Sendion Balentin

Mi nòmber ta Sendion C.R.F. Balentin. Mi a nase na Kòrsou 15 di mart 2002. Semper mi a biba na Boneiru huntu ku mi mama i wela. Mi ta bai liseo, mavo 4. Tur dia mi ta yama Dios danki pa un dia mas di bida, i pa mi mama. Danki pa e don, sabiduria di ariba i pa mi salú. Mi por bisa ku mi ta bendishoná ku mi 16 aña. Mi tin Dios sentral den mi bida i tur mi batayanan mi ta hinka den man di Dios pa mi kanta viktoria. Mi ta un sirbidó di Dios, mi ta yuda pastor, lesa lektura i tene diskurso den misa.

Arte di Palabra

Un dia despues di skol na Jong Bonaire, yùf Senaida Janga a aserká mi i puntra mi kiko mi ta pensa di Arte di Palabra. Mi a pidié pa e djis splika mi un tiki mas i lo mi pens’é. Mi por bisa ku na aña 2015, mi a presentá na e kompetensia akí i ku mi a resultá ganadó den e kategoria di kuenta eksistente. Arte di Palabra a toka mi, ta mi kos. Di kurason mi por bisa ku mi amor pa nos lenga papiamentu a krese. Nos idioma i kon pa trese un kuenta dilanti i kapta atenshon di públiko, kontando un kuenta na mi manera.

Esaki ta algu inolvidabel, i mi lo sigui duna un granito na e festival di Arte di Palabra. Awor mi ta muchu mas avansá den nos idioma papiamentu i mas riku na ekspreshon di palabra.

Mi ta gradisí yùf Senaida i mi eskritor di kuenta, señor Marco (Duduy) Marchena, ku semper ta pará kla pa duna mi un man.

Ta algu tremendo, i lo mi sigui partisipá. Kada bes ta un otro feeling. Mi kuentanan a keda grabá pa historia den mente di hopi hende, i ku amor lo mi sigui karga nos papiamentu den mi kurason i sigui hib’é mas leu. I den e kompetensia akí, nos ta sigui kompetí huntu den e nal entre Aruba, Boneiru i Kòrsou, nos ABC, i te ku awe, mi ta orguyoso di por a representá Boneiru komo ganadó òf nalista.

Kanto

Mi gusta músika, i mi a partisipá na diferente festival. Kansion di pasku, kanto krioyo, festival di tumba di karnaval, rèp pa derecho di mucha, kanta nos Boneiru, i tambe mi ta forma parti di dos agrupashon musikal komo kantante. Na mayoria di e festivalnan akí, mi a sali sea ganadó, òf mi a kai den premio. Alabes mi ta un scout, mi a yega di skirbi un buki titulá Tonki i su aventuranan. Mi a bai lès di kuarta, barí, wiri, i awor mi ta bai lès di piano. Steelband tambe mi por toka. Mi gusta músika, kanta i mi Arte di Palabra, i mi ta semper kla pa otro reto den mi bida.

Mi tin e siguiente mensahe pa nos hóbennan. Komo hóben, keda enfoká riba loke bo ke, i no bisa mi no por. Tuma kurashi i bai ku kon ansa pa e loke ku bo ke, i bo ta logra. I kòrda semper ku Dios ta sentral den nos bida, nos ta un vensedor.

Sendion Balentin