ané paling beneh (IGA Darma Putra

Lawat-lawat

ané paling beneh

IGA Darma Putra

Nyén paling beneha di guminé? Makejang anaké ané idup di guminé pasti pelih. Lekad masih ulian kapelihan. Sing ada ané beneh yén suba taén lekad. Unduké ené suba liu ada di satua-satuané. Contoné, di satua Sumanasantaka, ada koné dedari pelih, laut ia lekad dadi manusa. Bhatara Smara lan Bhatari Ratih, masih taén pelih, laut ida kapastu apang nyusup ring sarwa prani dini di guminé. Bhatari Uma taén masih Ida iwang, laut manresti ulung ka jagaté. Intinné, sabatek ané ada di guminé ené, ada ulian kapelihané soang-soang.

Kapelihané ento dadi koné tebus aji keneh ané luung, bebaosan ané luung lan parilaksana ané luung. Pelih ento jelék, cara endut ané neket di muan iragané. Liu anak bisa ngatarang pelih-pelih anak lén cara ngatarang endut di muané. Sénglad mirib tepukina tekén anaké ané demen ngatarang ento. Yén tiang ngenehang, sinah ulian kenehné luung ngatarang apang muan iragané ané misi endut lantas tawang. Dadiné iraga ijuk ngalih yéh anggon masugi. Sing dadi kakedékan anak.

Manusané mulan liu ngelah pelih. Cara satuané ituni, uling mara lekad iraga suba pelih. Alihin sekenang di warigané, ada dogén dedinan ané ngaranayang palekadané sing luung. Bisa palelintangané tunan, bisa wewarané kaon, bisa masih wukuné ané ngarad jelé. Makejang ento dadi tebus aji banten pabayuhan. Banten pabayuhan ento, cara yéh ané anggon nyuginin muané ané misi endut ituni.

Jani disubané iraga lekad tur idup di guminé, iraga patut maparilaksana melah. Parilaksana ané madan melah, suba ada daftarné di lontar-lontaré. Sing dadi koné linyok tekén lontaré ento. Wiréh yén linyok, kapastu koné iraga olih Sang Hyang Aji Saraswati. Pamastuné, bisa iraga dadi anak belog. Iraga liu ané jejeh kena pastu, sakéwala sing jejeh dadi anak belog.

Belog ento tusing jelék. Mapan liu ada anak malajah apang dadi belog. Ané malajah belog, wantah anak ané suba dueg-dueg. Paplajahané orahanga tasak, yén suba mabalik buin marasa belog. Disubané marasa belog, buin apang

tincapang paplajahané dadi anak polos. Sing dadi anak dueg ento mapi-mapi dueg tur nyapa kadi aku. Nah kéto pokokné kautaman paplajahan belog-polosé.

Jani buin ada satua, koné yén manusané terus maparilaksana pelih, bindan lakar lekad dadi buron. Ada dadi beburon mabatis papat, dadua, telu. Ada masih ané lekad dadi buron mabatis liu, kanti buron ané sing mabatis. Apa karanané buka kéto? Manut ajahan agama, ané ngaranayang tuah parilaksanané dugasé enu idup dadi jlema. Nyansan jelék parilaksanané, nyansan jelék palekadané.

Disagété suba dadi buron, lantas buin maparilaksana pelih, bindan lekad dadi punyan-punyanan. Suba dadi punyan-punyanan buin pelih, bisa dadi dakin dasar neraka. Eda pesan matakon apa seken neraka lan suargan ento ada, wiréh yén iraga nakonang ento patuh artiné iraga tusing ngugu agama. Yén suba kadalih tusing ngugu agama, bisa matendang uli di mercapada. Suba taén ada ané keto ipidan di guminé ené. Sing kéto?

Pokokné makejang ento suba masurat buka kéto di lontar ané paling tengeta. Sing dadi nakonang, apa beneh apa pelih lontaré ento. Makejang ané masurat di lontaré pasti beneh, sawiréh suba taén entasina tekén tua-tuané imaluan. Yén tusing ulian taén ngentasin, kudianga anaké tua nulis cara kéto? Masak tua-tuané nulis kéto ulian kepupungan, pasti tusing mungkin. Sanistané tua-tuané nulis keto pasti ulian taén ningeh tutur uli anak ané tuanan. Yén sing kéto, pasti maan ulian ngregepang ilmu-ilmu kadhyatmikan.

Kétolah satuan beneh-pelih lan belog-polos ané taén bakat dingehang uli tua-tuané imaluan. Nah, yén keto unduké, nyén lantas ané paling beneha di guminé? Manut kecap lontar tan patulisé, tuah Siaku!!!

IGA Darma Putra

embas lan magenah ring Bangli. Kakawiannyané kawedar ring makudangkudang média, minakadi Bali Post, Pos Bali, Tatkala.co, Suara Saking Bali, miwah sané lianan. Ngamolihang Hadiah Sastera Rancage 2018 antuk cakepan “Bulan Sisi Kauh”