2021ko Urtarrila · 20. zbkia Pandemia egoeraren ondorioz udaleko diru-sarrerek murrizketa handia jasango duten urte honetan, Etxebarriko EH Bildutik herriarentzat estrategikoak iruditzen zitzaizkigun erabakiak bazterrean ez gelditzeko borrokatu dugu gure proposamenak udalean helarazi eta negoziatuz. Hori horrela, ondorengo proposamenak aurrekontuetan txertatuta gelditu dira: EH BILDUTIK
PROPOSATU ETA LORTU DITUGUN DIRU PARTIDAK
ESKOLA BERRIAN INBERTSIOA Eskola berriko eremura beharrezko instalazioak eraman eta urbanizatzen hastea.
OBRA LIZENTZIETAN HOBARIAK ESKAINTZEA Igogailuak jartzerakoan edota katastrofe natural baten ondoriozko obretan ordaindu beharreko tasetan hobariak eskaintzea.
12-16 URTEKOEKIN AISIALDI PROIEKTUA Adin tarte honetako herriko gazteekin aisialdi proiektu bat garatzea.
BERDINTASUN PLANA GARATZEKO PARTIDA 2020an onartutako Berdintasun Plana garatzen hasteko 6.000 €-ko diru partida.
ESKOLAZ KANPOKO EKINTZAK EGITEN JARRAITU ETA HOBEKUNTZAK EGITEA
PANEL INFORMATIBO DIGITAL BAT JARTZEA KALEAN
BASERRIETARA URA ERAMATEKO PARTIDA BAT GORDETZEA
BASERRI BIDEAK KONPONTZEKO PARTIDA BAT GORDETZEA
GATAZKA EREMUETAN BIZI DIREN HAURRAK (SAHARA, CHERNOBIL) UDAN EKARTZEKO DIRU PARTIDA JARTZEA
ZAKARRONTZI BIRZIKLAGARRIAK Birziklatzea ahalbidetzen duten zakarrontziak jartzea kaleko zenbait puntu erabilienetan.
UEMA-N SARTZEA Inguruko beste hainbat herri euskaldun bezala UEMA-n sartzea euskararen aldeko apustu sendoa egiteko.
Premia duten herritar zein herriko negozio txikiei laguntzeko diru aparteko partida bat ezartzea ukatu du EAJ-k.
EAJ-k aurkeztutako aurrekontuak ez dira guk diseinatuko genituzkeenak, jakina. Tartean, ez dugu bat egiten lehentasun kontuetan ezta zenbait proiektuetan (ur txorroen proiektua kasu), baina azkenean EH Bildutik aurrekontuei baietza ematea erabaki dugu. EAJ-k iritzi publikoan nahasmena sortu nahi arren, Etxebarriko EH Bildutik argi ditugu zeintzuk diren herrirako proiektu garrantzitsuak (eskola berria, berdintasuna, gazteak, herriko komertzioak...). Herriaren mesedetan horiek aurrera eraman daitezen borrokatuko dugu beti, nahiz eta horrek batzuetan gustuko ez ditugun gauzak onartzea suposatu.
Inbertsioen atalak argi adierazten ditu bakoitzaren lehentasunak EAJ-k aurkeztutako inbertsioen banaketa: “Ur txorroetara 80.000 € bideratu diren bitartean (guztira 165.458 €), eskola berriaren proiekturako 9.500 € eskas bideratu dituzte ”
(2. partida)
Aurretik komentatu bezala, aurtengo udal aurrekontuek diru sarrera gutxiago izango dituzte eta ondorioz, inbertsioen atala % 22 murriztuko da. Hau ikusita, EH Bildutik ezinbestekoa ikusten genuen inbertsioetarako gelditzen zen diru apurra lehentasunezko proiektuetan erabiltzea. EAJ-k aurkeztutako inbertsioetan proiektu bakoitzari esleitutako diru kantitateak ordea, argi eta garbi adierazten ditu alderdi bakoitzaren lehentasunak. Oso adierazgarria da ur txorroei beste 80.000 € gehiago bideratzen zaien bitartean, (aurreko urtean beste 85.458 € bideratu ziren, guztira 165.458 €) eskola berriaren proiekturako soilik 9.500 € eskas bideratzea. Gure ustez, ur txorroen proiektua ez da inondik ere lehentasunezkoa 2021era begira, are gutxiago aurten izango ditugun murrizketekin.
“Inbertsioen atala % 22 murriztuko den honetan, lehentasunezko proiektuetan inbertitzea ezinbestekoa da ”
Guztiok argi badugu gure lehentasuna eskola dela, inbertsioetan ere islatuta egon beharko lukeela iruditzen zaigu. 2021 honetan, hasierako 9.500 euroez gain, diru gehiago bideratzea ezinbestekoa ikusten dugu. Horretarako, soberakinetik beharrezkoa den aparteko diru partida eskola berriaren proiektura bideratzea exijituko du EH Bilduk.
ETXEBARRIN ERE GEHIAGO, GEHIAGOREKIN, GEHIAGOTAN! 2020ko urte berezi honetan, Euskaraldia ere berezia izan da, baina aurtengo honetan ere ugari izan gara Euskaraldian parte hartu dugun etxebarritarrak. Guztira 177 herritarrek eman genuen izena, 165 ahobizi eta 12 belarriprest, eta arigune ezberdinak ere izan genituen. Euskaraldiaren helburu nagusia herritarren hizkuntza ohiturak aldatuta euskararen erabilera handitzea da. Helburu horretara pixkanaka hurbiltzen joateko, egunez egun jarraitu behar dugu, norbanako konpromisotik tira eginez euskara erdigunean jarri eta bidean aurrera pausuak emanez. Egin dezagun gehiago, gehiagorekin eta gehiagotan euskaraz!
KULTURA, SEGURUA ETA OSASUNTSUA Bukatu da 2020a, martxoko konfinamenduaz geroztik birus baten izenak izana kendu dion urtea, eta zer txar ekarri duen edo zer kendu digun entzunez hilabeteak pasa baditugu ere, asko eman eta hausnartzeko aukera ere eskaini digu. Kulturaren garrantziaz jabetzeko aukera izan da horietako bat; konfinamenduan ugari izan ziren musutruk kontzertuak, bakarrizketak, antzezlanak‌ eskaini zituzten sortzaileak, eta beraiei esker poza eta umorea zabaldu ziren etxez etxe. Gero kalera irteten hasteko egunak iritsi ziren eta segurtasun eza eta kontagio arriskuaren aitzakiaz eskaintza kulturala ia ezerezean geratu zen. Halere, tokian-tokian izan ziren eta badira bazterrak argitu eta kontzertu, bertso saio, antzezlan eta ekitaldi ezberdinak antolatzen dabiltzanak, eta bide horretatik jarraitzea ezinbestekoa da. Kultura segurua, beharrezkoa eta osasuntsua da. Kultura poza eta gozamena ere bada, eta baita negarra eta emozio uholdea ere. Gu gara kultura, eta kulturak egiten gaitu hein handi batean gu. Beraz zaindu, babestu eta hauspotu dezagun!
Pandemia dela eta ezingo da egin urtarrilean Bilboko kaleetan Euskal Preso Politiko eta Iheslarien alde egin ohi dugun manifestazioa. Hori horrela, aurten herriz-herri mobilizatuko gara oihartzuna lau haizetara eramanez.