E maldito mariwana

Paki 5, paki 10 - 25 te asta 100, mei liber i un liber, pak’i vlui, risla, smocking, blach’i bakoba, laiter, zipo, clipper, bic Un Tep kreativo: Pak’i sigaria of pak’i vlui, tur ta lora bira tep, den bon i malu, ami t’ami mes, sin skonde, sin broma.

Mama a lanta mi bon, pero humamentu, esei ta eskoho di mi mes, Hopi strès den mi kabes, mariwana ta e medisina ku ta kalma mi un bes.

Tempu malu a pone mi biba altu P’ami por ta kalmu den un bida ku tur kos ta karu. Falta di atenshon i amor a krea den mi un karakter brabu.

Mi ke kambia: pero ken t’ei pa yudaaa

Mi ke kambia: pero ken t’ei pa skuchaaa

Mi ke kambia: pero ken ke duna un man. Awendia, mayoria t’ei pa tuma di bo man,

Ta gai di pariba mi ta, un gai ku ta bini fo’i famia kibrá, ami sa kiko ke men bisti paña kibrá, e pregunta ta: … abo sa?!

Abo sa kiko e sintimentu ta di no wòrdu komprondé

Abo sa kiko e sintimentu ta di no wòrdu aseptá, tampoko balorá, sla di bida stroba bo di gradua ...

E mariwana tin mi kalmá, pero tambe stanká.

E tin mi trankilisá, pero importansia di mi enseñansa, mi no por analisá.

E ta nami un fantasia di libertat Pero realidat ta, … mi ta kaptivá!

Mi ta luchando, kanando, bringando pa mi stòp òf bringa pa mi futuro, pasó awor ta mi turno!

Paki 5, paki 10 - 25 te asta 100, mei liber i un liber, paki vlui, risla, smocking, blach’i bakoba, laiter, zipo, clipper, bic Un Tep kreativo: pak’i sigaria òf pak’i vlui, tur ta lora bira tep. Den bon i malu, ami t’ami mes!

Outor/presentadó: Jurnuel Cicilia

FORMA MBO Boneiru - klas 1

Bunitesa

Bunitesa ... hmmm. Bo a yega di sinta un rato dilanti di spiel y admira bo mes un rato?

Cuanto di nos ta worry mucho cu sico, sin realisa cu ningun di nos no a nace perfecto. Cuanto di nos ta menosprecia otro pa nan manera di ta. Color, cara, curpa, estatura y hasta esnan special?

Pakico rebaha otro cu tanto insiguridad, realisando cu e bunitesa ta cuminsa cu bo mes?

Bunitesa … hmmm Ki bunitesa ta ni ca pa bo?

Hmm, bunitesa

Bunitesa no ta e makeup cu bo ta pone na bo cara, scondiendo e bunitesa natural cu bo a nace cu ne. Bunitesa no ta e paña nechi cu bo ta bisti pa saca gura cu bo tin of pa mustra sexy. Bunitesa no ta e operacion y e guranan cu bo ta pone y haci na bo curpa. No no, bunitesa no ta material; nada material no ta resalta bo bunitesa.

Bunitesa. bo kier sa kico e ta?

Bunitesa ta abo, mane Dios a crea bo E ta loke ta bini di paden, e curason cu ta bati dumdum, dumdum; esey ta bunitesa.

Bunitesa ta bo personalidad, humildad, sinceridad; e balor cu bo ta mira den bo mes como ser humano.

Bunitesa ta e con dencia y energia positivo cu bo ta brinda na esnan rond di bo, e respet cu bo tin pa ofrece; esey ta bunitesa. Bunitesa ta aprecio y aceptacion di bo propio bunitesa.

Bunitesa ta loke cu ta briya di paden y cu ta resalta pafo. Mane sa bisa, tanto bal ta bunita di pafo y paden no ta cos di mira.

Bunitesa, bunitesa ta cuminsa cu bo mes, ora bo acepta bo mes manera cu bo ta, cu siguridad. Pasobra bunitesa, bunitesa ta ni ca Abo!

Abo sa awo kico ta ni ca bunitesa.

Outor/presentadó: Anaisa Orman

EPI Educacion Profesional Intermedio Aruba - klas 1