tarot, sang semara (Ni Wayan Marti Mégasari

Satua Cutet

tarot, sang semara 1

1 Satua cutet puniki kawedar antuk kerjasama Suara Saking Bali sareng Balai Bahasa Provinsi Bali.

Tiang wantah marasa érang pesan, ri kala ningalin Luh Maya

ngédéngang atumpuk kartu-kartu ané misi gambar serem-serem ento.

Tiang érang pesan, sawiréh tusing makejang unduké di guminé,

nyidaang pastika baan narka. Tiang tusing percaya tekén ramalan.

Ni Wayan Marti Mégasari

Tiang kenal ngajak Luh Maya dugasé ia pindah umah ka samping umah tiangé. Dadiné iraga mapisaga. Dugasé ento, ia enu dadi murid SMP nanging tiang mara kelas satu SMA. Ngawit uli ento, Luh Maya dadi pisaga muah timpal tiangé. Luh Maya ento liu ngelah buku komik wiadin novel, ia liu ngelah timpal di sekolah tur anteng nguopin reramané. Ia masih urati pesan ngajak kulawarganné miwah timpal-timpal ané lénan. Sagétan suba makelo matimpal, sai-sai tepukin tiang Luh Maya suba dadi nak luh kelih tur jegég. Makelo-kelo, ada masih rasa ané lénan tekén rasa matimpal di keneh tiangé tekéning Luh Maya.

“Cobak tingalin tiang kartuné Bli Adit malu pok néh.”

Pasautné Luh Maya sahasa nyemak kartuné saka besik, tur rerodanga di méjané. Luh Maya taén nyatuayang indik kartu ané madan kartu tarot ento. Kartu tarot ento koné anggona ngramal. Kartu tarot ento liuné pitung dasa

kutus besik, tur misi gambar ané pada malén-lénan saka pitung dasa kutus ento. Gambar-gambar ané di kartuné ento ngelah tafsiran ané malén-lénan masih.

“Luh, Bli Adit sedeng kenyel. Madiolas ja, Bli Adit sedeng ngekoh pesan ningehang Luh ngramal. Adénan Luh ngambar komik tekening main kartu rémi, seken tepukin Bli Adit kabisan Luhé.”

Saut tiangé enduk ngajak Luh Maya. Nanging, enu masih ia maplalianan kartu di duur méja komputer tiangé.

“Yé... Bli Adit, né tarot adané. Tusing ja kartu rémi. Ih, ndén malu nah... Né kok gambar ané pesu The Lovers sih? Ajanian, Bli Adit pasti ada demen ngajak anak luh, ae?”

Luh Maya nyemak kartu ané pejanga di duur méjané, lantas édénganga tekén tiang. Ada gambar nak misi kampid sedeng ngamel liman anak luh ajak anak muani. Gambar apa kadén ento. Tusing pesan tiang ngerti. Mingkinang ngaé kenehé érang ngajak Luh Maya.

“Yén ae, Luh Maya kal kénkén? Kan wajar-wajar gén Bli Adit ngelah tunangan, apa buin ngelah kurenan...”

“Béh... Bli Adit kok sing maorahan, yéning Bli Adit ngelah tunangan baru? Maya pasti puikina ba biin,” pasautné Luh Maya sambil nyigit sikun tiangé, paningalanné enu masih ningalin gambar di kartuné.

“Penting yén Bli Adit nyatuang ento? Yéning suba gantiné, nyanan orahina men satua indik ento.”

“Di kartu taroté ené, tunangan baru Bli Adit to jegég, jemet, solahné ngetisin keneh Bli Adit. Yéning ngajak ia, keneh Bli Adité setata liang, lega.”

Ané édengina Luh Maya tekéning tiang, tuah kartu misi gambar anak cerik negakin jaran. Di gambaré ento ada matan ai ané nyunarin anak cerik ané majaranan ento. Uli dija kadén ia bisa maan tutur buka kéto. Hem... Tepukin tiang Luh Maya enu mecil kartu, ada buin makudang-kudang kartu jéjéranga di duur méja komputeré. Ada kartu ané misi gambar anak luh ané sedeng ngemaang anak cerik vas bunga, di batis anaké luh ento ada buin limang vas

bunga ané misi bunga mawarna-warni. Ada masih gambar mercusuar ané das empak sander krébék. Lénan tekén ento, ada gambar bulan purnama misi yuyu ajaka dadua sedeng mapalu. Apa kadén suksman gambar-gambaré ento.

