Jakta på det blenkande gullet

For

Eidselva på Nordfjordeid er kjent for gode forhold, og etter at årets laksefiske opna natt til 1. juni er det fleire storlaksar som har vorte tatt.

Sjølve opningsdagen er så populær at sportsfiskarlaget held loddtrekning om kven som får kjøpe fiskekort først.

Grunneigarane i Eidselva er opptekne av at elva skal vere tilgjengeleg for alle. Slik har det vore heilt tilbake til stiftinga av Eid sportsfiskarlag i 1965. Laget vart stifta nettopp for å sikre tilgang for ein grei pris. Sportsfiskarlaget er ein ideell organisasjon som brukar eit eventuelt overskot på kultivering av elva.

Størst

Henning Langeland frå Nordfjordeid har førebels tatt den største storlaksen i år, då han sikra seg ein laks på 13,1 kilo.

– Eg er superfornøgd. Det er ein del stor fisk å sjå i elva i år, så det blir spennande framover, fortel laksefiskar Henning Langeland.

• Det er ein del stor fisk å sjå i elva i år.

Han fiska på sona Langeland. Då sat plutseleg stolaksen på 13,1 kilo på kroken. Den målte 109 cm, og vart tatt med sluk.

– Det har vore vanskelege forhold dei første dagane, med nordavind og svært kald elv, opplyser han.

Gullbilletten

Svein Aam frå Ørsta meinte han hadde trekt gullbilletten då han landa ein storlaks på 11,7 kilo i Eidselva på opningsfisket.

Og aldri før har Svein Aam fått større laks enn denne ruggen.

Det var klokka seks på morgonen at storlaksen sat på kroken på Alsaker.

– Eg trudde ikkje den var så stor, men ein kar måtte kome å hjelpe meg på slutten. Slike store fiskar tar det litt tid å få inn, og eg var redd det skulle slite, fortel Aam.

• Det er ikkje kvart år ein får fisk. Dette er gullbillett frå opningsfisket.

Men storlaksen på 11,7 kilo kom vel på land. Det er ny pers for den erfarne laksefiskaren frå Sunnmøre.

– Det næraste er ein på 11,5 kilo som eg tok i Bondalselva, fortel han.

– Dette var høgdepunktet. Det er ikkje kvart år ein får fisk. Dette er gullbillett frå opningsfisket, seier han.

Stor elv og store fiskar

Aam fortel han har vore heldig fleire år på rad.

– I år er ikkje elva så stor, og er mindre enn i fjor. Det er gunstig, og gjer at det er fiskbart fleire stadar. Men det er grusomt kaldt, fortel Aam, som er fornøgd med opningsfisket.

– Her på Alsaker vart det tatt to laksar på opninga, og det er normalt. Neste helg kjem eg tilbake for å fiske på Bjørlo. Eg likar å fiske tidleg i sesongen. Det er mest spennande. Då er det gjerne stor elv og store fiskar, sjølv om det er langt mellom dei aller største fiskane. Å få ein slik storlaks er utruleg kvar gong. Dette er årets første fisk for meg, og no er sesongen berga, seier laksefiskaren.

• Det var ein skikkeleg kubbe

Storlaksen var berre 100 cm lang, og fekk akkurat plass i frysaren.

– Laksen var av god stand og ein hannfisk, og det er ikkje vanleg at dei er så tette. Det var ein skikkeleg kubbe. Eg trur den må ha stått i elva ei stund, meiner han.

No vert storfisken røykelaks til jul. – Eg pleier å gi det i gåve til slekt og vennar, og no er det berga, smiler han.

Bra start

Det har vore ein bra start på laksesesongen i Eidselva, der fleire storlaksar har vorte tatt.

Her er dei største fangstane:

– 13,1 kg -Henning Langeland, sone Langeland.

– 12 kg – N.N., sone Stokkenes.

– 11,7 kg- Svein Aam, sone Alsaker.

– 11 kg -Thor Lien, sone Rotineset.

– 9,9 kg – Svein Aam, sone Alsaker.

– 9,4 kg – Christian Platou, sone Skipenes.

INGEBJØRG NILSEN ins@fjordabladet.no

OPNINGS­

FISKE: Svein

Aam sikra seg storlaksen på 11,7 kilo under opningsfisket i Eidselva.

FOTO: PRIVAT

Her kan du huske i det fri

Oppe på Gildra ved Hjelle har du god utsikt over Eidsdalen.

Her kan ein også prøve huska som er hengt opp. Kva er vel betre enn å føle vinden i håret medan ein nyt å vere ute naturen?

Huska på Gildra er også eit populært fotoobjekt.

FOTO: BARNAS TURLAG