Shelomi Doran-Bakhuis

Shelomi, Shelly B, ta un artista, mama, esposa i coach. Na aña 2001, Shelomi a partisipá na Arte di Palabra ku e poema di Nilda Pinto, Mi pòpchi pretu, i el a risibí un premio di estímulo. Na aña 2003, el a partisipá ku su propio kuenta, Muhénan di Kòrsou, i el a sali na promé lugá den e kategoria di kuenta original. Komo premio, tur e 6 hóbennan ku a gana den nan kategoria a biaha pa Boneiru pa un interkambio kultural.

E eksperensia di su partisipashon na Arte di Palabra a inspirá Shelomi di tal índole, ku el a disidí di kombertí e grupo di baile, ku e tempu ei e tabata dirigí, den un akademia di arte, Excel Arts Academy, pa asina duna hóben e oportunidat di desaroyá nan mes den diferente tipo di arte. Den e departamento di lírika i esun di drama di e akademia akí, ta instruí hóben pa skirbi kantika, poema, kuenta, drama i tambe pa deklamá i dramatisá. Durante Shelomi su karera komo artista, el a praktiká diferente forma di arte i komponé un kantidat grandi di kansion for di kua el a produsí 4 cd i 3 single. El a skirbi mas ku 50 poema, ku el a deklamá na diferente okashon. E ta un kantante di gospel i di kansion motivante. E promé forma di arte ku el a praktiká ta baile, i awor e ta fungi, entre otro, komo koreógrafo di baile kontemporáneo, afrikano i litúrgiko, den e akademia di arte ku ta bou di su direkshon. Shelomi a presentá den kanto i baile na diferente pais, manera Hulanda, Aruba, Boneiru, Puerto Rico, Sto. Domingo, Bahamas i diferente siudat na Merka manera Boston, Hollywood i Miami.

Te awe, despues di a keda inspirá pa su partisipashon na Arte di Palabra, Shelomi ta aktivo komo direktor di e akademia di arte ku el a funda na aña 2000. Den e akademia akí, huntu ku su ekipo di lider boluntario, e ta guia hóben pa medio di arte pa un bida eksitoso. E ke pa nan bira hóben ehemplar i artista kreativo i ekselente ku ta trese mensahe klave ku ta kambia e mundu akí den unu mas positivo.

Den e akademia, el a yega di produsí i dirigí diferente obra, manera Transformers, Colors of life, Level up, ChangeChampions, i el a aktua den diferente di nan. Na 2018, e akademia Excel Arts Academy a keda premiá ku e Grootste Appel van Oranje, ku ta un premio prestigioso, ku di parti di Oranjefonds a keda entregá pa Reina Maxima.

Shelomi ta stima i balorá su kultura i su dushi pais Kòrsou, i na dos okashon, el a partisipá na e festival di kanto di seú, Kantadó Mayó, i tur dos biaha, el a sali den e 12 nalistanan. Den e festival di kanto, Un kanto pa Kòrsou, di aña 2012, el a resultá e segundo nalista ku su propio komposishon, Bria Kòrsou.

Shelomi ta duna tayer komo life coach pa instruí i yuda hende pa por manehá nan bida pa nan por tin éksito, pero tambe e ta trata tópiko di bida ku por motivá un hende pa por desaroyá su mes diariamente pa ta mihó den tur área di su bida. Aktualmente Shelomi ta 1 aña aktivo komo Blogger riba facebook, Instagram, i pronto e lo tin su propio website/blog.

Danki na Arte di Palabra ku a duna Shelomi e oportunidat pa para riba tarima, enfrentá públiko ku su talento, lagando tur miedu atras ku awe e por inspirá otro. Tambe e eksperensia di e biahe ku e organisashon Arte di Palabra a hasi un impakto grandi riba su bida. Danki na Ange ku ta kere den Arte di Palabra i e hóbennan di Kòrsou. P’esei pa Shelomi ta un honor di por duna su aporte na Arte di Palabra komo miembro di hurado, i semper lo e t’ei pa sigui aportá na e organisashon noble i fruktífero akí .