“Bin limolas dina, Bli Adit lakar ada masalah ngajak tunangan Bli Adité,” pasautné Luh Maya sinambi ngamel kartu ané misi gambar mercusuar.

“Uli dija Luh nawang?” Saut tiangé, nakonang unduké ento tekén Luh Maya.

“Uli di kartuné ené. Né ada gambar mercusuar roboh kena krébék. Masalahné sepélé, tunangan Bli Adit nto énggal cemburu, ento suba ané dadi masalah. Né ngenah di kartu ané magambar bulan misi yuyu.” Saurin tiang lantas pasautné Luh Maya sambilang mataki-taki lakar pesu ngatehin i mémé mablanja.

“Luh, anak saling cinta ento sing ada ané cemburu. Pasti saling percaya.”

“Yéé... né tunangan Bli Adit cemburu ulian ada nak luh uli masa lalu Bli Adit ané teka ngojog.”

Tiang makita kedék ningeh tutur Luh Mayané. Ané tawang tiang, ia tusing taén ngelah tunangan. Tusing taén tepukin ngajak timpal muani malali ka umahné. Ajanian, sagét ia nuturang indik anak matunangan, nuturang cinta.

“Wéé... Luh, suud monto mecil kartu rémi, Luh Maya ngalih naé masih tunangan. Apang sing Bli Adit gén terus ngatehin mablanja, ngatehin lés ngambar, apang sing Bli Adit gén ané ningehang ramalan kartu tarot...”

Luh Maya mendep dingehang munyin tiangé, tepukin tiang sebengné ngadésem.

“Bli Adit tusing demen ramalan. Ané nentuang pajalan idup iragné tuah iraga padidi. Tusing ja ramalan.”

“Oh, nah. Luh nawang Bli Adit suba sing nyak matimpal ngajak Luh ulian Bli suba ngelah tunangan baru. Ané jani, Luh kal ngalih masih tunangan pang ada ajak matimpal, apang sing Bli Adit répot ngatehang kija-kija,” sautné

bangras, cara anak mamedih. Ngenah sajan ia ngambul ulian munyin tiangé ané mara busan. Adi kemu dadiné...?

Sekaté ento, Luh Maya kapah malali ka umah tiangé. Ia masih kapah tepuk tiang maplalian kartu tarot ngajak pisaga-pisagané ané nongos di kompleks perumahan ené. Yéning, alih ka umahné, Luh Maya setata tusing ada jumah. Anak di jumahné setata ngorahang Luh Maya ada kegiatan di kampus, ada lomba di tongos lés komik wiadin sibuk nguopin Pamanné di studio lukisné. Suba masih telpun tiang ia, Luh Maya, nanging tusing taén sautina. SMS, WhatsApp masih tusing taén balesa. Kija ia miriban mengkeb? Apa ia enu pedih ulian unduké ané suba liwat ento? Yéning sekadi tiang padidi, ramalan sing ja pasti nentuang pajalan idup iragané. Tiang adénan nepukin Luh Maya percaya tekén kabisanné padidi, tusing setata ngandelang kartu ramalan ento. Mirib suba makeré pitung dina, tiang tusing matemu ngajak Luh Maya. Rasané ada ané kuang di keneh tiangé. Rasa-rasa ané dot pesan ketemu. Luh Maya ento timpal ané luwih. Tusing taén mogbog, setata ada di samping tiang ritatkala tiang sebet wiadin liang. Rasa-rasa ané rasayang tiang jani, miriban ené suba ané madan tresna.

Sagét suba liwat limolas dina, tiang tusing nepukin miwah matemu ngajak Luh Maya. Kanti med baan tiang malihin layar handphone tiangé, tusing masih Luh Maya males SMS wiadin WhatsApp tiangé. Rasané makelo pesan ngantosang apang nyidang matemu.

“Aditya.”

Dingeh tiang ada munyin anak luh uli durin tiang nyapatin. Ngénggalang tiang makipekan. Kadén Luh Maya. Tau-tau tusing ja ia. Tepukin tiang di durin tiangé ada anak luh mabok lantang mapayas apik. Lantas ia negak di kursi di mukak tiangé. Nyén sih?

