1 minute read
puisi-puisi désak gedé setyaningsih
Wayan Jengki Sunarta
puisi-puisi désak gedé setyaningsih7
Advertisement
7 Puisi Bali puniki kawedar wantah saking kerjasama Suara Saking Bali sareng Balai Bahasa Provinsi Bali.
Sat Kerthi Loka Bali
Surya ring pasisi kangin medal Matangi sami panjak ida Ngiring mangkin cakupang tangan Bakti ring Sang Hyang Widi Wasa
Alus adung kidung lan gamelan Rejang Déwa Baris Gedé mesolah Suara genta ngiring wirama mantra Nunas ica ring Parama Kawi
Nyujur Atma Kerthi Danu Kerthi Wana Kerthi segara Kerthi Jana Kerthi Jagat Kerthi Malarapan antuk Gema Santi
Nangun Sat Kerthi Loka Bali Sikiang manah suci subakti Semeton sami rahayu santi Dumogi jagat Bali lestari
Satra Kintamani
Duur langit bintang mekenyir Nongcrét magending pada sautin Dingin ngasirin makukup saput Luung bayu payu makenyem
Sayong di Satra Kintamani Kembangsari pinaka saksi Bubuh macampur waluh Dugasé enu alih-alihané aluh
Séla togog matambus arang Masisir-sisir kikihanga nyuh Kasiratin baan gula juruh Nyanggluh manis mara kinyukang
Ngidu di paon tiing sulut Ngopi selem pait Banyuatis Mawadah lumur cékot ngaduk Prajani jaen idupé, Luh
Mabasa Bali
Numitis lekad di Bali
Tiang idup di Bali Demen atiné mabasa Bali
Ngajak rerama mabasa Bali
Sabilang wraspati mabasa Bali Ngajak timpal mabasa Bali Ngajak guru-guru mabasa Bali Kola eda patuh mabasa Bali
Anggén ngiket pasawitran sami Kaloktah dura negara mabasa Bali Mawinan turisé akéh rauh ka Bali
Sareng malajah mabasa Bali
Ngiring sareng sami mabasa Bali Mabasa Bali punika budaya Bali Nénten iwang raga mabasa Bali Jagat Bali mangda ajeg lan lestari
Désak Gedé Setyaningsih, makarya ring SD Negeri 2 Pesinggahan, Klungkung