bug! (I Putu Supartika

Satua Cutet

bug!

Ia tusing nyidaang pules. Padahal ia dot pesan apang dinané

jani nyidaang pules selidan. Apabuin, maniné ia harus bangun

semengan, ngojog ka kamar mandi, kayeh, mapenganggo, laut ka

umah timpalné lakar malali manut rarincikan ané suba gaéna ajak

timpalné.

I Putu Supartika

Tingalina jam di témbok kamarné, suba jam 22.00 Wita, lan ia ondén marasa kiap nang abedik. Lampu kamarné matianga lan ia mukak jelanan kamarné laut negak di korsi ané ada di malun kamarné. Petengé jani sepi pesan, tusing ada munyin jangkrik ané biasané ngering, kéto masih tusing ada munyin celepuk. Langité selem, gulem, lan anginé kesir-kesir ngaénang dingin. Mula biasa, sabilang peteng, rikala lakar pules ia ngamatiang makejang lampu di kosné. Kabenengan dugasé totonan kosné masih sepi, tusing ada nyén, ané makada tongosé totonan sayan peteng krana sandingan kosné tusing ada ngendihang lampu. Balon lampu di natah kosné suba aminggu mati.

Uli kantongné, ia mesuang bungkusan roko filter lantas auda akatih tur slepitanga di bibihné. Lima tengawané buin nyeluk kantong celanané nyemak korék gas. Ada endihan makebyar uli koréké totonan satondéné mati tur nyisaang endihan roko di bibihné ané ngenah cara baleman ané ngreres nagih mati.

Wayan Jengki Sunarta

Makelo ia negak di malun kamarné sambilanga nerawang kemu mai. Nerawang langit ané gulem, nerawang ka kamar kos ané ada di sampingné lan tepukina ada panyemuan ané tusing misi baju. Ia nyemak HP ka kamarné tur malipetan negak di duur korsiné. Endihan HP-né ngaénang muané ngenah tinglis krana tuah ento dogén endihan ané ada ditu sajabaning endihan rokoné.

Uli di layar HP-né, ané jani ngenah suba jam 22.30 Wita, lan tusing marasa 30 menit ia negak di malun kamarné. Lan tusing karasa masih, suba telung katih ia nelahang roko. Sakéwala ia tusing marasa kiap. Biasané, kali jani yén mula tusing ada gagaén apa, ia suba nyidaang pules lan jani pantesné ia suba nyidaang ngipi, yén sing kéto ia suba maan pules asriepan. Dikénkéné ia lakar bangun jam 22.45 Wita, ngojog ka kamar mandiné, ngenceh tur malipetan ka kasurné laut ngengkis.

Krana kanti jani ondén marasa kiap lan di sisi karasa sayan dingin, ia macelep ka kamarné. Jelanan kamarné tusing lanteganga, tuah unebanga agigis, lan yén ada angin baret pintuné totonan pasti lakar mampakan.

Di duur méjané ada laptop. Makeneh lantas ia lakar mabalih filem ané idiha selidané. Ia ngidupang laptop, mukak tas tur nyemak hard disk tongos filem ané mara idiha uli timpalné. Liu pesan ia maan ngidih filem lan liunan genre kriminal, sisané tuah filem romance. Ia mula tusing ngorahang tekén timpalné satondéné ngidih, filem apa ané lakar idiha.

“Baang iang ngidih filem apang ada anggon bekel di kos,” kéto dogén ia

mamunyi tekén timpalné sambil ngenjuang hard disk. Timpalné nyemakin hard diskné tur nyelekang di laptopné.

Ngawag ia mukak filemé totonan lan tusing urati tekén apa judulné. Ané penting ia mabalih filem, lan nyén nawang unduké ento ngaénang ia kiap lan énggal nyidaang pules. Yén alih benehné, ia tusing demen mabalih filem genre kriminal. Apabuin misi ngesyab-ngesyabin ngaénang tangkahné nurdar.

Lénan tekén ento, ia tusing bani ningalin getih, nepuk anak kena témbak, wiadin anak kaplegandang kanti magetih-getih. Dikénkéné yén ada timpalné

ngajak mabalih filem genre kriminal, ia setata nulak. Kudu-kuduné nyak, yén suba lakar ada adegan témbak-témbakan, majaguran, mlegandang anak, ia lakar nyaru-nyaru: ngudik HP, ngenjit roko, utawi magedi ka kamar mandi yadiastun tusing makita ngenceh.

Ané paling demenina tuah filem baud cara Mr. Bean utawi Warkop DKI. Ia lakar kedék ingkel-ingkel kanti mesuang yéh paningalan.

Nanging ané jani tusing ada filem baud lan tusing masih ada filem ané seken-seken demenina ditu. Apabuin tekén filem romance, uli duang tiban ené ia seken-seken mula paling sing demen. Krana ngaénang ia inget tekén unduké ané suba liwat, dugas ia enu mademenan ngajak Sinta, tunangané ané nyuudin déwékné. Dugasé enu mademenan, demen pesan ia ajak I Sinta mabalih filem genre romance lan ané abulan bisa ping pat ia ka bioskop lakar mabalih filem cara kakéto. Yén sing ka bioskop, biasané ia utawi I Sinta ané ngidih filem romancé tekén timpalné tur pabaliha bareng-bareng di kosné.

