Mentira no ta gaña bèrdat

Mi tabata buskando mi mes un bèrdat, sin sa ni di komprondé òf aklará loke tabata pasando.

Rondoná ku nubia yená ku skuridat. Mi wowonan a bira skur, mi no por mira nada ku klaridat. Na ami? Un pensamentu inmenso, no tin mas solo ku por iluminá mi kaminda.

Kanando den e kayanan goberná pa hende korupto. Skuchando di mi propio lidernan, palabra yená ku mentira. Hende papiando di salbashon, entre nan mes, akto di kondenashon.

Engaño? A bira algu fásil, simpel, sin di kultat pa pronunsiá. E bèrdat no ta ser apresiá i e mentira, alabá.

Poniendo nan riba balansa, m’a bin ripará ku engaño ta mas pisá. E bèrdat ta liviano, manera un simpel pluma, sin peso ni kompromiso.

I abo? Nada bo n’ hasi, bo n’ tin bèrgwensa? Kon bo por biba ku bo konsenshi? Kada akto tin su konsekuensia, kada echo su kondena.

M’a mira orígen di mi herida, buskando mi bèrdat, m’a bin sa i determiná ku engaño semper lo ta opshon, pa esnan ku lo ke tapa e realidat.

Nos t’ei pa skohe responsabel, mustra ku nos tin e privilegio ku tempu no a agotá.

Nos tin e prioridat i nos por demostrá, alsa i deklará ku bèrdat lo keda otorgá.

E mentira semper lo ta na vanguardia, huntu ku e amigunan di hudas.

Nan lo ke tapa tur loke bo papia.

P’esei … Engaño?

Kit’é!

Hal’é!

Sino lo e sigui penetrá!

Outor/presentadó: Faumiri Frans

Fe k - klas 1

Djis pens’é

Mi ta mir’é, pero mi no por aserk’é. Mi ta tend’é, pero mi no por kontest’é. Mi tin gana di por ta kuné bintikuater shete, pero destino di bida mi no sa. Tur hende tin dia di bini i di bai.

Hopi bia nos ta zundra i bis’é, ai… stòp di kansa mi, nunka mi n’ por hasi nada, agt mi ta hasié tòg! Sin pensa ku e sa mihó.

Mi no ta rèp, pero mi ta sinti ku mi mester bis’é. Mi no ta kanta, pero mi ke splik’é. Mi no ta riku, pero mi ke sa kon pa balor’é. Amor no ta wega, ménos di dje.

B’a para ketu i wak kuantu kos el a hasi p’abo, ma tòg bo ta rabia kuné i hasi loke abo ke?

Habri bo wowo i pensa kla, no ta loke el a soña pa abo ta. Ma el a soña di tin un angel bunita ku ta komprond’é i por yud’é. Hasiendo orashon, e ta kai na rudia pa pidi Dios p’abo, i abo no sa mes, pasó bo ta drùk bezig ku bo kosnan, ku supuestamente ta interesante na bo kumbiniensia.

B’a yega di puntr’é ku e tin set?

B’a yega di bis’é bo ta yud’é sin e pidibu, i abo no ta zùr.

B’a yega di puntr’é ku e tin doló?

Of semper bo a wak pa abo i abo... i abo so ... ?

I nunka bo no ta pensa ku e t’ei? Mama, mama… djis pensé!

Outor: Rodjeska Martina

Presentadó: Gianthely Symor

Skol Avansá Amador Nita (SAAN) - klas 3