Osvaldo Correa

Arte di Palabra, un comienso, e porta pa mi mundo artistico.

Danki na Arte di Palabra mi a forma amistadnan valioso y planta con anza den mi mes y mi arte. Awe mi por bisa: “Mi sa ken mi ta y unda mi kier bay, danki na e prome biaha cu mi a tribi di participa na Arte di Palabra. Pasobra ta di e forma aki mi a siña kico mi potencial y pasion ta. Tambe m’a siña no solamente mas di mi cultura y idioma, sino tambe hopi di e cultura di Bonaire y Curaçao, como cu e premio mayor tabata un trip cu e tanchinan di Arte di Palabra ... un trip asina dushi y educativo cu a motiva mi pa mi competi y gana 4 biaha consecutivamente den mi categoria “cuenta original”.

Sumamente agradeci mi ta pa por a forma parti y marca historia den e mundo di Arte di Palabra. Un danki tambe na Sra. Munye OduberWinklaar cu semper a habri su porta di cas pa yuda mi forma mi cuenta y duna mi tipnan valioso, cu te dia di awe mi ta haci uzo di nan; simplemente un miho mentor mi no lo por a pidi p’e.

Loke mas m’a gusta di un presentacion ta e poder cu bo tin como contado di storia, e poder pa trece hende den bo mundo di fantasia. Na momento cu m’a realisa esaki m’a haya un amor pa presenta.

M’a forma un grupo di theater yama IOTE y hunto nos a competi den e Gang di arte y Next in line caminda nos a gana hopi y nos a siña hopi mas te cu nos a haya e oportunidad pa representa Aruba na Kunstbende, Hulanda. Danki na IOTE mi a cera amistad, kendenan te dia di awe ta motiva mi pa sigui mi vision y pasion pa mi futuro, cual ta e motibo cu na aña 2018 mi a laga mi isla pa mi bay studia eater vormgeving na De MBO eater School Rotterdam.

Pa clausura un haiku:

For di e porta aki mi a conoce cultiva mi mes

Osvaldo Correa

Rachelle Le Blanc

Mi a partisipá na Arte di Palabra pa dos aña konsekutivo. Tur dos aña, mi a gana di dos premio den mi kategoria. Aunke desde mucha, semper mi a bisa ku mi ker a bira aktris profeshonal, Arte di Palabra a motivá mi pa mi sigui mi soño i no entregá. Awor aki, kasi 15 aña despues, mi ta biba na New York, kaminda mi a studia Media Management i aktuashon “Acting for Film”. Mi a kompletá e siguiente estudionan:

Master’s of Business Administration with a concentration in Marketing; Programa Konservatorio “Acting for Film”; Master’s of Business Administration in Media Management. Mi a aktua den diferente “short lms” i serie riba web. Tambe mi a krea, produsí i aktua den mi propio pelíkula titulá “Worthy of Love”. Aktualmente mi ta trahando komo un Production Manager na Soul Kisses Productions LLc. Es desir, mi ta e persona ku ta enkargá ku produkshon (un serie titulá Bubbly Brown Sugar) i ku ta sigurá ehekushon eksitoso di un seri digital. Mi ta gradesidu na Arte di Palabra pa a duna mi e oportunidat i un plataforma pa mi por a eksplorá mi talento.

Rashel Hawker

For di chikí, mi tabata gusta e parti di presentashon. E promé kompetensia ku mi a partisipá na dje tabata un kompetensia ‘Playback’ dia mi tabatin 5 pa 6 aña. Mi a pèrdè, i mi ta kòrda kon mi a yora masha hopi mes. Despues di esei, mi a partisipá na un konkurso di Reina di Seú na e opvang ku mi tabata bai, Young Minds Foundation. Aki sí mi a logra bai ku e premio máksimo. Aki mi a haña masha kurashi i smak pa sigui partisipá na kompetensia den kua mi por mustra mi abilidat di duna presentashon den forma di un spich. Na aña 2006, mi tabata bishitá e skol sekundario SKAIH na papiamentu. Un dia nos dosente di papiamentu, tanchi Mijanou, a bin papia den klas tokante Arte di Palabra. Komo ku mi tabata forma parti di e Komishon di Studiante, el a aserká mi personalmente pa wak kon mi interes ta, mirando ku nunka promé SKAIH no a manda un representante pa kompetí den Arte di Palabra. Ora mi a haña e petishon, mi a bai kas i splika mi mama esaki. Mama a bai di akuerdo mesora, i el a bisa mi ku nos ta bai partisipá ku algu original. Pues, nos mes ta bai skirbi un kuenta.

