Je na sztóm

Fryderyk Jan Dral

Eszcze chwiliczkem, a na sztróm bydzie wszecko.

Je na sztróm

Uż tak porem razy sie mi zdało, że prziszeł taki dziyń w kierym nie bydzie co napisać, ale dycki w łostatni chwiliczce cosi jednakowóż praskło i moji palce porwały sie do naszkryfanio czegosi zaimawego. Dzisio akurat rotuzowi urzyndnicy wyszpekulyrowali cosi takigo, coby cieszyniiokóm ukozać jako to kiejsi walił smród z auspufu autobusa, kiery żroł ropem a tym kiery ji nie potrzebuje, bo je na sztróm. Uciechy tustelocy mieli co niemiara, bo ty łoba autobusy porem razy przejechały naobkoło rynku, coby z bliska szło uwidzieć jako to dobroć na nas czako. To nie było wszecko, bo szło też nieskorzij do łobóch tych autobusów wlyź i sie w nich, aji po mieście kapkem przejechać. Tustelocy, kierym podarziło sie s tej uciechy skorzystać prawili mi nieskorzij, że w tym autobusie na sztróm tak nie dyrbało jako w tym starym, ale jako to bydzie naprowde s tóm prowdziwóm jazdóm, to pudzie dziepro rzeknóć nieskorzij. Nie wiym czy to je prowda, ale podobnież jak przidzie zima i kapke śniega nasuje, to grzoć w tym autobusie trzeja bydzie i tak ropóm, kiero jak sie poli, to łod ni smerdzi w lufcie. Wyglóndo na to, że ci kierzi wyszpekulyrowali ty autobusy na sztróm, przepómnieli se ło tym, że łóne bydóm jeździły też tam kaj roz do roka je zima i ludzie ni mogóm w nich przeca mar-znóć. A możne że kierysi przepómnioł napisać szpecyjalnóm insztrukcyje, w kierej bydzie wyłoślóne, że wsiadać do elektrycznego autobusa w zimie bydóm mógli yno ci ludzie, kierzi bydóm mieli na siebie obleczóne gunioki, a na czepóniach naździote sztrykowane mycki.

SŁOWNICZEK

dycki - zawsze, praskło - pękło, naszkryfanio - nabazgrania, zaimawe - interesujące, wyszpekulyrowali - wymyślili, auspuf - rura wydechowa, żroł - zużywał, sztróm - prąd, nieskorzj - później, do łobóch - do obydwu, wlyź - wejść, kapkem - trochę, rzeknóć - powiedzieć, dyrbało - trzepało, dziepro - dopiero, smerdzi - śmierdzi, kaj - gdzie, wyłoślóne - wytłumaczone, obleczóne - ubrane, guniok - płaszcz zimowy, czepóń - głowa, mycka - czapka, naździote - nawleczone, sztrykowane - zrobione na drutach