Rikesa di kada pobresa!!

Pobresa emoshonal, físiko i ekonómiko, niun tiki kómiko!

Pobresa, e ta kere ku e ta servisial, amabel, i ku e gusta brinda amistat.

Un kos, ku ta hasi bishita di sorpresa, esei ta su kos!

Pobresa, tur hende ta kore kuné, purba p’e no yega mes den nan bisendario.

Basha salu i bari su tras, pa si e tin e pensá e n’ regresá!

Pobresa, kriatura, e pret’i wowo di destino.

E ta bini ora e ke, den tur kas, den kada famia i na diferente tamaño.

Sin pensa ku e ta kousa daño!

Pobresa, bishita kòrtiku na orario?

Esei nunka no tabata den su dikshonario!

Pero, un orin, ta dos banda e tin. Tur dos mester wòrdu analisá, pa bo realisá ku tur pobresa tin su rikesa!

Un despedida, esta un pobresa, mayoria di bia di sorpresa.

Ma ki rikesa di alegría e reenkuentro ku lo tuma lugá un añ’ riba un dia!

Pleitu den relashon, por hinka bo den perdishon, esei si t’un pobresa.

Pero ki emoshon na momentu di e rekonsiliashon!

Pero si esei no bini, ta algu mihó p’abo tin, akaso esei no ta rikesa?

Kiko bo a kere? Ku tur famoso ta studiá!

Awèl, mi shon, b’a kibuká!

Si bo no a komprondé 100 porshento, tuma tempu i pens’é un momento!

Ekonomia, esta un pesadia, birando pió dia pa dia.

Un bes aki no tin mas kaminda pa a, ki a keda nos?

Pa tur nanishi bai den mesun direkshon, pasó tin e solushon!

Ki rikesa! Ta nos tin e mihó motivashon, tur nos antepasadonan a vense nan shon!

Ora bo ta disfrutá, tempu ta bai sin bo ripará!

Biba ku pobresa dje pobresa, pero lucha pa su rikesa! Pasó despues di kada lucha, bo tin viktoria; hinka esei bon den bo memoria!

Pero wak pa bo keda bei, pasó ora kabritu yega Punda, holó di chubatu gusta mata, ta asina bo ta bolbe kai!

Anto esei sí ta probresa!

Outor/presentadó: Jesmelys Angelista Albert Schweitzer Havo/Vwo - klas 5

Esaki ta di mi

Mi konklushon.

A ni nos dedenan no ta pareu, b’a para ketu na dje?

Mayoria di biaha nos no ta komprondé bida. Semper bai di kon ami, di kon?

Hende ta skirbi buki ku ami tin ku bai lesa i tene fe?

Pero ta ok pa no sa kontesta di kada pregunta. Amor? Amor a bira algu mas kruel ku por eksistí. Esun ku stima bo, kasi nunka abo stima, esun ku abo stima, nunka a stima bo?

Nan ta bisa: ‘kastigu akibou bo ta pas’é!’

Ku otro palabra, mundu ta e èrnu?

Di kon hende ta asina?

Hende ta gusta duna balor ora ya ta lat.

Te na mi entiero mester regalá mi or?

Hasiendo malu òf bon, tòg nan lo papia.

Bibando malu òf bon, tòg lo muri?

Tur kos tin su nal.

Pero te ainda, tur nal tabatin un komienso nobo.

Akaso despues di morto tin bida?

Ora bo muri, bo ta bai abou?

Òf ariba?

Ta e preguntanan ku tòg mi ke pa keda kontestá!

Tin un storia tras di kada persona, i tras di kada unu di nan aktonan.

Pues, pensa bo bon promé ku husga.

Outoestima di hende ta un balansa ku no por wòrdu kontrolá. Frakshon di tempu ta subi, den mesun kinipí di wowo por baha. E preguntanan ta keda oumentá na mi pensamentu.

Hasiendo mi mente skur, buskando un lus!

Ku poko poko ta bira mas chikí.

Kòrda bon!

Esaki no ta e!

No ta abo!

No ta nan!

Esaki ta mi konklushon.

Pens’é!

Outor/presentadó: Johnrick Anthony

SGB Boneiru – klas 2 SBO

Bida tin balor

Meimei di guera, un tata ta sklama Su yu morto bentá abou na suela Tanki ta pasa, avion ta bula Bientu ta supla ku furia

Pa motibu di guera, e famianan ta separá E pueblo di Siria ta buska trankilidat Koalishon Internashonal ta deseá pas Sperando ku e famianan por regresá nan kas

Entre e murayanan derumbá i e restonan mortal por mira kurpa di un hóben merikano For di e nubianan, un zonido ta sali Suela ta tembla i shelu ta habri

Ku forsa i potensia, un bos ta resoná “T’ami ta boso Dios, Señor di tur kos Den tempu di guera, boso lo skucha mi bos Ku forsa … sin stòp … fuerte i feros”

Solo ta baha, nochi ta sera Shelu di Damasco ta yená ku strea Kamu ando asina desaster di e guera Ku durante kuater aña a pone tera tembla

Ku yudansa di Dios, tur kos lo sali bon

Aunke ainda riba Siria, por mira avion Despues di kuater aña, ainda tin guera Pero nalmente speransa lo surgi for di tera

Aña 2017 ta un aña nobo

Un aña kargá ku speransa i amor En bes di muraya, tin ku konstruí brùg p’asina demostrá ku huntu por logr’é

Outor/presentadó: Kleivi Hansen

Skol Avansá Amador Nita (SAAN) – klas 2

Hende muhé nos ta

Ta hende muhé mi ta, i mi ta kere den mi mes, nunka lo mi kue kaminda robes.

Ta hende muhé mi ta, mi ta fuerte i inteligente nunka lo mi laga kos malu drenta mi mente.

Ta hende muhé mi ta, niun hende no por daña mi, si bo dal mi ku piedra, esei sí por kibra mi, pero nunka lo mi laga bo palabranan lastimá mi.

Ta hende muhé mi ta, mi sa kiko ta doló, pero e dolónan ku mi sinti lo no determiná mi futuro.

Ta hende muhé mi ta, pero esei no ke men ku mi ta suak, mi ta mas duru ku e semènt ku bo ta usa pa traha bo kas.

Ta hende muhé mi ta, i bo tin ku respetá: kòrda ku mundu ta drai rònt di mi!

Outor: Ariel Robinson

Presentadó: Melisa Sprockel Kolegio Pierre Lau er - klas 1ª