Fagdeild sjúkraflutninga

Fagdeild sjúkraflutningamanna er vettvangur okkar til samvinnu í málefnum sjúkraflutninga og bráðaþjónustu utan spítala. Henni er ætlað að stuðla að faglegri framþróun, meðal annars með því að efla fræðslu og kynningu um fagleg málefni. Fagdeildin er ráðgefandi til stjórnar LSS. Henni er ætlað að standa að bættu skipulagi sjúkraflutninga, hvort heldur er í lofti, á láði eða legi. Þetta kemur fram í reglum fagdeildarinnar. Verkefni á borði fagdeildar eru mörg, líkt og þau hafa verið undanfarin ár og málin af ýmsum toga. Nú í vor er stjórnin að ljúka sínu fyrsta starfsári og það hefur verið ærið og lærdómsríkt fyrir nýjan formann og stjórn að taka á þessum málum. Starfið er krefjandi en það er góður andi í hópnum sem býr vel að breiðri reynslu og hefur meirihluti hópsins setið áður í stjórn fagdeildarinnar. Ný stjórn býr einnig vel að þeirri vinnu sem unnin var af fyrirrennurum sínum. Mikil framþróun hefur verið í málefnum okkar á síðustu árum, þökk sé óeigingjörnu starfi þeirra sem hafa látið sig málefnin varða. Mikil vinna er þó fyrir höndum og margt sem við öll, veitendur bráðaþjónustu utan spítala, viljum bæta.

Menntun

Nýtt og uppfært nám Sjúkraflutningaskólans er komið í gagnið og er efnið og fyrirkomulag farið að slípast til. Mikil aðsókn hefur verið í grunnnámið undanfarið. Flestir sækja streymisnámið þar sem bóklegi hlutinn er tekinn á internetinu og verklegar lotur síðan haldnar víða um landið. Framhaldsnámið, sem heitir í dag EMT-A, fer einnig að mestu fram í streymi. Námið skiptis í fjórar lotur en miðað er við að það taki nemendur u.þ.b. eitt ár að ljúka náminu en í lokin er verklegt færnimat. Hermiþjálfun er á uppleið og það er góð reynsla af slíkri þjálfun í löndunum í kringum okkur. Hermiþjálfun hefur reynst mjög árangursrík við menntun heilbrigðisstarfsfólks og hún á sérstaklega vel við bráðaþjónustu. Það hefur aukist til muna að hermiþjálfun sé notuð við menntun sjúkraflutningamanna hér á landi Birkir Árnason, formaður fagdeildar sjúkraflutningamanna LSS og þeim stöðum sem eiga til búnað og aðstöðu til hermiþjálfunar fjölgar. Hvað á að kenna með hermiþjálfun og hvernig á hermiþjálfunin að fara fram? Það er ærið verkefni fyrir okkur að þróa þessa kennsluaðferð hér heima. Við þurfum að vera dugleg að bera saman bækur okkar og læra hvert af öðru. Gaman væri að sjá vettvang til samskipta og samræmingar og fagdeildin er boðin og búin að leggja sitt af mörkum. Einnig er lag að skoða samstarf við aðrar heilbrigðisstéttir. Kennslusetur Landsspítalans hefur t.d. náð góðum árangri við uppbyggingu aðstöðu og aðferða og væri því kjörið að læra af félögum okkar þar. Bráðatæknum heldur áfram að fjölga með tilkomu nýrra námsleiða. Einnig fjölgar þeim bráðatæknum sem mennta sig til hærra námsstigs og í dag eru þrír starfandi bráðatæknar með B.Sc. gráðu í faginu og fleiri eru í námi. Það er gott því það styrkir okkur sem stétt að hækka menntunarstigið. Þannig tryggjum við okkur betur sæti við borðið þegar kemur að stefnumótun stjórnvalda um málaflokkinn. Hærra menntunarstig styrkir líka grunvöll þess að framkvæmdar séu rannsóknir í faginu af þeim sem því sinna og gaman væri að sjá þá vinnu aukast. Slík rannsóknarvinna er forsenda breytinga og þróunar í átt að betri þjónustu. Flestar tölur sækjum við erlendis frá en Ísland er á margan hátt sérstakt og þess vegna er þörf á rannsóknum hér heima til þess að tölfræði til grundvallarbreytinga eigi sem best við. Önnur viðbótarmenntun af ýmsum toga er einnig að verða sýnilegri. Ýmsar leiðir eru til sérhæfingar með námskeiðum bæði hér heima og erlendis. Tækifærin eru mörg, sýnum frumkvæði. Þetta byrjar hjá okkur.

