nguangin kruna-kruna resmi di cerpén (Gdé Aryantha Soethama

Sorotan Cerpén

nguangin kruna-kruna resmi di cerpén

Sesai para pangawi novélé marasa kéweh yen dot nulis cerpén. Para pangawi ento suba biasa nulis adéng-adéng, baanga imajinasinné membah, nulis lantang-lantang, aluh nglimbakang alur, tokoh, lan carita. Dugasé nulis cerpén para pangawi marasa kéweh ulian suba biasa nulis lantang-lantang.

Cerpén merluang kawagedan nyatua apang lebih bawak, langsung, nyidang matesin panglimbak carita. Suba pasti, pangawi novél musti bani munggel imajinasinné dugas mutusang satua ané gaéna musti suudang utawi pragatang. Yén tusing kéto, pangawiné ento buin lakar nulis novél, boya cerpén. Utawi bisa dogén pangawiné ento buin ngaé novél.

Bisa dogénan dugase pangawi mutusang nulis novél, pangawiné ento jag megat tengah jalan, krana pangawi meled lakar nulis cerpén. Pangawi sing ja ngelah materi ane pas lakar anggon novél. Kéwala, yén dadian cerpén jag bas lantang. Raris, ipun suud nulis. Novél tusing pragat, cerpén masih tidong. Pegat.

Sakéwala liu masih cerpén ane orahanga luung dadiang novél manut pangawinné. Kéwala ipun marasa musti ngoyong akejep nulis, majadengan, negepin cerpénné aji kembangan tokoh, alur, apang nyidang dadi novél. Pangawiné mutusang, depang suba cerpén malu, buin pidan mara kembangang dadi novél. Iraga liu nepukin novél ane madasar ulian cerpén ane kembanganga. Uli cerpén dadi novél. Liu masih pangawi ané ngaku, liu ada selah ngembangang cerpén dadi novél bandingang tekén ngringkes novél apang dadi cerpén. Ento mirib awanané ada pangawi ané dueg nulis cerpén, kéwala tunan yén nulis novél. Ada masih pangawi novél ané sasai tusing nyidang nulis cerpén. Dadiné ada cerpén ané bes lantang, bun satuane bes kembanganga, awinan tusing fokus, cara carita tusing pragat, jag magantung.

Sakéwala tusing bedik pangawi novél ané cerpénné luung, novélné masih luung. Ia nawang sajan amongkén lantang satuané yén lakar nulis cerpén, apang tusing bes nglimbak kema mai. Silih tunggil pangawi ane cerpén-

cerpénné luung tur patuh luungné ajak novél-novélne tuah Ketut Sugiartha. Cerpénné “Rikala Gering Agung” ane muata di SSB nyinahang kawikanané. Cara ane sinah di cerpén miwah novélné, Ketut Sugiartha ngelah kawagedan nulis dialog ane rapi, tertib, lancar, lan idup. Kéwala, enu masih ngenah kabiasanné nulis novél di cerpénné ané ené. Lebih teken sepertiga pamungkah cerpénné enu ngorahang unduk pandemi, dialog ane lantang antartokoh, awinan pangwacén bisa dogénan megatang dialogé ento tur dot lakar langsung ka panyuud.

Unteng cerpén ené tuah nyatuang unduk ibu-ibu ané madagang roti pagaénné padidi, tur dot sajan éngkén ja carane apang nyidang muputang pakéweh ragane ngalih arta brana sadugasé pandemi. Dagangané matumpuk tusing laku, laut pianakné ngelah ékan-ékan ngadep roti online. Satuané lengut, yadiastun iraga tusing makatang latar Balinné. Dialog ibu ajak pianakné makadadua, satuanné rapi sajan, tur karasa resmi sajan. Kéto masih dialog antartokoh di HPné karasa resmi, tusing nyinahang paguneman anak padapada bajang truna ané sedeng matunangan. Krana resmi, cerpén ené karasa serius. Mirib mula keto liunan cerpén-cerpén ané lekad rikala pandemi: tegang lan gawat.

Yén iraga nlektekang sajan dialog-dialog ané ada di cerpén-cerpén Bali Modérn, dialog aji basa resmi sasai sajan tepukin iraga. Mirib ené tuah ulian suba biasa ada dialog antarkasta sarahina, awinan basané dadi alus sajan tur jagana apang santun. Di cerpén Ketut Sugiartha ané jani, dialogé ané santun ento marasa sajan jagana apang rapi. Ketut nganggon frase “angayubagia” di

cerpénné. Ené ané sasai tepukin iraga di dialog resmi, sasai masih anggona di pidarta-pidarta para pajabat.

Pangawi cerpén Bali Modérn patut sajan nguangin kruna-kruna ané bas kaliwat santun ené; apang cerpén-cerpén para pangawi ento tusing maserod dadi “cerpén resmi”. (Gdé Aryantha Soethama/ kabasabaliang antuk IGA Darma Putra)