Stary Targ Wartko skrymbiały

„Gdo się za swój jynzyk wstydzi, takim niech się każdy brzidzi”

Fryderyk Jan Dral

Jak sie pogrzebie w ziymi, to dycki sie cosi nóndzie

Wartko skrymbiały

Uż porem tydni pokraczuje na rynku w Cieszynie to grzebani w ziymi, ale jakosi tym macheróm kierzi w ni grzebióm, nie podarziło sie naprowdem cosi takigo nónść, coby to było moc zaimawe. Nejwiyncyj podarzło sie tam nóńść starych piniyndzy, kiere nie wiela były wort i skyrs tego jak gdo ich stracił, to sie po nie ani nie zgiboł. Dzisio je tak samo, bo to co je dycki wiyncyj worte je fest opatrowane, coby s kapsy wartko nie wyleciało. Kiejsi ludzie ni mieli takich kapsów w galatach jak dzisio i musieli dzierżeć pinióndze w małych szmacianych pytelkach, co na zicher porynczne nie było. I możne też skyrs tego, jak gdo kiejsi chcioł za cosi zapłacić, to tym pytelkym musioł podyrbać, coby tych porem groszy ś niego wyszkrobać. Podonież, że kiejsi aji za taki jedyn grosz, kiery zustoł tam na rynku nóndzióny, szło se żywóm kurem kupić, kiero snoszała wajca. Nóndzióne tam zustało eszcze moc inszych mało przidajnych wiecy, kiere gdosi stracił, abo naswol ich wyciepoł tam kaj stoł. Isto kiejsi tustelocy nie prziszli na to, coby se w mieście zrobić szpecjalny plac na rozmajte zaparty i wyciepowali wszecko bele kaj. Nóndzióne też tam zustały kónski oblyczki, starych bótów, porem knefl i i eszcze moc inkszych rozmajtych zieleźnych wiecy. Podobnież aji nóndzióne zustły tam łostrogi, kiere możne że kierysi wyciepoł jak kónia przedoł, bo isto uznoł że mu dóma bydóm zawadzać. A możne, że kóń go ze siebie ściepoł, bo za fest na nim rajtowoł i skyrs tego łod złości ty łostrogi pochynył na rynku. Podarziło sie też tam wygrzebać jakisi drzewiane ruły, kierymi żynyła woda ku rynku, ale isto łone wartko skrymbiały i zustały pochynióne.

SŁOWNICZEK

pokraczuje - postępuje, tym macheróm - tym specjalistom, nie podarziło sie - nie udało się, nóńść- znaleźć, zaimawe - interesujące, podarziło sie - udało się, isto skyrs - zapewne z powodu, nie zgiboł - nie zginał, dycki - zawsze, fest - mocno, je opatrowane - jest pielęgnowane, dzierżeć - trzymać, pytelek - woreczek, na zicher porynczne - na pewno praktyczne, skyrs - z powodu, podyrbać - potrząś, nóndzióny - znaleziony, wajca - jajka, wieca - rzeczy, kaj - gdzie, naswol - na umyślnie, nie prziszli na to - nie wpadli na to, zapart - odpady, oblyczka - ubiór, knefl e - guziki, zieleźnych wiecy - żelaznych rzeczy, wyciepoł - wyrzucił, ściepoł - zrzucił, rajtowoł - jeździł na koniu, żynyła - gnała, skrymbiały - zbutwiały.