Mirando ku mi ta bishitá SKAIH, mesora ami ku mi mama a bini ku e inisiativa pa skirbi algu riba e idioma papiamentu. Mi ta kòrda ku ami ku mi mama a kuminsá skirbi riba un djadumingu, na momentu ku e tabata kushiná. Mi mama ta esun ku a bini ku e idea pa e Mosa Papiamentu. El a splika mi ku mosa ta un dama bunita i pertinènt, i asina nos idioma papiamentu ta. Huntu nos a krea e famoso MOSA PAPIAMENTU. For di e momentu di preparashon, tur dosente i kolega di skol tabata enkantá ku e obra akí, i nan tabata sigur ku lo mi a hasi un bon presentashon. Dia di e promé ròndu, mi tabata masha nèrvioso pa mi kai aden. Danki Dios, tur kos a kana superbon, i mi a pasa pa e ròndu nal. Mi mama tabata ke pa mi presentashon tabata espektakular i superdiferente; pues, el a laga kose un bistí kòrá kimá i

> krèm, manera e mosanan tabata bisti, i mi a peña un dundun tur na or. Mirando ku Mosa Papiamentu mester a drenta sala di esta, mi a kana drenta riba músika di Ced Ride, subi esenario i konta e kuenta. Nunka mas lo mi lubidá esaki. Tur esaki tabata mi mama su idea, i el a resultá masha bon. Ku e presentashon akí, mi a logra bai ku e premio máksimo den e kategoria di kuenta original. E manera ku mi kolega- i dosentenan a sostené mi durante henter e proseso tabata algu úniko.

Te ainda hende ku a presensiá e evento akí a keda yama mi Mosa. Mi a haña e oportunidat pa bai Boneiru huntu ku e otro ganadónan pa por a presentá einan. Te ainda mi tin un bon relashon ku tur e koleganan akí. Partisipando na Arte di Palabra, e amor pa mi idioma i tambe pa arte a krese inmensamente. Despues di esaki, señora Noris Doran a aserká mi pa mi por a drenta e grupo di deklamashon Anakú-Kuumba. Anakú-Kuumba ta un grupo kultural den kua nos a siña ekspresá nos mes i presentá obra di eskritor renombrá aki na Kòrsou.

Na 2007, mi a bolbe partisipá na Arte di Palabra ku e kuenta original Shi Maria den Kampaña, un historia kaminda Shi Maria ta bai elekshon. Ku e kuenta akí, mi a sali na di dos lugá. Asina mi a keda pa algun aña miembro di Anakú-Kuumba. Nos a duna hopi presentashon na diferente evento i selebrashon grandi i chikí.

Danki na Arte di Palabra ku a laga mi deskubrí i desaroyá e talento akí. Despues di esaki, mi a forma parti di algun obra teatral tambe. Tambe mi a forma parti di e grupo Poetic Colours, un grupo ku ta motivá pa skirbi poema propio i presentá esakinan. Mi a haña oportunidat pa fungi komo MC na algun aktividat, i mi a partisipá na un konkurso di obra di Elis Juliana. Asina mi por sigui menshoná diferente oportunidat ku mi a haña simplemente pa e echo ku mi a partisipá na Arte di Palabra. Aktualmente mi ta trahando na Fundashon Bos di Hubentut den e tim koordinadó di Brigada di Seguridat i Formashon. Na e momentu akí mi no ta masha aktivo den e área di arte, pero ta mi deseo máksimo sí pa mi por sigui desaroyá esaki.

Rashel Hawker

Rashid Felida

Na aña 2009, mi a partisipá na Arte di Palabra. Durante di e lès di papiamentu serka yùfrou Albert na VSBO St. Jozef, nos a haña e tarea pa traha un poema den klas pa un sifra. Na e momentu ei, mi a skirbi mi promé obra ku ta Ken ta yu di Tera. Despues ku mi a presentá esaki den klas i haña un 9 komo sifra nal, yùfrou Albert a aserká mi pa partisipá ku e obra akí na Arte di Palabra. E obra a kai na agrado di tur hende, inkluso kuerpo di hurado, i mi a sali na promé lugá den mi kategoria. Den kuadro di e premio akí, e 6 ganadónan tur a bai e isla di Boneiru pa un interkambio kultural ku e hóbennan di Boneiru. Esaki tabata un éksito total.

Na aña 2010, mi tabatin e oportunidat di presentá e poema akí riba Dia di Bandera, 2 di yüli, riba Plasa Brion. E aña ei mes tambe, mi a kuminsá e karera di maestro di seremonia na Arte di Palabra mes, te ku awor, esta, aña 2018. Arte di Palabra a habri masha porta pa mi por a sigui desaroyá tur mi talentonan, hende rònt Kòrsou a sera konosí ku Rashid Felida. Resientemente mi a terminá mi estudio di trahadó sosial pedagógiko. Mi ta presentá notisia na Telecuraçao, i tambe mi ta presentá otro programa di televishon manera E bon Yu di Kòrsou. Alabes mi ta traha komo maestro di seremonia na diferente aktividat. Mi a gana e festival di Kantadó Mayó, un kompetensia grandi di seú, na dos okashon. Mi a presentá tambe durante Ruta Tula na 2 okashon, i mi a presentá ku grupo Anakú-Kuumba bou di direkshon di Noris Doran.

Sigur sigur, lo mi sigui duna un kontribushon na Arte di Palabra.

Rashid Felida