på tankane som vart presentert.

I januar i år stressa Daniel litt, for tanken var å koma i gang til sommaren dersom ein skulle ta steget. Han tok ny kontakt med Bjørn som kom ein ny tur til Naa og tok med seg ein ven, Odd Einar Tufteland, opphavleg frå Fitjar men som i dag driv to restaurantar i Bergen, Cornelius Sjømatrestaurant og Restaurant 1887.

Etter nokre rundar, vart resultatet at dei starta driftselskapet Naa AS, der dei eig 1/3 kvar. Huseigaren starta på opprustingsprosjektet 1. februar. No rulla ballen fort, og han rulla natt og dag, i påskehelga og andre helgar. Plutselig hadde Naa fått klar eit hus med 100 sitjeplassar (60 corona-tilpassa) i to etasjar, saman med like mange plassar ute.

Restaureringa avdekka eit lokale med tømmervegger som står fram som eit soria moria slott til den bruk det i dag skal fylla. Nytt møblement med integrering av gamle innslag frå 1912 gjev ei sjarmerande heilskap. Det er ikkje vanskeleg å trivast her.

Restauranten tilbyr 3 rettars middag der menyen vert skifta kvar veke. I tillegg ein liten meny med smårettar for servering ute og ein to rettars lunch.

Du kan få Hardangersider frå 7 ulike lokale siderprodusenter. I framtida ser dei for seg at alle lokale siderprodusenter som ynskjer det, skal få sideren sin servert på Ola K. -Slik vil vi spegla mangfaldet lokalmiljøet tilbyr, seier Daniel

I tillegg seier Bjørn, som er kokk, servitør og vinkjennar, så vil eg påstå at vi faktisk har den beste vinkjellaren i Ullensvang. Vi synest at gjestene våre fortenar å få velja mellom eit utval av gode vinar. I sesongen vil det med fast tilsette og ekstra mannskap kanskje vera så mange som mellom 15 og 20 som har arbeid på Ola K. Sideren sin framvekst i Hardanger viser att, utan lokal sider ville det nok truleg ikkje blitt noko restaurantdrift på Naa. -Mange meiner sikker at vi uansett er steikje galne, seier Bjørn. -Men vi har tru på folk, vi vonar på dei lokale og på folk frå regionen rundt oss. Folk frå Bergen og at nokon kjem over fjellet frå aust. Saman med alle turistane som kan koma både langs vegen og etter fjorden, har vi tru på konseptet, seier Bjørn.

-Kva er tankane for framtida til siderhuset her på Naa, Daniel? -Eg drøymer om eit overnattingstilbod, i tilknyting til siderhuset OLA K. Vi har ei flott tomt her, så ei etablering av ein overnattingsstad, det hadde vore heilt supert. Vi har sett det no i vår at ballar rullar fort i fjæra på Naa. Plutselig, før du veit ordet av det kjem kanskje fjordhotellet OLA K. Eller kanskje hotellet må bli Knut O.

Det vert nok folksamt i fjæresteinane på Naa i sommar. Ta turen du og då vel.

Sigurd