lascarya (Ni Luh Putu Nirani Nusantari

Satua Cutet

lascarya

Putra Ariawan

Panesé nyentak nyuled kulit kanti pelung melelung warnan kulité,

semeng majalan makuli ngantos ka peteng nu masé di marginé kéto

geginan I Gedé Subaktiné. I Gedé wantah anak muani mula rajin

magarapan, anak tuara, madaar dogén marasa ngesap inget, baan

tiwasé. Jani I Gedé maan maburuh dadi tukang sampat, sabilang

semeng ngantos peteng geginané wantah dadi tukang sampat lan

bersih-bersih ring toko, ia tusing taén ngelah keneh lek, mapan

idupé perlu magarapan anggon nglanturang idup.

Ni Luh Putu Nirani Nusantari

Tusing karasa I Gedé suba petang tiban magaé di toko, ditu lantas ia kacunduk ajak anak luh jegég selem manis, bokné dawa, kenyungné manis, kulitné selem, aduh jeg ngrutug bayuné I Gede yéning matemu ajak Ni Luh Putu Lastri. Putu masé polih maburuh di toko ané di sampingné. Jani I Gedé dadi marketing, sabilang semengan I Gedé ajak Putu

setata katemu ngortaang pajalan idup, ngorta kangin kauh, tan karasa sagét I Gedé marasa kélangan yéning tusing maan katemu ngajak Luh Putu.

Jani sawétara jam roras tengai I Gedé ia ngantos patekané Ni Putu, mapan jam kali jani galah anaké maburuh sami polih mengaso molas menit. Buka coconé ngatep buku kenehné I Gedé mapan ané antosang teka tur makenyung manis. Kéné pamunyiné I Gedé tekéning Luh Putu, “Tu! Dados tiang ngraos seken sareng Putu?”

“Pih Bli cara anak mara kenal dogén jeg ngraos seken koné, memangné uling pidan tusing seken!” kéto ia Luh Putu nimpalin.

“Kéné Tu… sangkaning nekeng tuas tiang demen sareng Putu, tiang tresna tekéning Putu, tiang demen ajak Putu!” kéto pamunyiné I Gedé ajak Luh Tu.

Jeg cara anak blegbegan Luh Putu nengil tan pasaut malih I Gedé nutugang tur ngraos banban, “Sapunapi Tu?” Ditu lantas Luh Putu nginget-ngingetang raga tur nyawis munyiné I Gedé, “Bli Gedé sekenang kenehé eda gangsaran tindak kuangan daya, sagét ngetogang tresna kapining tiang, Bli ampun uning padéwékan tiangé? Tiang luh lacur, idup di jalané, jelma selem denges, liu munyi ané miring lakar padingehang Bli indik kawéntenan tiangé,” kéto pamunyinné Luh Putu.

“Kéné Tu, titiang masé anak tuara, kadirasa ngajeng dogén tusing atep ngantos sanja, sakéwala cara munyin beliné mara sangkaning nekeng tuas beli demen ajak Luh Putu!” Ditu lantas Luh Putu mapineh, makeneh, tur nyanggupin pitresnané I Gedé, kalanturang ngantos ngantén.

Disubané ia jani madan makurenan lantas I Gedé ajaka Luh Putu kost drika ring Tanjung Bungkak. Umah bedég, maraab séng, mapan idupé tuara. Sangkaning suécan Widi jani I Gedé di tongosné magaé ia suba angkata dadi manager mapan I Gedé jelemané jemet, seleg, tur anteng magarapan. Sasai nylametang, polih ténder ané gedé-gedé tur mapuara polih bati, ditu bosné I Gedé demen, nganti gajiné selaé juta a bulan.

