O papel de as broxas como presonache en a literatura feita en aragonés Cristóbal Chesús Parra Ruiz
A estrutura d'iste treballo obedexe, en gran parti, á o desembolique en diferens alpartatos de o tema á tratar, que se basará, más que más, en a tematica broxeril u de as broxas en a literatura feita en aragonés, os cuals beyeremos dende diferens ambistas y dembas que pertocan tanto á l'antropolochía, pero más que más á la literatura, siga ista oral u no, como fruito d'espresión y sentir de tot un pueblo y cultura de bez.
1. Introduzión En primerías, debérbanos amanar-nos á dito presonache drento de l'ambista de a tradizión oral, ya que ísta ye a que más amán en tenemos; as presonas a las que se deziba u clamaba con iste nombre u calificatibo yeran mullers marguinatas en gran parti de as ocasions. Cuan una biella embiudaba y, por o tanto, ísta pasaba a bebir sola a chen de o lugar empezipiaba a comentar feitos rarizos arredol d'ella, y sólo que por o feito de que en o lugar acayezesen diferens suzesos sin d'esplicazión ista presona pasaba á estar clamata por tota la comunidá con o calificatibo de «broxa». Exemplos replegatos por R. Andolz en tenemos muitos:' 1. En L'Aínsa estió asabelo de famosa, fa ya añadas, Azanza (a broxa d'os Molins). 2. De Vicenta R., de Buesa, deziban que yera broxa: maldizió una casa y les se morioron toz os tozinos durante a libratura; cuan ísta morió garra chen quereba marchar ta amortallar-la. 3. En Sallén bebiba una broxa que de nueis se'n iba á minchar enta las zolles de os tozinos. 4. Chuliana, de Las Paúls, tamién iba por as casas dezindo maldizions u bendezindo, pos bebiba seguntes lo que le daban. Por atro costato, y como ya sapemos, as broxas, antiparti d'estar un tema tabú ta gran parti de os altoaragoneses —montañeses—, yera una presona asabelo de temita por os suyos maldaus y totas as suyas feiturías pos ya yera bien ' Andolz Canela, Rafael, El nacer en Aragón: mitos y costumbres, Zaragoza, Mira (Colección «Aragón») (1991), p. 35.
405