“Sira ragané?” Saut tiang banban alus.

“Yé... né tiang Dit, Komang Puspa. Masa engsap? Kénkén kabaré, Dit?”

Wayan Jengki Sunarta

Komang Puspa nyén sih? Makelo baan tiang nginget-ngingetin. Makelokelo mara tiang inget, ené Komang Puspa Déwi timpalé dugas SMA. Komang Puspa Déwi ané pidan setata nguopin méméné madagang canang di pekenné. Ipidan Komang Puspa ené dekil sajan, tusing taén mapayas.

“Ih, Mang Puspa né? Malénan sajan ngajak pidan dugas SMA.”

“Ah ento kan ipidan. Jani tiang magaé di luar negeri. Ené mara busan simpang uli bank di samping cafetariané ené. Adit dija magaé jani?” kéta patakon Komang Puspa sambilanga makenyiran.

“Tiang magaé di Mega Permata Bank, tongos ané Mang Puspa mara simpangin. Tiang di bagian kreditné.”

Tusing makelo tiang ngajak Komang Puspa ngorta, sagét ia malunan magedi. Ngorahang ada gaé ané lenan. Sedek ento, sagét tepukin tiang Luh Maya liwat di mukak cafetariané, ngaba tas misi piranti ngambar. Matekep botol, ia majalan. Nyrengseng tusing matolihan wiadin macapatan. Ada keneh dot pesan ngraos ngajak Luh Maya. Ento lantas tiang ngadebras, maekin Luh Maya. Nanging pajalané Luh Maya ento becat sajan. Tepukin tiang ia liwat ka gang-gang cerik di samping cafetaria. Iseng tiang ngelurin.

“Luh, Maya... Antosin Bli Adit!”

Tusing dingeha munyin tiangé, jeg mingkinang becat pajalané.

“Wéé... Luh...!” Pasaut tiang sambilang ngedeng liman Luh Mayaé.

“Duh... Bli Aditné cara nak cerik. Misi nguber-nguber kéto,” bangras munyiné Luh Maya misi sledétanné galak.

“Yén sing uber, Luh sing ningehang munyin Bli. Jeg nyrengseng buka kéto. Anak kija sih Luh uli ibi puanné? Sing taén ada jumah.”

“Tiang sing kija, Bli,” pasautné saklek.

“Ngudiang sing males SMS wiadin WhatsApp? Ada ané dot orahang Bli tekéning Luh.”

Luh Maya nguntul, barang-barangné mabrarakan di gangé ulian malaiblaiban busan.

“Anak nguda Bli Adit dot san ketemu ngajak tiang? Sing perlu Bli ngidih pelih. Tiang sing pedih. Kemu ba malu, Bli runguang tunangan Bliné.”

Éh... tunangan? Adi kemu lakuanga?

“Tunangan ané cénan? Bli Adit tusing ngelah tunangan.”

“Nto ané busan di cafetaria ento kan tunangan baru Bli Adit,” pasautné Luh Maya sambilanga munduhang kartu tarotné ané mabrarakann di arep batisné.

“Ané busan ento timpal dugasé SMA. Sekenné Luh, bli sing mogbog. Bli Adit tresna tuah kapining Luh Maya. Iseng pesan bli dot ketemu Luh Maya uli dugasé ené, nanging Luh mengkeb.”

Ningehang munyiné ento, muanné Luh Maya masemu barak biing. Tusing masaut ia Luh Maya, baan lekné.

“Suksma, Bli”

Dingeh tiang Luh Maya kisi-kisi mamunyi. Paningalané nlektekang muan tiangé, nyujuh saseken munyin tiangé ané mara busan.

“Yéning Luh nyak, lan majalan ajak dua. Keneh bliné anak seken.”

Angin ngeberang sisan kartu tarot Luh Mayaé ané tusing bakat duduk. Ada kartu abesik ané ulung di arepan iraga ajak dadua. Kartuné ento kartu ané magambar anak makampid sedeng ngamel liman anak luh ajak anak muani, misi tulisan ‘The Lovers’ (Sang Semara).

Ni Wayan Marti Megasari, embas ring Sanur, 3 Maret 1990. Magenah ring Jalan Pasekan Gang Batu Ngonjol VI No. 22 Batu Bulan Kangin. Makarya dados pegawé kontrak/non PNS Dinas Kebudayaan Provinsi Bali