magarang (IGA Darma Putra

Lawat-lawat

magarang

IGA Darma Putra

IBojog ngadén I Lutung ané ngrusuhin tegalan biunné. I Lutung ngadén I Bojog ané ngamaling di abian manggisné. Buka dua nepukin pamulamulané pada-pada benyah. Sing ada buah-buahan ané masisa. Pocol buka dua miara abiané. Neked leluhur ané ngelahang tanahné masih bareng rugi, wiréh tusing maan atur-aturan banten nuju piodalan ané lakar teka.

Buka dua saling kadén. Buka dua saling tuduh. Buka dua pusing ngenehang éngkén carané apang ngidang maan bekel anggo nyalanang odalan. Yén tusing ngodalin, bisa-bisa betarané pedih. Prajani bisa panjakné kena sisip. Sing nyidang taur aji banten angiyu, musti taur baan atma!

Wiréh kéto, I Bojog ajak I Lutung prajani konsolidasi pada-pada ngalih ruang. Tangkil ia milehan mecik manggis apang ada anak ngugu. Pangedépangedé di organisasi perburonan, makejang aliha, ajuma, anyuda, lantas bakatanga negul baan omongan manis malenyad. Mapiakan prajani prajuru organisasiné. Ada ané ngaruangin I Bojog, ada ané nukung I Lutung.

I Bojog tusing didiana ngalih ruang. Sabilang pesu, setata ia ngajak ajudan. Apang ada nyupirin, apang ada néngténg tas gandékné ané misi hapé paling mael sajagat raya. Di hapéné ento masimpen data-data sakala niskala. Ada data utang piutang, ada data palaba pura, ada daftar adan pangedé ané lakar aliha tur ané suba bakatanga. Lengkap suba ditu isin hapénné aji data-data. Uling ané suci, kanti ané cemer. Uling mantra-mantra pingit kanti pilem singid.

Ipidan yéh sagarané ané orahanga tusing kena suci-campur. Ané suci ajak ané leteh, madukan ditu tusing nyidang malasang. Ané jani, sagarané suba masiluman dadi hapé ané paling maela sajagat raya. Hapéné dadi macelep ka Pura, dadi masih ka sétra. Neked ka WC, hapéné dadi macelep. Suba patuh tingkat réligiusitas hapé ajak pipisé ané tusing kena sebelan.

I Lutung tusing masih taén didiana maleluasan lakar ngalih dukungan. Setata ia ngajak sékretaris pribadinné ané suba sadia nyatet apa dogén pangeluaran iané ngabulan. Sékretarisné seleg pesan ngayahin sapula-pali ané perluanga tekén I Lutung. Makejang-kejangné sékprinné ané ngurusang. Uli

sisin kulit kanti ka tengahan basang. Uling duur kanti ka betén. Pokokné I Lutung nerima bérés.

I Lutung mulan sugih maliah, kanti kéweh meték pipisné aji jrijin batis. Kemu mai ia ada ngayahin. Sing ada lénan, tuah abian manggis ané héktarhéktaran ento ané makada. To suba sangkalanga, jani ia mabela pati apanga ngidang menang ngalawan I Bojog ané kasengguh suba ngamaling di abian manggisné. Cutetné jeg sikat!!!

Ada lantas panua uli di Provinsi Anu. Suba kaloktah baan liu nawang shastra. Nyén ja anaké ada maprekara, pasti kemu nunas patunjuk apang manut pajalané ajak shastra agama. Suba jelas di masyarakat perburonan, shastra agama ento cara senjata. Senjata ané manganan tekén ngad, wiréh ngidang ngorok keneh anak.

Sik malu, I Bojog teka kemu masadu nyaduang kabrebehané kilangan biu sadah ategalan. Ia kemu tusing ja puyung limanné. Suba siapanga pis abendel apang Panua Provinsi Anu nyak ngaruangin ibanné. Ajudané sibuk néngténg tasné. Gupuh ajudané majalan di malunné. Pokokné jagana pesan pajalan I Bojogé apang rahayu kanti kawekas tekén ajudanné. Sagét ada tain cicing, prajani ia sibuk nyampatang apang tusing bakat enjeka tekén I Bojog.

Suba matepuk ajak panua Provinsi Anu, uli A kanti Z suba masih telah baana nuturang tekén I Bojog. Cutetné ia jeg seken pasaja yakin, ané nguugang abianné tuah I Lutung. Tusing ja ada lénan buin. Panua Provinsi Anu anggutanggut menehang pajalan I Bojogé sambilanga nyledétin amplop cokelat ané ngenah abedik di tas I Bojogé. “Seken ento Bojog, nyanan Pak ja ngurusang,” kéto abetné panua Provinsi Anu. I Bojog anggut-anggut demen, panua Provinsi Anu masih bareng manggutan misi kejit-kejit.

Disubané I Bojog mulih, teka jani I Lutung menghadap panua Provinsi Anu, patuh ngaba amplop abendel. Sakéwala, amplop I Lutungé mawarna putih. Secara garis besar, patuh satuan masalah I Lutungé ajak I Bojogé. Pokokné menurut I Lutung, suba pasti I Bojog ané ngamaling di abian manggisné.

Panua Provinsi Anu anggut-anggut sambilanga ngusud jagutné ané tusing misi jénggot. “Beneh ento Lutung, nyanan Pak ja ngurusang,” kéto buin pasaut panua Provinsiné sambilanga kejit-kejit nyledetin amplop putih ané gembela tekén I Lutung. I Lutung makenyem wiréh demen atinné. Suba pasti jani I Bojog lakar kena bui.

I Bojog lantas mulih. Panua Provinsi ngelunin pembantunné. Pembantunné teka ngaba piring misi biu ajak manggis ané seger-seger. Buka dua jemaka tekén Panua Provinsi Anu sambilanga kenyem-kenyem. “Sajan buka sesenggakané, luas Bojog teka Lutung… buahahaha.”

IGA Darma Putra

embas lan magenah ring Bangli. Kakawiannyané kawedar ring makudangkudang média, minakadi Bali Post, Pos Bali, Tatkala.co, Suara Saking Bali, miwah sané lianan. Ngamolihang Hadiah Sastera Rancage 2018 antuk cakepan “Bulan Sisi Kauh”