Almottâsah

Čällee: Fabrizio Brecciaroli

Kove: smn.wikipedia.org

Anarâškielâlâš Wikipedia lii tiävdám kyehti ive

Roovvâdmáánu 19. peeivi 2022 anarâškielâlâš Wikipedia (smn.wikipedia.org) teevdij kyehti ive. Ton kunnen Anarâškielâ servi ornij Wikipedia-páájá Oulu ollâopâttuvâst roovvâdmáánu 17.–18. peeivij. Fáárust lijjii Anarâškielâ seervi saavâjođetteijee Márjá-Liisá Olthuis já mediapargee Fabrizio Brecciaroli sehe aktivliih Wikipedia čälleeh Anna Seipiharju, Kimberli Mäkäräinen, Saammâl Suominen já Jasmina Schreck. Ton lasseen Taažâst poođijn Trond Trosterud Tromsa ollâopâttuvâst já Jon Harald Søby Wikimedia Norgest. Pááján uásálistii meiddei Giellagas-instituut totkee Jukka Mettovaara sehe Giellagas-instituut uáppeeh Eri Lassila já Hana Kalábová.

Uásálisteeh juáhhojii kyevti juávkun. Teknisâš juávkku, moos kullii Fabrizio, Anne, Kimberli já Jon Harald, kieđâvušâi myensterijd, modulijd já eres-uv Wikipedia infrastruktuurân kyeskee aašijd. Loopah ulmuuh vuod vuoijuu uđđâ siskáldâs čälimân Wikipedian. Páájá ääigi šoddii uđđâ artikkâleh el. Pirkanmaa eennâmkoddeest, sujâttemoopâst (sajehäämi, täsimolsom jna), ellein (peenuv, okapi, taapiir jna) já kielâin (uuraallâš kielah, baskikielâ, tanskakielâ jna). Korrâ pargo áánsust anarâškielâlii Wikipediast láá tääl paijeel 4 700 artikkâlid. 5 000 artikkâl rääji ij lah innig kukken. Tuáivu mield mij peessâp toho vala taan ive peln.

Kove: Anarâškielâ servi ry

Čuovâuáivi peivikirje 3 lii almostum, lase kirjeh láá puátimin

Seervist lii tääl almostum Jeff Kinney särjikoveroomaan “Čuovâuáivi peivikirje – Jo rijttáá”, mon Fabrizio Brecciaroli lii jurgâlâm anarâškielân. Taat lii Čuovâuáivi peivikirje -rááiđu kuálmád kirje. Rááiđu vuossâmuš kirje almostui eŋgâlâskielân ive 2007. Tastmaŋa ráiđu lii vijđánâm jotelávt. Rááiđu sáŋgárin lii paješkoovlâ uáppee Greg Heffley. Taan kirjeest Greg ij paste keksiđ, maht sun puávtáččij ovdediđ jieijâs. Jieijâs mielâst sun lii jo tääl ohtâ pyeremuin kaandâin maailmist. Taan keežild jieijâs ovdedem ij kuulâ Greg tehálumosáid ulmijd, mut vaidâlittee kale tot kulá-uv suu eeji ulmijd. Kirje lii uáli hitruus luhâmuš, mii povvâstut čuuvtij já lasseet luuhâmmoovtâ. Kirje lii iänááš uáivildum nuoráid, mut tot suápá pyereest jyehiahasáid lohheid – päärnist äijihân. Rááiđu niäljád kirje lii tääl pargo vyelni, já juurdân lii almostittiđ tom ive 2024.

Kuulmâuásásâš anarâškielâ tihtâantologia já Márjá-Liisá Olthuis jurgâlem André Kuipers kirje “3, 2, 1, Go!” láá eidu vuálgám teddilmân, já toh almostuveh juovlâmáánust. Ton lasseen taan ive peln teikâ majemustáá puáttee ive aalgâst almostuveh vala kyehti kirje, moh láá tääl tuáijimmuddoost: Katarina von Bredow kirje “Liijkás stuorrâ rähisvuotâ”, mon Sáárá Seipiharju lii jurgâlâm anarâškielân, já Mehis Heinsaar kirje “Herra Paulin aikakirjat”, mon lii jurgâlâm Jukka Mettovaara. Jurgâlum já kuástidemnáál leijee kiirjij listo lii kukke, nuuvt et almostittem ij ooroost tai kiirjij maŋa já tot juátkoo meid puátteevuođâst.

Puoh Anarâškielâ seervi kuástidem kiirjijd puáhtá tiiláđ seervi mediapargest (fabrizio. brecciaroli@gmail.com). Taid puáhtá uástiđ meid Duodji Shopist Sajosist já Säämimuseo Siidast. Ennuv luuhâmmohtâ uđđâ kirjijguin!