Un pisina di lágrima

Bida ta un pisina di lágrima

Un pisina yen di depreshon i desepshon

Unu yen di tristesa i pobresa ku por ta desastroso i doloroso Un pisina violento, yen di lamento, spanto i yanto.

Sin aprobashon, lastrá i sapatiá mi ta wòrdu bentá

I ku yen di konfushon, hogá mi ta soportá

Wak kon tur e vanidatnan akí a pone klaridat su visibilidat disparsé den humanidat. Wak kon tur e vanidatnan akí a pone ku kalidat di felisidat a bira en bano den mi personalidat.

Aiii est’un goloso, ku furioso a kita mi goso.

Pero hogando, kasi muriendo, mi ta skucha zonido di e olanan resonando, bisando: ‘No desampará i keda asotá, pasó tin un lampi, un bela, un lus den e skuridat di kalamidat.’ Landa den mi olanan, Sí, lucha ku nan ... te ora mi rantnan bira visibel pa bo wowonan.

Oh Yunan di mi pueblo: No laga bida stanka kaminda, sa di tin un aliansa pa kada sirkunstansia No laga e momentu daña bo kontentu Solushon i desenkadenashon ta e yabi pa abo dilanti sigui avansá

Kita temblor di e temor, pasó agresivamente e ta presentá pa keda permanentemente, pero afortunadamente tin un posibilidat pa simplemente baila i satisfaktoriamente retené e ofertanan kaótiko ku bida ta ofresé.

Komo un mortal, lag’é forma parti di un moral, pasó Fortalesa interior ta algu inferior ku ami i abo mester krea pa bencha bida, laga bientu pasa i piki e santu malu di tal manera ku ami i abo por pachangá kita balor i paga motor di e agresor tan atmirá.

Ku stabilidat, sin debilidat, riba pia keda pará. Ku un doktrina di disiplina Héroe i heroina ku bos asina fuerte i ku adrenalina bisa: ‘Oh pisina di lágrima, hamas i nunka ami lo bo bolbe tormentá, pasobra awe determiná mi a dominá.’

Outor/presentadó: Brooke Shields Goedgedrag MIL – klas 5