Samstarf við yfirlækni utanspítalaþjónustu

Fagdeildin hefur átt gott samstarf við yfirlækni utanspítalaþjónustu og vill þakka það sérstaklega. Formaður

hefur fundað með yfirlækni reglulega en það er mikil samlegð milli verkefna á hans borði og verkefna fagdeildarinnar. Eitt af verkefnum yfirlæknis er rafræn sjúkraskráning. Mörgum stekkur bros á vör þegar minnst er á rafrænar sjúkraflutningaskýrslur en þær hafa lengi verið ,,handan við hornið” eins og svo margt í okkar málaflokki. Í því máli er þó það að frétta að búið er að stofna starfshóp hjá Embætti landlæknis sem er ætlað að koma hugbúnaði fyrir rafrænar sjúkraflutningaskýrslur í gagnið. Í hópnum sitja starfsmenn frá embættinu og yfirlæknir utanspítalaþjónustu en einnig hefur Ólafur Kristján Ragnarsson verið ráðinn í hálft starf. Ólafur er sjúkraflutningamaður og hefur unnið í hugbúnaðarmálum hjá SHS. Ólafur smíðaði meðal annars leiðsögukerfið og hnappaboðunina sem er í notkun þar og víðar. Að verkinu koma einnig rýnihópar sem hittast reglulega og fylgjast með framvindu mála. Möguleikarnir í skráningu og úrvinnslu gagna eru nær endalausir en stefnt er á að byrja smátt og bæta við í skrefum. Þetta er áfangasigur og því ber að fagna. Það var einnig mikill áfangasigur þegar gefnar voru út fyrir landið verklagsleiðbeiningar um meðferð vegna gruns um áverka á hrygg. Njáll Pálsson, Viðar Magnússon og fleiri eiga miklar þakkir skildar fyrir sína vinnu. Þetta opnaði farveg fyrir frekari uppfærslur og staðfesti umboð yfirlæknis til útgáfu nýrra ferla. Fagdeildin telur að nú eigi ráðast í verkefnið af fullum krafti og stofna eigi formlega starfshóp undir yfirlækni utanspítalaþjónustu til þess að framkvæma heildaruppfærslu á vinnuferlum sjúkraflutningamanna. Mörg önnur verkefni eru á borði yfirlæknis og fagdeildin vonast eftir áframhaldandi samstarfi. Sem dæmi má nefna endurskoðun reglugerða um sjúkraflutninga, námskrá sjúkraflutningamanna, þjónustuviðmið og boðunarkort 112. Yfirlæknir utanspítalaþjónustu hefur unnið mikið og gott starf en það er þó alveg ljóst að styrkja þarf embætti hans og skýra hlutverk. Mikilvægt er að yfirlæknir fái fjármagn til umráða og starfsfólk.

MBUS

Fagdeildin hefur fylgt á eftir ályktun LSS um stofnun MBUS, miðstöðvar bráðaþjónustu utan spítala. Hugmyndin um stofnun miðstöðvarinnar var rædd á fundi fagráðs sjúkraflutninga með heilbrigðisráðherra. Þá var þörfin fyrir utanumhald málaflokksins útskýrð ásamt þörfinni fyrir frekari gæðastjórnun og setningu þjónustuviðmiða fyrir allt landið. Ráðherra tók undir að þarna þyrfti að gera bót á. Ráðherra hefur látið í ljós mikinn á huga á málaflokknum og lagði velferðarnefnd Alþingis nýverið fram þingsályktunartillögu þess efnis að ráðherra fengi formlegt umboð til heildar endurskipulagningar málaflokksins. Þetta eru mjög ánægjulegar fréttir og fagdeildin vill koma á framfæri mikilvægi þess að þétt samstarf verði með fulltrúum stéttarinnar við þessa vinnu og að einnig verði stuðst við það efni sem áður hefur verið lagt fram vegna framtíðar skipulags sjúkraflutninga. Fagdeildin hefur stofnað sérstakan starfshóp sem mun taka fyrir og skilgreina betur hugmyndina um MBUS og mögulegar útfærslur.

