ngalih saih (Ni Komang Ari Budiani

Artikel

ngalih saih4

Ni Komang Ari Budiani

Yéning suba matuuh duangdasa tiban, ditu koné iraga lakar ngarasayang ané madan quarter life crisis. Unduké né ngaénang inguh tusing karuan. Apa buin jani, iraga sayan leket ngajak sosial média. 24/7! Alias sawai-wai tusing dadi palas, uli mara bangun kanti makiré sirep. Cutetné tuah abesik, apang terus ngenah aktif di dunia maya. Kadirasa, apa ja lakar alih, ngidaang bakat di sosial médiané ento uli informasi bencana alam kanti berita terkini mémber BTS, makejang ada ditu. Nanging, unduké ené masih dadi pikobet. Ulian setata nyingakin préstasi, kasugihan, kajegégan, kabagusan, miwah kabisan anak lén di sosial média, bisa masih ngaénang iraga marasa tekén déwéké pragat kuangan, “Ah, adi tiang tusing jegég cara Lisa Black Pink?”, “Tiang pasti tusing nyidayang suksés ulian tusing ngelah préstasi cara Maudy Ayunda”, “Yén Tiang bagus cara Jerome Pollin lan crazy

4 Artikel puniki kawedar wantah kerjasama Suara Saking Bali sareng Balai Bahasa Provinsi Bali.

rich cara Raffi Ahmad sinah pasti I Luh Ayu tusing nolak tresnan tiangé”, lan “Yén-yén” ané lianan. Jeg pragat nyaihang raga ngajak anak lén ané tepukin di sosial média! Né makada ngaé iraga minder lan marasa déwéké tan paaji. Yén cara anaké ngorahang, ené koné madan rasa insecure.

Sabenehné, tusing ja pelih yén iraga angob tekén kaluwihan anak lén. Unduké ento sepatutné ngaénang iraga marasa termotivasi. Nanging yéning iraga tuah fokus nyaihang déwék ngajak anak lén kanti engsap tekén ané suba gelahang di idupé sinah tuah ngaé iraga tusing ngidaang berkembang. Setata nyadcadin déwéké pedidi, kuang bagus, kuang sugih, kuang kéné, kuang kéto tur nyambatang Widhiné tusing adil. Cara laguné Raka Sidan, buka bukité ejohin! Ah adané dogén clebingkah batan biu, gumi linggah ajak liu. Apa ané ngaénang iraga maselselan tur marasa padéwékanné setata kuangan, bisa masih ulian iraga kondén ngidaang nerima lan nresnain padéwékan pedidi.

Tresnané ento tusing ja tuah buat gagélan, tusing sebates “demi ayang”. Tusing! Ané paling paek tongosné ngajak iraga, tusing ja ada lén tuah padéwékan iraga pedidi. Carl Jung ngorahang, yéning iraga tuah ningalin kasisi ento cihna iraga enu mangipi, nanging yén suba matolihan ka arep déwéké pedidi ditu iraga mara kaorahang bangun. Tresna tekén padéwékan né masih kaadanin selflove. Ané kénkén dadi kaorahang selflove? Nerima skancan kalebihan utawi kakirangan ané ada di déwéké nanging tetep mautsaha apang nyansan melah ento ané madan selflove. Buka sastrané ngorahang, tan hana wong swasta anulus. Nanging ulian las nerima kuang lebihné ada di déwéké ento ngidaang ngaé iraga dadi versi terbaik dari diri sendiri.

Ni Komang Ari Budiani,

embas ring Tanggahan Peken, 2 Januari 2002. Sané mangkin kantun kuliah seméster IV ring Jurusan Filsafat Timur di UHN I Gusti Bagus Sugriwa Dénpasar.