puisi-puisi komang sujana

Wayan Jengki Sunarta

puisi-puisi komang sujana5

5 Puisi Bali puniki kawedar wantah saking kerjasama Suara Saking Bali sareng Balai Bahasa Provinsi Bali.

I Tambulilingan

Lingsir sanja Ri kala ujan riris blabur kapat Ditu di tungtung I Sekar Gadung I Tambulilingan magelut rumrum Tan ngétang jagaté nedeng gempung

Ajum ring I Kupu-kupu muani Ané nedeng sedih ngungun Kélangan bungan ati Kadaut tepis kuning I Kekawa pelung

I Tambulilingan nyansan kasemaran Matemuang kamané ngungkung Ngigel ngisep sarin-sarin I Sekar Gadung

Miik I Sekar Gadung telas Patemon semarané panelas Matilar ngindang I Tambulilingan Kairing kaipolasan suaran I Kedasih kalaran Paling ngalih genah pakaeman

I Sekar Gadung mangkin ludus Katempuh anginé ngasirsir jalir Runtuh nempuh don cengkéhé latuh Dadi kesiab I Paksi Puuh

Nyilib di betén don candungé tuh Kimud katinggal ané luh

Buin pidan tiang cara I Tambulilingan Ngisep sekaré tan palarangan Ngolég siang latri sakita ati

Tajun, 1 Oktober 2021

Dén Bukit

Danu Buyan lan Tamblingan para janané masliahan Égar masraya kanti madasar basa aké cai nani Ngréka smara ring Gitgit rauh Pasisi Lovina para torisé masesanjan Buléléng genah malajah kaloktah Kota Pendidikan Utara Bali dwipa genah Gedong Kirtia kauparengga sakancan susastra Ki Barak Panji Sakti kairing Bala Goak mélanin gumi matoh pati Igelan Truna Jaya lan Gong Kebyar maka wit nyangkepin seni budaya Bali Tajun ring Pura Bukit Sinunggal ngruruh Sang Hyang Tunggal

16 Maret 2022

Lovina

Ri kala galang kangin Mapag sunar bingar matanai Sakadi kenyung adi Satia ngantosang di pasisi

Kondén telah baan nuturang Semayané lintang ané lakar jalanang Kapapag doosan ombaké Dados pakesiab I Yuyu gadang Kimud ketara

Ngintip iraga di lepitan akah-akah ketapang

Jukungé majalan Mamelah ombak segara jimbar Ri angin saling makabar Ri i kedis kokokan ngedum égar

Jukungé pajalané banban Kapapag igelan lumba-lumba maruyuan Ané suba sadia ngantonang Beli lan adi bagia magisang tangan

Pasisiné nyansan marawat-rawat Bukité katon joh sawat I Bendéga mamargi sayan jambat Cara tresnan iragané kaliwat