Hnehtu aia Ropui

Englai pawh a Pathian fak hi thil awlai ani hauh lo. Davida hian puka a awm laia Sam 34 hi a ziah ani. Manganna nasa takin tuam mahse Lalpa fakin, hlim takin a zai thei ani. Pathian fakna ah hian thil ropui tak inthup a awm ani tih Davida hian a hre tlat. Davida chu berampu inngaitlawm tak, a pa beramte veng thintu ani. Zawlnei Samuela’n Jesaia fapate zinga pakhat hriak thih tura Jesaia ina a kal pawh khan Davida hming hi hming pek zingah a lang lo. A chhungte ngei in ngaihthah mah sela Pathian fak a chawl chuang lo. Davida hian, englai pawh a Lalpa fak tur kan ni tih, a nun ngeiin min zirtir ani.

Tunlai khawvelah chuan, khawvel hlimna leh nawmna hlimpuitu tamtak an awm. A daih reilo lulai tih lovah chuan khawvel pawhin reilote chhung chu hlimna a pe ve bawk. Thinlung taka Pathian fakna erawh chuan hlimna nghet, chuai ve mai lo min thlen thin, chu thuruk hmufuhtu Davida chuan harsatna karah pawh hlim takin Lalpa a fak thin. Chuvang tak chuan, Sam ziaktu chuan, ‘Englai pawhin Lalpa chu ka fak ang a;…. Lalpa I chawimawi tlang ang u (Sam 34: 1-3) 'DAVIDA ANGA PATHIAN FAKNA AH CHUAN KHAWVEL HI A NIH TUR ANGA AWM LOVA A LETLINGA A AWM ANIH PAWHIN BEISEINA NUNG MIN PE A NI, AMAH BEISEI TUTE CHU AN RILTAM NGAI DAWN LO A NI.' Hun harsa leh khirh taka awm lai a Lalpa fak tur chuan tumruh viau angai.

Ringtu nun hi a nuam viau anga a lan ang hi a ni lova, anihna takah chuan, thlemna leh fiahna a khat ani zawk. Sam ziaktu chuan (Sam 34: 5-6) ah chuan Amah an en a, tin, an lo eng ta a….. a manganna zawng zawngah chuan a chhan chhuak ta a, tiin min fuih ani. Hun khirh leh harsa tak karah pawh Lalpa vuan tlattu kan nih hi a pawimawh. A hnuaia thawnthu tawi hi kan fiah zual nan min tanpuitu ni se: Dutch mi Corrie len Boom chu Ringtu sana siamtu, Netherlands ram a hmeichhia sana siam thin zinga license nei hmasa ber ani. Amah hi, hmeichhe tleirawl thlarau lama an thanlen theihna tura Youth Christian Club for Teenage Girls dintu ani. Rinna kawnga mi chak, Pathian laka rinawm tlat mi ani. Indopui pahnih hunlai khan Nazi hovin an man a, an club pawh chu khar sak an ni.