Mi kachó den wea di sòpi

Mi tin un kachó ku yama Blèki. E ta un kachó masha golos. Tur kos ku e mira, e ta kue, asta pòpchi di mi ruman, e ta kue pa kome. Un kachó normal ta kome mas o ménos 1 pa 2 bia pa dia; Blèki ta kome 5 òf 6 bia pa dia.

Awèl, un dia mi bisiña a lanta mainta tempran pa e pone su wea di sòpi na kandela. El a saka su karni di kabritu pone riba mesa di kushina, saka su pak’i sòpi i su wea grandi pone, bragadam, riba mesa. El a yena e wea yen yen di awa, pon’é herebé, kaba el a bai sinta den kas pa kòrta su bèrduranan.

Nos tabata sintá den kas ta hari i kòmbersá tokante tempu di nos tempu, ku dos kos di ches riba mesa. Di ripiente nos a sinti holó di kachó. Nos a bira wak den banda. Logá ta Blèki a slùip drenta. M’a dal e un gritu, i rabiá m’a sak’é pafó i dal e porta di kas sera ku un skòp ... bram!

Mientrastantu, aya banda, mi bisiña su sòpi tabata serka kla. E kachó ku a sinti holó di e kabritu a kore bai na mi bisiña su kurá. Mi bisiña mes ku tin sinku kachó, no a sinti mi kachó drenta den kurá, kon bin? Por ta nan tabata drumí, mi no sa.

Pero mi kachó a slùip lastra drenta den kushina, subi riba stof i ... djublum. El a drenta den e wea di sòpi kome tur karni. Até ... ata mi bisiña ta bai den kushina. Di ripiente nos a tende: Señora Jessurunnnnnnn! Ata nos tur na kareda. ‘Kiko lo a pasa bisiña?’ Ora nos a drenta kushina, ata Blèki riba bisiña, ta lembe bisiña. Nos tur na harimentu.

Outor/presentadó: Mayron Martina

St. Ignatius College – klas 1

52 Johnny Blaze i su soño di oro

Johnny Blaze ta un mucha yu di Kòrsou di 10 aña, pober i humilde. Serka su mama i su tata, el a siña rèspèt. Johnny ta un mucha soñadó, pero su amigunan i su tata semper tabata bis’é ku e lo no logra niun di su soñonan.

Johnny Blaze tabata biba huntu ku su tata Alvrin Blaze i su mama Frida Blaze den bario di Sabaneta. Nan tabata biba den un kas chikitu, pober pero felis. Johnny tabata bai skol Arco Iris; e tabata den grupo 5 di skol di fundeshi.

Banda di nan kas, tabatin un riu i un kasita di palu ku Johnny i su amigunan mes a traha.

Tur hende tabata yama Johnny: Johnny soñadó. Di kon Johnny soñadó?

Pasó semper e tabata pensa ku dia e bira grandi, e lo bai hasi kambio hopi grandi pa su mes, su bario i su pais. Pero hopi hende tabata bis’é ku lo e no logr’é! Esei tabata hasié hopi tristu!

Un dia, ora e tabata bai drumi, el a mira un strea masha grandi i bunita na shelu. E strea tabata bria manera mil lus huntu. E ora ei el a sera su wowo, i el a hura e strea ku dia e bira grandi lo e logra su soñonan.

Algun aña despues, Johnny mester a stòp di bai skol pa bai traha i yuda su mayornan ku e gastunan di kas. Ketu bai Johnny ta soña, pero su tata, ku no tabata di akuerdo ku Johnny su soñonan, tabata pon’é hasi trabou pisá manera karga palu di maishi, chapi kurá i limpia kas.

Johnny no tabata gusta e trabounan ei. Señora Frida tampoko no tabata gusta loke Johnny su tata tabata pone Johnny hasi. Despues di tres luna di trabou pisá, Johnny a kore bai for di kas; el a bai buska un mihó trabou pa e por sigui ku su soño i yuda su mama. Señora Frida a yuda Johnny hui, pasó e ker a mira su úniko yu felis.

Danki na e tres lunanan di trabou pisá ei, Johnny a haña eksperensia. Asina el haña trabou komo limpiadó di kas; despues komo fèrfdó i nalmente el a kuminsá limpia sapatu di hende riku. Na tur tres e lugánan, nan tabata pag’é bon. Ora el a gana basta sèn, el a bai kas di su mama bèk, i e por a yuda su mama paga e kas.

E ora ei Johnny a disidí di skirbi un karta pa Minister Presidènt, i el a kont’é ku e tabata un habitante di bario Sabaneta. Kisas poko hende konosé e bario, pasobra e ta chikitu i pober. Komo e bario tabata hopi destruí, Johnny tabata pidi yudansa di gobièrnu den e karta. Dianan ta pasa, pero Minister Presidènt no ta reakshoná. Johnny a yama un reunion di tur hende di bario riba e plasa prinsipal. Su manisé, tur hende a bini ku fèrf, kuashi, tayer di outo, palu i kabuya. Nan a traha wep i fèrf nan. Tambe nan a planta hopi or i mata. Ku e palu ku a sobra, nan a traha kasita di palu pa e mucha muhénan hunga aden. Tur hende tabata felis. Un dia e Minister Presidènt a pasa i mira kon nan a drecha e bario di

Sabaneta. El a keda impreshoná. El a manda buska e persona responsabel di e obra di arte. Johnny a bai o sina di Minister Presidènt, i nan a kòmbersá basta ratu.

Johnny a sali o sina ku un sonrisa masha grandi mes, di orea pa orea riba su kara.

Señora Frida a puntra Johnny: ‘Ta kiko Minister Presidènt a bisa bo, mi yu?’

Johnny a respondé su mama: ‘El a pidi mi hasi meskos ku m’a hasi ku mi bario den otro bario tambe pa Kòrsou bira mas bunita. M’a bis’é ku sí, pasó pa bienestar di Kòrsou lo mi hasi tur kos.’

Asina Johnny Blaze a sigui ku su proyekto di hasi Kòrsou un mihó lugá. Johnny a haña un medaya di oro i un plakat pa su obra. Su tata tabata masha orguyoso di dje maske e no tabata bisa.

Mensahe di e kuenta akí ta pa mayornan kere den nan yunan, laga nan sigui nan soñonan.

Mensahe pa hóbennan ta pa nan kere den nan mes i sigui nan soñonan i no sinta warda riba otro pa nan bira realidat.

Outor/presentadó: Noëlgel Pinedo

Kolegio Pierre Lau er – klas 1