manah kuning manguning (Ni Wayan Juni Fortuna Déwi

Satua Cutet

manah kuning manguning

Semengané rahina Saniscara Kliwon Wuku Kuningan, tatkala krama

Bali sami sampun sayaga pacang nglaksanayang upacara Kuningan.

Suaran gong, kidung, miwah miik dupané sané kalintang nyangluh

ngawinang jagat Baliné satmaka suargan sané kalintang trepti.

Cara biasané Putu jam 7 suba bangun lakar masuk masekolah,

sakéwanten ané jani ia bangun wiréh lakar nyayagayang sakancan

ané mapaiketan tekén rahina Kuningan.

Ni Wayan Juni Fortuna Déwi

Yén nuturang indik Putu di jumah, ia mula anak jemet pisan. Yén unduk rupané ia mula anak bagus, tur kenyemné manis. Jumahné ia tusing ngelah apa-apa. Méméné sadina-dina tuah magarapan di peken madagang canang. Lan bapané magarapan di cariké. Yadiastun ia tusing ngelah apa-apa nanging ia demen pesan matetulung ngajak pisagané, turmaning demen manyama braya.

Kacaritayang ané jani Putu lakar ngatehang méméné maturan ka pura. Ditu lantas Putu ngandéng méméné ngaba banten abana ka pura. Sabilang rahina Kuningan mula ia sai maturan ka pura-pura. Tanpa sangkan ditu lantas ia macaplagan ngajak anak luh jegég pesan, Asih adané. Kanti telah ulung sarwa woh-wohan ané ada di bantenné. Ditu lantas Putu makesiab saha paling lakar nulungin anaké jegég ento nampedang woh-wohané ané pada nglilik.

Wayan Jengki Sunarta

“Gég… ten kenapi?” Kéto Arnawa nakonin anaké jegég ento sambilanga nulungin anaké luh ento.

“Ten, Bli, banggiang ampun tiang mrasidayang nika padidian.” Kéto abetné anaké luh jegég ento.

Sedeng iteha pada nyemak who-woh ané ulung ento, tan pasangkan limané ajaka dadua saling magisian, tur ngawinang paningalané saha saling atonang di tengah purané ané sedeng raméné ento. Tatkala saling atonang sareng kalih, tan pa sadar di kenehné Putu ngomong, “Duh... adi jegég ajan anaké luh ené,

kulitné kuning langsat, alisné madon intaran, turmaning kenyemné manis pisan. ”

Sakéwala ia nu inget tekén déwékné ané lacur, sing ngelah arta brana. Ditu ajaka dadua iteh pisan saling atonang, kanti makejang anaké di pura nyuryakin. Lek pisan kenehné ajaka dadua.

Sekat ento, Putu buduh paling ngajak anaké luh ento. Makita makenalan ia tusing bani, krana ia nawang tekén déwékné lacur, sing pantes lakar mademenan ngajak anak luh buka Asih.

Gelisin carita ritatkala para pamedeké suba suud pada ngaturang bakti, Putu maniang raga maekin Asih saha takut-takut bani di kenehné.

“Gég… ampura nggih wau tiang ten sengaja, ngaé Gég ulung,” kéto omongné Putu.

“Nggih Bli ten knapi,” kéto pasautné Asih saha lek di kenehné marepan

ngajak anak muani bagus buka Arnawa.

“Yén dados tiang uning Gég uli dija, sira nika wastané?” Arnawa matakon

tekén Asih.

“Tiang Asih, umah tiangé di dangin jalan purané Bli, bli saking dija nika?”

“Tiang uli badaja, umah tiangé 200 meter saking purané niki Sih,” kéto

pasautné Putu.

Sekat ento Asih ajaka Putu dadi matimpal tur WhatsApp sabilang wai. Ulian ento lantas tumbuh Bungan-bungan tresna ajaka dadua, uling pidan

kadén tresnané ento tumbuh, tusing pedas baan ngenehang. Ulian tresnané ané suba tumbuh, lantas ajaka dadua ngadungang tresna, tur majanji lakar satya ngantos mati. Tresnané ajaka dadua lantas kauningin olih reramané Asih. Bapané Asih gedeg pesan tekén tingkah pianakné matunangan ngajak anak lacur buka Putu.

Kacaritayang lantas bapané Asih teka ka umahné Putu saha bangras ngaukin Arnawa.

“Éh! Nyén madan Putu, mai paakang iban cainé, bani cai nemenin pianak awaké, singké cai inget tekén déwék cainé lacur buka kéné, sing nyidang lakar ngaé pianak awaké bagia.

Pesu lantas Putu ajaka méméné, “Sapunapi nika Pak, tiang uning

kaiwangan tiang nemenin pianak Bapa, sakéwala baan kaliwat tresna tiang tekén Asih, saha tiang engsap tekén déwék tiangé kalintang tuara. ”

“Nah yén suba cai ngerti, ané jani johin pianak awaké, awak sing sudi ngelah mantu lacur buka cai,” kéto bangras pasaut bapané Asih.

“Ampura Bapa, tiang ten mrasidayang krana tiang tresna banget tekén Asih,

tiang uning tekén déwék tiang lacur, ané jani icén tiang galah apang tiang nyidang ngruruh merta ané becik di guminé ené, apang tiang nyidang ngaé Asih bagia,” kéto pasautné Putu saha sedih.

Mirengang raos buka kéto, jeg maklieb sebeng bapané Asih, saha inget tekén déwékné suba kalintang angkuh, tekén déwék sugih. Sebeng bapané Asih ané tuni bangras, jani maklieb dadi sebet. Mara ngrasayang kapitresnan Putu tekén pianakné ané kalintang sujati. Bangga pesan di kenehné nepukin anak muani suputra buka Putu. Liang pesan manahné Putu krana suba polih restu saking bapané Asih. Sekaté ento, Putu majanji lakar jemet malajah, tur ngamolihang pakaryan ané nyidang ngaé Asih bagia, tresna sujatiné ané banget kasayangang.