CÓMU ECHAR SIDRE. APUNTES DE PROTOCOLU

Cómu echar sidre

Apuntes de protocolu

Aparte de la so funcionalidá de meyorar la calidá de la sidre y potenciar les sos carauterístiques organoléutiques, l’arte d’echar la sidre -y de bebelo- nun dexa de tener muncho de ritual, polo que ye necesario conocer dalgunos detalles cuando se va de chigres, pa nun meter la pata. Dexo dalgunes notes, principalmente pa xente de fuera, los asturianos llevámoslo nel ADN

Llegues al chigre. Si mires a los güeyos al camareru alzando un deu, lo más probable ye que yá sepa lo que quies. Sicasí, lo avezao ye pidir una botella, tampoco nun ye imprescindible decir de qué -a nun ser que quieras especificar el palu-; si pides una botella, va ser de sidre. Si quies otra, repites el procesu, o cenciellamente dices “otra”. Otra siempres ye de sidre. Si quies más d’una nun digas “pon dos sidras”, nunca, la sidre ye incontable. Lo correcho ye pedir dos (o tres, o cuatro) de sidre, o dos botelles. Avisu pa foriatos, nun pidas “sidriña” qu’igual les lleves. Tate atentu al camareru pa garrar el vasu cuando te lu apurra, da-y les gracies, que nun cuesta ná, y remembra pasar el déu pel culu’l vasu pa evitar la posible pingaratada na camisa. Yá te despliquemos en númberos anteriores comu lo beber, d’una y dexando un plizcu. Nun quedes col vasu na man, anque yá nun se compartan, pósalu. Ta vacíu. Nun ye un cacharru. Con elli na man namás vas calecelu y emporcalu, y l’echaor nun lu va topar cuando lu busque pa la prósima ronda. Pósalu, recoime. Nun pidas que retiren les botelles vacíes de la barra o la mesa, tan ehí pa cuntar les que falten por pagar. Cuando daquién pague una, retírase una. Cuando quies convidar a daquién que ta al otru estremu la barra, dices-y al camareru cuántes te cobra y elli va retirar esautamente eses. Ye un sistema mui práuticu de controlar los pagos y amás val pa dir faciéndose una idega de lo bebío. Pa finar, si tas tomando sidre na barra ties que saber que ta permitío entrar en conversación col restu la xente que ta nella, nun t’esmolezas nin te faigas idegues estrañes si un completu desconocíu o desconocía se pon a falar contigo, la sidre ye bébora social y llama a charrar... o a echar una cantaría. Préstamos.

Meyor Sidre Casero d’Asturies

El prósimu 23 d’ochobre otorgaránse en Villaviciosa los Premios Mundo Collada’22 a les meyores sidres d’Asturies d’ellaboración casero

El concursu, esperáu con auténtica pasión polos amantes de la sidre, ta entamáu pola Asociación pol Fomentu de la Sidre Tradicional Asturiana, y cuntará cola participación de los trés primeros clasificaos nos estremaos concursos de sidre casero que se fain per conceyos. L’eventu escomenzará’l xueves 20 d’ochobre na Plaza d’Abastos de La Villa, onde se drián faciendor les elliminatories. La final y el convite popular tendrá llugar el domingu 23 a les 12 hores na plaza’l Güevu. Previamente, el 19 d’ochobre, fadráse un cursu formativu en tastia de sidre que se cellebrará na Cafetería Avenida a les 19 hores, pa les presones que puean tar interesaes en formar parte del xuráu. El cursu tará impartíu por enólogos y espertos sidreros. Los Premios Mundo Collada consistirán en: * 1er Premiu: Troféu, Diploma, 20 pumares francos de dos años y 2.500 corchos * 2u Premiu: Troféu, Diploma, 15 pumares francos de dos años y una descorchadora * 3er Premiu: Troféu, Diploma, 10 pumares francos de dos años *4u al 12 Puestu: Troféu y Diploma

‘La Manzana. Valor higiénico y medicamentoso de la misma y sus derivados´

El Depósitu Museísticu de LA SIDRA nel Muséu del Pueblu d’Asturies vese enriquecíu con una nuea aportación: el llibru del Dr. Manuel Tuya Rubiera sobro la mazana

Trátase d’un llibru editáu en 1943, con prólogu de D. Andrés Monreal, Caderalgu de la Escuela Profesional de Comerciu de Xixón, y editáu pola Escuela de Peritos Industriales de Xixón, qu’a lo llargo de les sos 150 páxines describe dende la propia mazana, el so cultivu, les sos propiedaes como alimentu y melicamentu, les races de mazana, los emplegos de la mazana, del zusmiu de la mazana... y por supuestu de la sidre ‘como bebida higiénica’, asina como del propiu vinagre, destacando un interesante capítulu ‘Cómo se ha de beber la sidra, conforme a los preceptos higiénicos’ onde al referise a les sidres en xeneral desplica que: “el beberlas moderadamente proporciona un doble placer, gustativo y cordial, que por gozarlo en alguna ocasión no puede producir serios trastornos orgánicoos; a tal fin es preciso convertir el beber en un arte” Hai que recordar que la donación d’ellementos museísticos a esti depósitu garantiza la so conservación al traviés del tiempu y la so puesta a dimposición pal estudiu y la consulta pública, engabitando asina a la necesaria ellaboración d’un corpus hestóricu col qu’afitar la cultura sidrera asturiana al traviés de los tiempos.