geguritan bangbang wétan (IBW Widiasa Kenitén

Geguritan

geguritan bangbang wétan

IBW Widiasa Kenitén

Pupuh Sinom

/25/

Nekėng twas awyawahara, tṛeṣṇa matulung ngolasin, matungkas menggah edohang, solah ayunė kakimkim, margi tumus alus singgih, suṡila nganutin sulur, ngrajegang kerthaning idhep, ngulat sih ngulati ṡanthi, tṛepti tutur, ri ṡabha ṡabhaning ṡastra.

/26/

Tṛeṣṇa sih ring para warga, sang katunan to tulungin, mumah tuduh dasar tanah, kalaran nuléngék langit, idup di margi mangepil, buka nganti damuh tedun, baju dekil seduk basang, awak berig urag-arig, wéhin ipun, amertha urip pangenteg.

/27/

Nėnten ngamandung astėya, ninggalin polah mamaling, mamandung nyungkanin krama, sang katunan tulus miskin, bilih-bilih jagat kali, artanė manados pucuk, sang ṡadhu kėris mayaṣa, icalang yadyastun sukil, sugih patut, tandur uripang sadina.

/28/

Arta negara becikang, eda ngéndah ngamalingin, majuk mimpus makrangkėng, nongos di bui mangempi,

tikas melah inget alih, solah anut marga sulur, nguluk-nguluk to icalang, arta patut ento alih, sinah nyiku, solah melah ėlah dangsah.

/29/

Akroda tan menggah galak, degdeg ṡadhu galang ati, bendunė somya nemu lyang, tutur ṡastranė kakemit, nuturin ya jroning ati, sang ngantenang raṣa patut, antar makanti sawitra, kadang warga tan mapilih, janten pangguh, kedėk pakenyung manglimbak.

/30/

Sang ngutamayang akroda, degdeg kayun welas budhi, roma muka caya dharmma, wikan milah kaon becik, tatas dūrgamaning ati, tan nué meseh ri kayun, banban atur ngeloh dangsah , walang ati joh kapinggir, idhep patut,

ngenteg kayun uttamayang.

/31/

Bhakti ring guru suṡruṣa, catur guru kang uttami, pertama guru swadyaya, subhakti ring Sanghyang Widhi, dėwa yadnya yaṣa kėrthi, manut ṡaṡih dina wuku, pañca wara sapta wara, pūrnama tilem sutṛepti, galah ayu, ngrastityang mandala praja.

/32/

Canang raka canang sekar, dakṣina linggih hyang Widhi, pejatiné nyatyang idhep, banten ṡuciné uttami, asep arum sekar merik, nekéng twas bantangipun, manut ring prawerthi yadnya, sang sadaka sang tapini, iring tuur, muput yadnya sidha karya.

(pacang kalanturang....)