Tan karasa jani I Gedé madué pianak istri jegég pisan kulitné putih, panyingakané bunter, misi sujénan pipiné. Sakéwala lacur ia tuara bisa ngraos. Ditu Luh Putu marasa ngelah tanggung jawab lantas ia suud magarapan ngempu pianakné. Tusing taén ngurus déwékné, kulitné kisut, muané sayan selem, mapan I Gedé jani suba masakaya ditu lantas ia meli umah ané maal ring Ubung, meli mobil sedan, sabilang barang ane kenehange belina. Sabilang neked ring kantor setata timpalné ngéncék, “Dé cai suba sugih jani ngudiang kurenané menyi, selem, tusing makenyir nyang gigis, to tolih Ika, Siti, jegég nylolet!” Kéto setata pamunyin timpal-timpalné.

Jeg sing kuat batinné I Gedé, ia jengah tekén munyin timpalné, lantas ia nagih cerai ajak Luh Putu, sakéwala Luh Putu belianga umah lantai tiga, belianga mobil, gaénanga tabungan misi satak juta. Luh Putu tusing ja ia liu ngraos, “Yéning suba sangkaning Bli, tiang satinut”

Luh Putu lantas cerai. Ajaka pianakné magedi uli umahné I Gedé. Sasukate cerai idupné I Gedé tusing rahayu setata inget tekéning Luh Putu, yadiastun idupné I Gedé makejang ada, makeneh anak luh ada, makeneh karaoke nyidang sakéwala tusing taén rahayu setata inget tekéning pianak ajak Luh Putu kurenanné. Ditu lantas I Gedé gagéson ka umahné Luh Putu neked ditu lantas ia kauk-kauk sakéwala tusing ada sané nyawis. Ngénggalang nyemak kunci tur mukak pintu gerbangné, tepukina punyan paku, punyan séla di aepan umahné ditu lantas I Gedé inget tekéning déwékné dugasé nu tuara utawi tiwas, kurenanné rajin mamula paku lan kaséla apang ada anggon jukut. Turmaning tingalinna di duur méjané ada rerepi kéné munyin tulisanné, “Bli…Bli Gedé mas jiwatman tiang…! Tiang mula anak luh jelé tanpa goba, kulit selem pelung melelung, matimpal belog anggon Bli kurenan, sakéwala dakin lima keneh tiangé nénten lémpas tekéning semaya. Tiang mula demen tekéning Bli sangkaning nekeng tuas, lascarya, sakéwala yéning Bli sampun liang sangkaning palas ajak tiang, tiang lascarya dumogi Bli setata polih karahajengan lan kasukertan ring jagaté. Tiang jadma jugul.” Luh Putu.

Ngetél yéh paningalané I Gedé, ngeling sigsigan, “Dija kurenanné, dija pianak tiangé?” Kéto ia ngrenggeng di kenehné. Tan karasa sagét ngéncolang ia I Gedé ka umah reramanné Luh Putu, sagét tepukinna Luh Putu ajak pianakné, lantas I Gedé mamunyi jaan, “Mulih Tu ajak Pianakné. Tiang tusing nyidang idup yéning tusing ada Putu ajak Pianaké! Idiolas Tu, tulungin tiang!”

Lantas masaut méménné, “Tu! tusing dadi makelo ngambul, kemu mulih atehang I Gedé, aba bajuné, anak raga idup mula madasar uyut, pasti lakar tepuk luungé.” Makesiab kenehné I Gedé, “Tiang maderbé kurenan luih pisan, tusing nyak masadu ngajak reramanné, tusing masadu ngajak tugelané, tusing nawang pianakné ceraiang titiang.” Kéto ia mapineh… Disubané I Gedé ajak I Putu buin mabesikan ditu lantas I Gedé nutur sareng Luh Putu.

“Tu pelih mula parilaksanan beliné bes kaliwat sombong, bobab, lan mrekak beli tekéning Putu. Nunas ampura beli tekéning Putu sareng pianaké, sampunang Putu makelo sebet tekéning titiang. Jalan sareng-sareng malajahang déwék mangda nemu rahayu.”