16

Sharsy Anthony

Mi a nase na Kòrsou dia 28 sèptèmber 1994. For di mi infansia, ya mi a kuminsá ekspresá mi talento riba tereno artístiko literario skirbiendo frase i obra literario kòrtiku, pero mi no tabata sali dilanti ku esakinan. Mi timides a pone ku na prinsipio mi mes no tabata konsiente di e importansia di ekspreshon di mi talento. Dado momentu mi a kuminsá bishitá Jeugdhuis Jong Bonaire, i tabata Senaida Janga ku a motivá mi pa sali pa dilanti ku mi obranan i esaki entre otro pa partisipá na e kompetensia Arte di Palabra. Despues di tantu insistensia di señora Janga, na aña 2011 mi a partisipá na Arte di Palabra Boneiru ku e obra original Ta Basta awor. E debut akí tabata un éksito, komo ku mi a sali ganadó apsoluto di e kompetensia. Ku e logro akí, mi a haña e oportunidat pa representá Boneiru na Arte di Palabra ABC na Kòrsou. Aki mi no a kai den premio, pero sí mi a gana hopi eksperensia i tambe manera mi mes sa bisa “un purbá un gustá”. Na aña 2012, no tabatin kompetensia di Arte di Palabra na Boneiru i a skohe algun hóben pa bai kompetí na e nal di Arte di Palabra ABC na Kòrsou. Mi a forma parti di e representashon boneriano kompetiendo ku e obra Bingo. E biaha akí, mi a sali terser nalista den e kategoria kuenta original. Na aña 2013, atrobe mi tabata tin e honor pa representá Boneiru den kompetensia Arte di Palabra ABC. Sèmper den bida ta yega un momentu den bida ku bo no por sigui ku algu entre otro pa motibu di edat òf estudio. I esei tabata e kaso na aña 2013 ku tabata último bes ku mi por a kompetí na Arte di Palabra ABC. Mirando e éksito ku mi tabatin e aña anterior ku kontamentu di kuenta, mi a disidí pa bolbe kompetí den e mes kategoria. Mi a partisipá ku e kuenta titulá ABC dedikando honor na Aruba, Boneiru i Kòrsou. Ku e obra i alabes e dedikashon akí, mi a sali promé nalista den kategoria kuenta original di Arte di Palabra ABC 2013. Na aña 2014, mi a logra realisá un di mi soñonan artístiko esta pa produsí mi propio CD ku poesia i kuenta ku entre otro e meta pa tene e kompetensia di Arte di Palabra na laira.

Un evento ku ta brinda hóben e oportunidat pa ekspresá nan mes i desaroyá nan talento. Esei ta pa motivá otro hóben pa positivamente bin mas dilanti ku nan talento i den e kaso spesí ko akí talento artistíko literario. Mi ta masha orguyoso ku mi por a lansa mi promé CD riba merkado, ku presentashon di mi propio kuenta- i poemanan. Mi a titulá e produkshon akí Nos kultura bo dulsura. Dia 30 di aprel 2014, mi tabatin e honor di risibí un Sambarku di Estímulo di parti di SKAL (Sekshon di Kultura Arte i Literatura), departamentu di Gobièrnu di Boneiru. Mi ta gradesido na e Ser Supremo pa e talento i sabiduria ku El a duna mi. Un danki na Senaida Janga, Melvin ‘Shaba’ Meyers i Lisandra Marchena pa a mustra mi ku mi mester a hasi esaki. Mi ta sumamente orguyoso di mi talento. Mi ta kla tur momentu pa traspasá mi eksperensia na otro hóbennan.

Tambe mi ta forma parti di e komishon di Arte di Palabra Boneiru ku ta enkargá ku e kompetensia na Boneiru, promoviendo e evento akí, i alabes laga otro hóben tambe desaroyá nan mes den e área akí. Mi ta forma parti di e DreamTeam ku for di 2016 ta prepará partisipante pa e aktividat di Dama Kultural. Aki tambe mi a ‘challenge’ mi mes ku un talento nobo ku ta e parti di skirbimentu di spich, esaki ku resultado eksitoso, konkistando ya pa 3 aña kaba e título di mihó spich.

Banda di esaki, mi ta masha aktivo riba tereno di skirbimentu di haiku, mi ta fungi komo maestra di seremonia i tambe komo hurado na diferente aktividat di arte, kultura i muchu mas. Mirando ku e talento akí ta algu di gran balor p’ami, sigur lo mi ke sigui e direkshon akí. Mi deseo ta pa skirbi un buki òf skirbi kuenta, poema i haiku pa otro hóben. Arte di Palabra a forma mi i hasi mi un persona hopi sigur di mi mes. Pa medio di Arte di Palabra, mi a haña mas konosementu riba e tereno literario i mas entusiasmo i amor pa skirbimentu i deklamashon.

Danki na Arte di Palabra ku a laga mi sa ku mi por mas ku mi ta pensa. Mi por a konosé otro poeta i otro persona envolví den e tereno literario.

Danki Ange pa a bini ku e inisiativa pa ku e evento akí pa asina hóben por enkontrá i desaroyá nan talento i tambe pa tene nos idioma materno bibu. Nos t’ei pa hasi esaki huntu.