Sjúkrabílar

Það er ekki nýtt að það vanti sjúkrabíla, það er staða sem við höfum kynnst áður en nú virðist svo komið að við séum að glíma við vandamál á nýjum skala. Eins og kunnugt er hefur ríkinu ekki tekist að fjármagna útboð nýrra sjúkrabíla og viðræður standa enn yfir við Rauða krossinn um uppgjör sjúkrabílasjóðs. Flotinn er illa á sig kominn og búnaðarmálin sitja einnig á hakanum en fjölnota búnaður í bílunum er víða kominn til ára sinna og kröfur aukast um uppfærslur með tilkomu nýrrar tækni. Landssambandið hefur lagt sitt af mörkum til þess að þrýsta á framgang í þessu ferli. Hvergi er um það deilt að staðan sé alvarleg en LSS hefur komið sjónarmiðum sínum á framfæri við almenning, við þingmenn, velferðarnefnd Alþingis og við ráðherra. Ríkið og Rauði krossinn hafa sammælst um að ræða ekki efnisatriði uppgjörsins út á við. Ráðherra hefur þó blásið okkur von í brjóst og segir málin þokast í rétta átt. Við þurfum í millitíðinni að gæta að þeirri auknu hættu sem við stöndum frammi fyrir og taka sérstakt tillit til ástands tækisins sem við ökum.

Að lokum

Þetta eru einungis dæmi um það helsta sem fagdeildin vinnur að en meðal annarra verkefna má nefna málefni vettvangsliða og ráðstefnuna Á vakt fyrir Ísland 2019. Þá kom fagdeildin að mótun stefnu fyrir heilbrigðisþjónustu til ársins 2030 í gegnum samráðsgátt stjórnvalda. Í stefnuna vantaði mikið upp á sýnileika og vægi sjúkraflutninga og bráðaþjónustu utan spítala. Fagdeildin skilaði inn athugasemdum við stefnuna og ánægjulegt var að sjá að breytingar höfðu verið gerðar á stefnunni þegar hún barst LSS svo aftur til umsagnar ásamt þingsályktunartillögu sem henni fylgdi. Fagdeildin er líka á internetinu. Hópurinn okkar á Facebook fer stækkandi og telur orðið yfir 500 manns. Sú umræða hefur komið upp hvernig stýra ætti aðgangi að síðunni því ekki eru eingöngu félagsmenn með aðgang að henni í dag. Þar eru ef til vill margir fyrrverandi félagsmenn og svo aðrir sem hafa áhuga á málefnum fagdeildarinnar. Stjórn fagdeildarinnar vill fara þá leið að meina engum aðgang að síðunni. Þetta er því eitthvað sem er gott að hafa í huga þegar efni er sett inn á síðuna, þjóð veit þá 500 vita og er það góð áminning fyrir okkur um að hafa umræður málefnalegar og efni við hæfi. Það er einnig vilji stjórnar að koma inn á síðuna meiri fróðleik og menntun. Gaman er að segja frá því að framtaksmiklir sjúkraflutningamenn hjá HSU hafa nú komið í loftið hlaðvarpi (e. podcast) um bráðaþjónustu og heitir það Bráðavarpið. Finna má tengil á hlaðvarpið á síðu fagdeildarinnar á Facebook. Fagdeildin vill koma á framfæri þökkum fyrir framtakið. Mörg önnur smærri verkefni rata á borð fagdeildar ásamt nefnda- og fagráðssetu stjórnarmanna. Stjórnin vill benda félagsmönnum á að hafa samband ef þess er óskað að sérstök mál séu tekin fyrir og bendir á netfangið sjukra@lsos.is

Fyrir hönd fagdeildarinnar vil ég óska félagsmönnum öllum gleðilegs sumars og gæfu í starfi.

Set ehf. Röraverksmiðja Eyravegur 41 800 Selfoss

Sími Fax +354 480 2700 +354 482 2099

Brunahanar og lagnir frá Set

Set röraverksmiðja er umboðsaðili fyrir brunahana frá danska fyrirtækinu AVK

Snemma árs 2012 varð Set röraverksmiðja fyrir miklu tjóni af völdum elds. Skjót viðbrögð slökkviliðsmanna urðu fyrirtækinu til happs, en það hefði geta farið mun verr ef eldurinn hefði læst sig í nærliggjandi byggingum.

Þetta kennir okkur að mikilvægt er að hafa brunavarnir í lagi. Með lögnum frá Set og brunahönum frá AVK er hægt að tryggja gott aðgengi að vatni. Fjögurra áratuga starfsemi fyrirtækisins hefur öðru fremur einkennst af mjög virku samkeppnisumhverfi. Þær aðstæður hafa kallað á árvekni og skjót viðbrögð þar sem áhersla hefur verið lögð á hátt tæknistig, framleiðni og gæðavitund. Mikil þekking og reynsla hefur skapast á sviði framleiðslutækni hjá fyrirtækinu. Á það einnig við um kunnáttu á sviði markaðsmála og þjónustu við lagnaiðnaðinn.