IV. SALUBRIDAD
Cortamento den e presupuesto medico di AZV memey di un crisis di salubridad, mester wordo mira como un infraccion grandi contra e pueblo di Aruba, culpando Hulanda eroneamente. Vision di nos partido ta pa garantisa cuido medico cualitativo, accesibel y pagabel pa un y tur den cual e pashent ta central. Lo traha riba e necesidad urgente di un bon maneho di prevencion. Cuido, prevencion, innovacion, estudio, cooperacion y intercambio di experticio mester bay man den man cu otro pa garantisa calidad di nos cuido.
Garantisa cuido medico cualitativo
Plan di accion: • Promove bida saludabel, haci cuminda saludabel mas accesibel y promove movecion y deporte; • Duna e dokternan di cas e manpower pa por percura pa personal di apoyo den servicio pa asina dokternan di cas tin e posiblidad pa duna servicio di calidad halto; • Analisa e posibilidadnan pa haci PET-scan na Aruba posibel, como tambe e camber hiperbarico (Hyperbaric chamber) y endoecografia digestivo y respiratorio; • Explora e posibilidad pa trece 1
specialista pa 1 siman pa opera un grupo di pashent cu di otro modo mester a wordo manda pa exterior, asina garantisando calidad na un costo mas abou; • Upgrade Fundacion Respaldo cu personal y presupuesto pa por atende casonan mental y emocional, debidamente; • Aumenta eficiencia ora di manda un pashent den exterior; • Trece ekiponan y experto Aruba y na mes momento promove “medical tourism” como un pilar economico;
• Converti Dr. Horacio Oduber Hospital den e hospital principal den Caribe Hulandes den “Dutch Caribbean Hospital Alliance””; • Implementa e “Instituto di Calidad” debidamente y di forma obhetivo pa un cumplimento debido pa cu e ley di AruBIG actualisa; • Lo envolve tur nos profesionalnan y expertonan destaca den cuido medico den e proposito grandi pa crea un pueblo saludabel.