Disubané kasuudin olih Sinta, filem romance ngaénang ia nyansan sakit. Yéh matané lakar ngembeng, lantas tusing jaen madaar kanti dua wai. Mabalih filem romance, lakar ngaénang tatun tangkahné mentik lan ia lakar sebet tur tangkahné engsek.

Mara filemé majalan, suba ada adegan ané ngaénang ia ketug-ketug. Tepukina ada anak luh magetih-getih paida tekén anak muané mawak gedé tur brengos. Ia ané mula tusing bani ningalin getih, ngénggalang ngaud roko akatih tur kaenjit. Nyaru-nyaru tusing nepukin adegan filemé totonan sambilanga ngeprusang andus rokoné kemu mai.

Disubané adegan filemé totonan maganti, mara ia nlektekang layar laptopné. Di filemé ada anak nutur, lan ia tusing pedas ningehang apa ané tuturanga. Kenehné tusing ja seken mabalih filemé totonan, krana sujatiné ia dot nyidaang kiap lan nyidaang pules selidan.

Nanging, nyansan ia makeneh apang nyidaang kiap, nyansan ia tusing kiapkiap. Ia bangun uli tegakané sambilanga ngeprusang andus rokoné, nyedot

sisané ané suba bawak, ngamatiang potokané baan noonang ka asbaké, laut ngagagang pintu kamarné tur masliahan. Di laptopné, filemé enu majalan lan ngédéngang adegan témbak-témbakan. Ia majujuk di malun kamarné tur matolihan ka kamar di sampingné. Sepi lan peteng.

Ia malipetan ka kamarné, rikala témbak-témbakan di filemé suba suud lan maganti ngédéngang anak luh macangkling di korsiné lan bibihné kasegsegin kain. Pintu kamarné tusing lanteganga. Di filemé, ngenah anaké luh totonan katijang-katijeng apang nyidaang ngelésang tegulan awakné sambilanga kraikkraik, nanging munyiné tusing pedas kadingehan krana bibihné bek misi kain. Tusing lantas ia negak di malun laptopné, nanging ngojog ka kamar mandi lakar masugi. Lampuné mati lan magabag-gabagan ia nyemak cédok, nyéndok yéh, tur nguap muané aji yéh. Tusing kakeneh masih baan déwékné nguda ia masugi, nanging tetep dogén ia nguap muané aji yéh.

Disubané ngelapin muané, ia pesu uli kamar mandi. Adegan di filemé suba maganti dadi anak luh muani tusing mapengango masiat di duur kasuré sambilanga daat-duut. Ia ngidupang layar HP-né lan ningalin jam. Suba jam 23.36 Wita. Ajam lebih ia mabalih filem lan ia masih kondén marasa kiap.

Ia gulak-gulik di kasurné tur dikénkéné paningalané nyeledétin filemé ané enu majalan. Makeneh-keneh ia apa ané makada kanti kali jani ondén nyidaang pules. Takut ia tusing nyidaang bangun semengan yén kanti liwatan tekén jam roras ondén nyidaang pules.

Gagéson ia bangun tur ngojog ka méjané. Ia negak di malun laptopé tur limané nyemak HP, masang alarm jam 05.00 Wita. Ia nganti nada alarm-né baan lagu In The End-né Linkin Park apang kadingehan lan ia nyidaang bangun.

Filemé ané jani ngédéngang anak muani ajaka tatelu macelep ka tongos anaké luh macangkling. Ngenah muan anaké luh totonan takut pesan rikala paakina tekén anaké muani-muani totonan sambilanga katijang-katijeng. Ané muani ajaka dadua majujuk di samping tengawan lan tengébot anaké luh

totonan. Anaké muani bin besikan kedék di malun muan anaké luh satondéné

nampél pipiné. Saru-saru bucun paningalané nlektekang filemé totonan lan tangkahné kesyor-kesyor.

Kénkén kadén undukné, anaké muani ané nampél pipin anaké luh laut ngojog ka lacin méjané lantas nyemak palu. Ia malipetan sambilanga néngténg palu tur maakin anaké luh totonan. Paluné totonan enteganga di gidat anaké luh, lan ia sayan takut sambilanga mautsaha apang tegulan awakné di korsiné nyidaang kelés.

Lan kénkén kadén masih undukné, sagétan ia marasa ada ané ngentug di sirahné tur marasa nyeng. Tangkahné nyansan nurdar, lan lima batisné ngejer. Adéng-adéng ia makipekan ka duri lan di maluné tepukina anak muani mabaju selem ngaba palu. Ondén seken ia nepukin muan anaké muani totonan, subarengan ajak adegan di filemé, sagétan anaké muani totonan suba nganyunang palu ka sirahné. Ia tusing nyidaang makelid lan bug!

Jam 05.00 Wita munyin alarm kadingehan di HP-né ngendingang lagu I Cum Blood.

puisi-puisi i putu pradnyana anggaraWayan Jengki Sunarta