1 minute read
geguritan bangbang wétan (IBW Widiasa Kenitén
Geguritan
geguritan bangbang wétan
Advertisement
IBW Widiasa Kenitén
Ginanti
/1/
Rigelis Kinanti matur, daṡa paramārtha ening, sesuluh bantang geguwat, ṡila budhi yaṣa kérthi, kertha idhep banban solah, ulah ayu raṣa tṛepti.
/2/
Tapa ṡidha ṡudha nglantur, tapas panes ngeseng branti, tilik telek tekek tikas, muceh muñcal mañcut paling, aling-aling ngubet meseh, puun lina tan pageni.
/3/
Katah margi tapa ayu, tapa ngalong wit Subali, nglanting tan péndah lelawah, ṡidha asung Sanghyang Widhi, mawiṡéṣa kukuh kebal, sarwwa ripū nilar mingir.
/4/
Duryudhana kebal teguh, tapa danu kamarginin, lwir mina tan kabebekan, kebal ri sarwwaning wṛeni, ngodag-odag nguragada, Kunti Putra nyaup nigtig.
/5/
Sang Arjuna kukuh tulus, tapa nguleng bhakti ening, waranugraha Hyang Ṥiwa, astra mantra cadhu ṡakti, wibhu prabhu jnyana kriya, ri hṛedaya lwih nunggil.
/6/
Ong Namaṡiwaya putus, uncarakena ri ati, Namabudhaya ri dalem, kabantangin ṡilayukti, menga kayun menga idhep, ingan ngumbara mamargi.
/7/
Brata pamarginé ayu, pūrnama tilem mamutih, aji brata katah munggah, phala gantung sarwwa ubi, kājeng manut sengker dina, bagya angga waras panggih.
/8/
Panglong ri Tilem Kapitu, brata kala Ṥiwaratri, jagra mona upawaṣa, Sanghyang Ṥiwa ngalingganin, tyaga budhi galang idhep, Ṥiwa puja kaulengin. (pacang kalanturang....)