Madonna tal-Karmnu Ħarisna

Alfred Zammit Sindku tal-Belt Valletta

Huwa ta’ unur u pjaċir kbir għalija li għal sena oħra ġejt mistieden nikteb kelmtejn mill-Kumitat Organizzativ tal-Festa tal-Madonna tal-Karmnu li tiġi organizzata bl-akbar solennità fis-16 ta’ Lulju, fil-Belt Kapitali Valletta sabiex bħala Sindku naqsam magħkom dan il-ferħ tal-festa kif ukoll ftit ħsibijiet dwar il-komunità Beltija. Bla dubju ta’ xejn għexna perjodu f'ħajjitna fejn sirna aktar konxji ta' kemm hi kbira l-providenza Divina, fejn għalkemm għexna pandemija li żgur ser tħalli effett fuqna għandna għalfejn inkunu grati lejn Alla l-imbierek li għal darba oħra kien ħanin magħna l-Maltin. Bosta kienu dawk li sabu kenn għand Ommna Marija taħt it-titlu talKarmelu, huwa tajjeb ħafna li aħna nirrikorru għand din l-Omm, iżda dan għandu jsir f’kull mument ta’ ħajjitna u mhux biss f'mument ta' diffikulta!

Kienu bosta Beltin u Maltin li talbu għall- interċessjoni tagħha fejn għalkemm kien hemm żmien fejn is-Santwarju bħall-knejjes kollha li ma kinux aċċessibli, bosta kienu dawk li rrikorrew għall-ħarsien u talbu lill-Madonna għallprotezzjoni tal-familji u l-għeżież tagħna. Anke permezz tal-media soċjali fejn permezz ta’ xbihat ta' din l-Omm ħanina ħafna kienu dawk li qawwew qalbhom. Illum bdejna niġu lura għan-normalità grazzi għal Ommna Marija, u nispera li bħala Nsara nibqgħu rikonoxxenti lejn Omm Alla l-imbierek dejjem u mhux biss fil-mument ta’ bżonn!

Ta’ min isemmi l-ħidma kontinwa tal-Pirjol Fr Alex Scerri O.Carm u l-komunità Karmelita tal-Belt kollha fejn baqgħu jassistu b’kull mod possibbli lill-Komunità Nisranija Beltija, fejn baqgħu jwasslu l-kelma ta’ Sidna Ġesù Kristu u saħansitra assistew ukoll l-anzjani u l-persuni l-aktar vulnerabbli fil-komunità, fejn ħadmu id f'id miegħi bħala Sindku fejn żgurajna li dawn in-nies ma jkunu nieqsa minn xejn, kif ukoll provdejna ikliet kuljum imwassla fi djarhom. Aħna bħala Gvern Lokali wkoll komplejna bil-ħidma tagħna u assistejna lill-Komunità Karmelitana f’bosta proġetti u attivitajiet, kif ukoll lillGħaqda Festa Madonna talKarmnu li għalkemm il-festi esterni mhux ser isiru jew ser isiru f'forma ridotta xorta kompliet bil-ħidma tagħha fejn bosta żgħażagħ kienu attivi anke waqt żmien il-pandemija. Bħala Gvern Lokali ser nibqgħu impenjati biex naraw li l-Festi tagħna li apparti li huma uniċi jibqgħu jitkattru, kif ukoll jibqgħu jsaħħu l-identità Beltija, ser niżguraw li permezz tal-kumitat Festi Beltin li jaqa' taħt il-kappa tal-Kunsill Lokali l-festi tagħna jgawdu minn għajnuna varja li tiżgura li l-ġid komuni jitqassam b’mod ugwali. Minn qalbi nixtieq ngħid grazzi lil dawk ilvoluntiera li jaħdmu f'dawn l-għaqdiet diversi tal-festi rispettivi matul is-sena għall-ġid tal-festi Beltin u tal-Belt Valletta. Nagħlaq billi nirringrazzja lill-Pirjol u l-komunità Karmelitana tal-Belt Valletta, lill-Kumitat u diversi sezzjonijiet fi ħdan l-Għaqda Festa Madonna talKarmnu kif ukoll insellem lil ħuti Beltin Karmelitani u lid-devoti Beltin u Maltin ta’ din l-Omm hekk ħanina.

Grazzi Madonna, Ħarisna Madonna. Viva l-Madonna tal-Karmnu.