The Leader and the Future I Want: Mga Pinoy sa Japan at ang Halalan TOKYO, Japan – Palapit na nang palapit ang eleksyon sa Pilipinas kaya naman kabi-kabilaang campaign rallies na ang nagaganap hindi lamang sa loob ng bansa kundi maging sa iba’t ibang panig ng mundo. At maging dito sa Japan, aktibo rin ang Filipino community sa pago-organisa ng mga iba’t ibang aktibidad para sa kani-kanilang mga sinusuportahang kandidato. Samu’t saring isyu, palitan ng kuru-kuro, at maging patutsadahan o palitan ng alegasyon ang nangyayari sa bawat kampanya. May kani-kaniyang rason kung bakit sa tingin natin ay nararapat ang ating kandidato para maging leader ng bansa. Ang ilan ay tumitingin sa edukasyon habang ang iba naman ay nakatuon sa experience o track record. Kaya naman kinausap natin ang ilang mga Pinoy mula sa iba’t ibang panig at larangan dito sa Japan hindi para tanungin kung sinu-sino ang kanilang mga napiling kandidato kundi para ibahagi ang kanilang opinyon sa kung ano nga ba talaga para sa kanila ang isang “good leader” at paano sila pumipili ng kanilang mga iboboto. Tinanong din natin sila kung anu-ano ang kanilang mga pangarap at hangarin para sa bansa at sa kapwa Pilipino sa paparating na halalan. Narito ang kanilang mga sagot.
36
Melissa Luce-Borja Legal Counsel in Tokyo From Cavite Ang magaling na lider may malinaw na plano, may konkretong estratehiya paano niya makakamit ang mga planong iyon, may diskarte, may pananampalataya sa Diyos at sa kanyang mga kababayan at higit sa lahat, marunong makinig sa mga konstruktibong kritisismo. Ang batayan ko sa pagpili ng kandidato, 4 C’s. Unang-una, competence. Kasama dito yung track record sa pamumuno. Ano ba ang napatunayan ng kandidatong ito. Kung dati nang nanunungkulan, natupad niya ba ang mandato niya sa mga nakaraang posisyon? Bilang ordinaryong mamamayan, ano ba ang kanyang napatunayan? Ang taong likas na matulungin at may puso sa pagseserbisyo, parating nandyan pag oras ng pangangailangan. Handang gumawa ng paraan. Pangalawa, credentials. Ano ba ang educational background at karanasan sa pamamahala ng taong ito? Pangatlo, creativity (sa Tagalog “diskarte’). Hindi kasi sapat yung magaling lang, kelangan resourceful din. Yung may kakayahan mag-isip ng iba’t ibang solusyon sa isang problema. Panghuli, character. Kailangan natin yung kandidatong may integridad, may moral ascendancy na pamunuan tayong lahat. Someone who commands respect, hindi sangkot sa kahit anong issue ng pagnanakaw o pagbali ng batas. Panalangin ko sana matuto na tayo sa leksyon ng kasaysayan at sa karanasan natin noong mga nakaraang eleksyon. Matuto na tayo pumili ng kandidatong tunay na naninilbihan sa atin at hindi gagamitin ang yaman ng bansa para lamang sa interest ng iilang kapamilya at kaibigan. We deserve a government that will embody our ideals and aspirations, ika nga ng ating Konstitusyon. Sa nalalapit na eleksyon, panalangin ko na gamitin natin ang ating konsensya sa pagpili ng kandidatong mamumuno sa atin. Our children deserve no less.
March - April 2022
