Para kay Nanay

Para kay Nanay Khaki

Tiktilaok! Tiktilaok! Tiktilaok! Huni kang mga manok kung kaagahon.

“Kaki, rigos dun to hu, aga dun pay” hambal kang nanay ko nga ga sabay man sa huni kang mga manok. Syempre ma bangon guid ako kadan kag marigos biskan pa nga ang tubig du ging butangan lang kang ice. Pagtapos ko rigos, nagkaon ako derecho kag naghimos lagi pa eskwelahan kay may klase. Sa amo to nga adlaw, may nakita ako nga duha ka bag nga hanggod kag isa ka maleta nga nakabutang sa kilid pwertahan, pero nag derecho lang ako panaw.

Sang sa eskwelahan ako, sadya-sadya guid ko kay ti upod ko mga klasmayt ko nga gahampang. Nami pa akon ngirit sa atubang nanda kay ti tawag bala nga na enjoy ko guid maghampang upod sanda. Nang mag abot ang hapon, du kadasig lang kang oras kay pagturok ko sa orasan, alas 3:55 na gali. May lima pa ka minutos bag-o matapos ang klase kag maka uli naman ako sa balay. Sang matapos guid man ang klase, dali-dali ako nga mag uli kay ti lunes mo, “market day”, ti duro bakal ni nanay nga tinapay. Sang ara nako sagwa balay, gulpi lang kabatyag ko kulba kag kasubo, du nag lain guid pamatyag ko. Waay ako kamaan kung ano nga rason insat nakulbaan ako kag nasubuan. “Nay, giya dun ako, ano bakal mo nga tinapay?”. Waay may gasabat kanakon. Naghinay hinay ako pasulod kay kung tani kulahun ko si nanay, gin pangita ko sa kuwarto, waay man, nag agto ko sa dapog waay man, kag urihi ko nga ging agtunan ang tarambayan namun nga duha sa kilid balay, waay man tana tuya. Amo to nga adlaw di ko guid malimtan nga natabo sa kabuhi ko, si nanay gali nag abroad para mangita kang ubra. Hibi ako todo eh kay ti waay na ko nanay nga mahulid kanakon kung mag turog, mamukaw kung aga, madaha dapli kag ma malantsa kang bayo. Grade 1 kang gin bayaan ako ni nanay. Si lola nalang akun imaw sa balay. Samtang ga dugang ang mga tinuig, sa nanay waay man gihapon ka uli. Sagi ko ka pamangkot si lola kung san o ma uli si nanay, kag pirme na lang ginahambal nga sa graduation ko lang kuno. April 2, adlaw nga kung sa diin maga saka na ako sa stage kay graduate na ako sa elementary. Akon ginahulat hambal ni lola nga maga abot si nanay sa akon graduation, pero waay man gali. Nakabatyag guid ako grabe nga kasubo kag nagturo akon luha dayun saka sa stage kag gin baton akon medalya bilang class valedictorian.

Masakit para sa isa ka bata nga maduraan ti iloy sa gamay palang nga pangidadon. Ang kasubo budlay guid baylohan ti kalipay. Pero ang pag palangga kang bata sa iya iloy di guid masukol kag waay may makatupong pa.

Nakauli gid man si nanay after 6 years. Iya ako ging hakwat kag akon sya ging hakos kay subra ko guid nga na miss si nanay. Nag ngayo si nanay pasensya kanakon kay waay ka lisensya mayad antis magpanaw sa abroad. Duro may ging bakal si nanay para kanakon, mga sapatos, bayo, mga hampangan kag gamit para sa eskwela ko. Samtang ako naga sultero na, akon na intidihan kung insa kinahanglan ni nanay mangita ubra sa abroad. Gusto ni nanay nga maka tapos ako sa akon pag eskwela kag masuportahan ako sa adlaw adlaw nga tanan. Gusto ni nanay mangin mayad man amun nga pangabuhi kag makatibawas man sa pagka-imol. Sa tulad, akon gina himakasan nga matapos ko ang akon nga pag eskwela para makabulig kag makabalos man ako kay nanay kang mga sakripisyo nga ging himo na para kanakon samtang ga eskwela palang ako. 2nd year college na ako tulad kag ga kuha kurso nga medisina sa Central Philippine University bilang iskolar at padayun sa paghimakas para kay Nanay, sa akon man pamilya kag buwas damlag. Akon nga tagumpay ay para kay Nanay!