Pakkâ Pänituoddârist, Nanna Rytkönen

Pakkâ Pänituoddârist

Tekstâ já koveh: Nanna Rytkönen

Pakkâ lii pištám jo maŋgâ peeivi, ko mun vuolgâdâm Pänituoddârân syeinimáánu aalgâst. Peiviv lii lamaš joba 30 cekkid liegâs, mut tääl iđedisiijâ lii váhá čuásásub, ko mun vuájám pyeráin Kuttoor maađij mield. Lii maailm muččâdumos ijjâ. Tovâsjuuvâ povveest piäiváš lii paijaanmin muorâi tyehin já kaskoo miärhá niävttá tego ubâ vyevdi puáláččij.

Mun kuáđám pyerá Pahaoja parkkisajan já juáđhám vääzin Avveeljuuvâ kuuvl. Mun váázám jotelávt, vâi kiergânâm merikiäčán ovdâl ko piäiváš oppeet kuárdiškuát meendu čuuvtij. Tijme lii love, ko mun viijmâg lam Avveeljuuvâ riddoost já peesâm vuojâdiđ ton čääsist. Mun leirâdâđâm tuárvi kuhás Avveeljuuvâ Kultalast, vâi uážum leđe ráávhust, já uáđám eehid räi. Talle mun purâdâm, vuojâm oppeet já uáđám lase ovdilgo mun lam vaalmâš juátkiđ Pänituoddâr kuávlun. Vistig mun kuittâg vuárdám, ete äijihšoŋŋâ mana lappâd.

Mun uáinám motomijd miälloid Avveeljuuvâ riddoost, mut tastmaŋa jiem uáini oovtâgin ulmuu kuulmâ piäiván. Tavaskulij väzidijnân mun huámášâm, maht enâdâh muttoo kuosâ ordârääji paajaabeln. Piättârlávttááuáivi vieltist jienniis puškolodde várdáá pecikierrust. Tuodârjolgâdâs lii tievâ keđgirástágáin, moh colkkâleh váruttâsâid, ko mun váázám toi lappâd. Paahâ tiet mun ferttiim távjá toollâđ puudâid, amas vaibâđ. Palgâd tiet jiem kuittâg haalijd orostiđ kuhháá: puohlágáneh tivreh kirdeh muu pirrâ ubâ ääigi veik piäggáuv.

Mun lam vaibâm já pivâstum, ko mun viijmâg peesâm jieččân merikiäčán Vuásku-Kolgoohjäävri taveriidon. Leirâdâttâm maŋa mun jiem vyelgi olgos teltastân jis ij lah aaibâs pággu. Mun luuvâm kirje, kejâdâm mučis tuodârenâduv jäävri nubebeln já kuldâlâm tivrij kirdâččem. Tot jienâ lii tegu arveuáhti telta kággái kooskâst. Čuávuváá peeivi koccáádijnân mun kuulâm hitruus jienâ: tääbbinhân piäggá korrâsávt! Mun moonâm olgos telttaast já navdâšâm iđedist tivrijttáá.

Iiđeedpitá maŋa mun juáđhám määđhi Pänituoddâr čookán. Korrâ piegâ keežild pakkâ ij oro nuuvt kummeen iäge tivreh oinuu ollágin. Tavveen pajaneh Suáluičielgi tuoddâreh, já mäddin mun uáinám jieččân čuávuváá merikeeji: mučis Vaskiisjeegi. Palgâdist polâdijnân mun kuittâg meridâm pisottâllâđ paijeen tuoddârist nuuvt ennuv ko máhđulâš, jiemge njeejâ jeegi piällás ovdâl ko lam vaalmâš leirâdâttâđ. Mun kaavnâm makkuus telttasaje Vaskiisjuuvâ alda. Sorvâ lii puurâdmin juuvâ riddoost, ige huámmáš muu piegâ vuoluubeln.

Mun uáđám meecist ain pyereest já kuhháá. Iđedist lii suotâs koccáđ hitásávt, juuhâđ käähvi ráávhust já esken talle smiettâđ, ete kuus mun onne monâččimgin. Ko lam ohtuu, te ij taarbâš ubâ koijâdiđ kiängin uáivil, tuše muu jieččân. Onne mun koolgâm jo vyelgiđ maassâd Avveeljuuvâ kuávlun já kuuloold pááikán. Must ij kuittâg lah mihheen huápuid, já nuuvtpa mun orosistám ain tyellittälli ihástâllâđ máárjákuámmirijd já kuldâliđ ryevdeežii lavluu.

Mun ijâstâlâm vala ohtii Avveeljuuvâ riddoost ovdil ko mun maacâm Pahaojan. Päikkimätki pyeráin oro kukken já mun lam-uv ilolâš ko viijmâg peesâm pááikán. Mun kuittâg tiäđám, ete ij vissásávt pište kuhháá ovdil ko mun halijdâm jo maassâd tuoddârân.

Mun uáđám meecist ain pyereest já kuhháá. Iđedist lii suotâs koccáđ hitásávt, juuhâđ käähvi ráávhust já esken talle smiettâđ, ete kuus mun onne monâččimgin.